13
Amedya n ufeǧaḥ izarrɛen
1 Deg wass nni iffeɣ Yasuɛ zi taddart, iruḥ iqqim x tma n řebḥar.
2 Imun-dd xas ijj n uhimur n řɣaci, ařami yenya di uɣarrabu, iqqim dayes uca řɣaci marra bedden x tma n řebḥar.
3 Issiweř akidsen x waṭṭas n tmesřayin s imedya, inna: “Xzar, afeǧaḥ iffeɣ, ḥima ad izarɛ.
4 Am tuɣa izarreɛ, tewḍa ca n zzariɛet x tma n webrid, xeccen-dd ijḍaḍ, neqben tt.
5 Tewḍa ca nneɣni x weẓru mani tuɣa war iǧi ucař aṭṭas. Deɣya teɣmi-dd s minzi tammurt war tuǧiɣ.
6 Umi dd-tenqar tfuct, icmeḍ uɣemmuy, uca isřaw minzi war ɣares tuɣi bu weẓwar.
7 Ca nneɣni tewḍa x isennanen. Mɣaren isennanen, jiyyfen tt.
8 Ca nneɣni tewḍa x temmurt taṣebḥant, tiwi-dd řɣiǧet, ca mya, ca nneɣni settin, ca nneɣni třatin n tseqqar.
9 Wenni ɣar iǧa imezzuɣen i useǧi, ejj i-t ad iseř.”
10 Xas uca usin-dd ɣares imeḥḍaren nnes, nnan as: “Mayemmi akidsen tessawařed s imedya?”
11 Netta yarra-dd, inna asen: “Minzi immewc awem ad tessnem ssirr n Tgeldit n ijenwan, nitni maca war d asen t immewc ca.
12 Minzi wenni ɣar iǧa ad as immewc uca ad ɣares yiři s waṭṭas, maca wenni war ɣar iǧi ca ad zzayes ittwakkes uřa d min ɣares.
13 S uyenni ssawařeɣ akidsen s imedya, ařami nitni ttwařan am war ttwiřin u ttesřan am war ttesřin, war fehhmen.
14 Daysen i ɣa ikemmeř wawař i inebba Icaɛya, inna: ‘S useǧi ad tesřem, maca war tfehhmen, s tmuɣři ad tẓarem, maca war tfettnem,
15 maɣar uř n řgens-a aqa iqbubbez, imezzuɣen nsen ḍeqřen deg useǧi u nitni aqa qqnen tiṭṭawin nsen, maḥend war ttwiřin s tiṭṭawin nsen, ad sřen s imezzuɣen nsen, ad fehmen s wuř nsen, ḥima ad tuben uca Necc ad ten ssgenfiɣ.’
16 Maca sseɛd n tiṭṭawin nwem umi ttwařant, sseɛd n imezzuɣen nwem umi ttesřan!
17 S tidett Necc ad awem iniɣ, aṭṭas n inabiyyen d imseggaden tuɣa xsen ad ẓaren min teẓrim, maca war t ẓrin, xsen ad sřen min tesřim, war t sřin.”
18 “Xenni kenniw, sřem i umedya n wenni izarrɛen.
19 Kuř ijjen wenni ittesřan i Wawař n Tgeldit uca war t ifhim, ad ɣares dd-yas umɛeffan, ad ixḍef min ittwazarɛen deg wuř nnes. Aqa d man aya min ittwazarɛen x tma n webrid.
20 Min ittwazarɛen x weẓru, aqa wa d wenni i ɣa iseǧen Awař, ad t iqbeř deɣya s řefraḥet,
21 maca war d as iwti ca weẓwar deg ixef nnes, ad iqqim drus waha. Xmi dd ɣa tas řmeḥnet niɣ amarret di ṭṭweɛ n Wawař ad innedref deɣya.
22 Min ittwazarɛen jar isennanen aqa wa d wenni ittesřan Awař, maca amnus n řweqt-a d uɣekkwi n wagřa ad jiyyfen Awař uca netta war dd-ittiwi ca řɣiǧet.
23 Min ittwazarɛen di temmurt taṣebḥant aqa wa d wenni ittesřan Awař uca ad t ifhem, ad yarbu u ad dd-yawi xenni řɣiǧet: ijjen ad yařu mya n tseqqar, wenneɣni settin uca wenneɣni třatin.”
Amedya n řḥayyar di řwest n yirden
24 Iwca asen ijj n umedya nneɣni, inna: “Tageldit n ijenwan am yijj n bnadem tuɣa izarreɛ zzariɛet taṣebḥant deg iyyar nnes.
25 Ařami tuɣa iwdan ṭṭṣen, yusa-dd řeɛdu nnes, izarɛ řḥayyar di řwesṭ n yirden uca yuyur.
26 Ařami dd-imɣar uɣemmuy uca yiwi-dd řɣiǧet, řexdenni iḍhar-dd řḥayyar ɛawed.
27 Xenni usin-dd imsexxaren n bab n taddart, nnan as: ‘A Siditneɣ, ma war tzarɛed ca zzariɛet taṣebḥant deg iyyar nnec? Manis i dd-yusa xenni řḥayyar-a i dayes iǧan?’
28 Inna asen: ‘Aqa řeɛdu igga man aya’. Nnan as imsexxaren: ‘Ma texsed ad nraḥ, ad t neyru?’
29 Maca netta inna: ‘Lla, ḥima xmi ɣa tyarrwem řḥayyar war kis tqeǧɛem uřa d irden.
30 Ejj i-ten ad mɣaren s tnayen ař tameyra. Di řweqt n tmeyra ad iniɣ i yinni imejjaren: ‘Yarwem amezwar řḥayyar, ceddem t di tqebbiṭin ḥima ad ittwassecmeḍ, maca irden, yarwem t di řmarsi inu.’ ”
Amedya n tḥebbuct n zzariɛet n uxerdel d umedya n wentun
31 Iwca asen ɛawed ijj n umedya nneɣni, inna: “Tageldit n ijenwan am yict n tḥebbuct n zzariɛet n uxerdel, yiwyi tt-i-dd ijj n weryaz, izarɛ i-tt deg iyyar nnes.
32 Waxxa nettat d tameẓyant qaɛ zi marra zzariɛet nneɣni, xmi tmeqqar, tᵉddekkwař d tameqqrant zi marra tibbi uca tdekkwař d tacejjart maḥend ad ɣares dd-asen yijḍaḍ n ujenna uca ad ggen řeɛwacc nsen x řefruɛ nnes.”
33 Iwca asen ɛawed ijj n umedya nneɣni, inna: “Tageldit n ijenwan am wentun, tiwyi t-i-dd ict n temɣart uca tessnuffar i-t di třata n řemdud n waren, ařami issmemm warecti qaɛ.”
34 Marra man aya issiweř zzayes Yasuɛ i řɣaci s imettiřen uca břa amedya war kisen issiweř ca,
35 ḥima ad ittwakemmeř min xef issiweř unabi i innan: “Ad arezmeɣ aqemmum inu s imedya, ad barrḥeɣ s min innufaren zeg wami ittwagg dsas n ddunect.”
Afessar n umedya n řḥayyar di řwest n yirden
36 Řami ismeḥ Yasuɛ di řɣaci ad uyuren, iruḥ ɣar taddart. Usin-dd ɣares imeḥḍaren nnes, qqaren: “Ini aneɣ min ixs ad yini umedya n řḥayyar d iyyar!”
37 Yarra-dd, inna asen: “Wenni izarrɛen zzariɛet taṣebḥant Netta d Mmis n bnadem.
38 Iyyar d ddunect uca zzariɛet taṣebḥant nettat d tarwa n Tgeldit uca řḥayyar netta d tarwa n umɛeffan.
39 Řeɛdu wenni t izarɛen, aqa netta d cciṭan, uca ṣṣabet, aqa nettat d qeṭṭu n ddunect u inni imejjaren, nitni d lmalakat.
40 Am mammec ssmunen řḥayyar uca sscemḍen t s tmessi, ammu i ɣa yiři ɣar qeṭṭu n ddunect-a.
41 Mmis n bnadem ad dd-issekk lmalakat nnes, ad ssḥeyydent zi Tgeldit nnes qaɛ tiɛenkřifin d marra iɛeffanen.
42 Ad ten nḍaren di řkuccet n tmessi mani ɣa yiřin imeṭṭawen d uɣezzi n teɣmas.
43 Xenni imseggaden ad arɣen am tfuct di Tgeldit n Babatsen. Wenni ɣar iǧa imezzuɣen i useǧi ad iseř.”
Amedya n řkenz deg iyyar d umedya n tyaqut
44 “Tageldit n ijenwan ɛawed am yijj n řkenz ittwassnuffaren deg iyyar, yufa i-t ijj n weryaz, issnuffar i-t uca di řefraḥet nnes yuyur, izzenz qaɛ min iǧan ɣares uca isɣa iyyar nni.”
45 “Tageldit n ijenwan ɛawed am yijj n usebbab i yarezzun tiyaqutin tiṣebḥanin.
46 Řami yufa ict n tyaqut tiɣřa aṭṭas, yuyur, izzenz marra min tuɣa ɣares, xenni isɣa i-tt.”
Amedya n tracca n iseřman
47 “Tageldit n ijenwan ɛawed am tracca mmenḍaren tt di řebḥar, teyru ɛřam kuř asřem.
48 Xmi teccur, ssuffɣen tt-i-dd ibeḥriyyen ɣar tma n řebḥar, qqimen uca farzen zzayes min iṣebḥen di řeqcuɛ nsen, maca min war iḥřin nḍaren t.
49 Ammu i ɣa tiři di qeṭṭu n ddunect. Ad dd-ffɣent lmalakat, ad farnent iɛeffanen zi řwesṭ n imseggaden.
50 Ad ten nḍarent di řkuccet n tmessi mani ɣa yiřin imeṭṭawen d uɣezzi n teɣmas.”
51 Inna asen Yasuɛ: “Ma tfehmem i marra man aya?” Nnan as: “Wah, a Siditneɣ!”
52 Xenni inna asen: “S uya kuř amseřmad n idlisen wenni idweř d ameḥḍar n Tgeldit n ijenwan, aqa igga am yijj n bab n taddart issuffuɣ zi řkenz nnes min iǧan d jdid u min iǧan d aqdim.”
53 Awarni řami ikemmeř Yasuɛ imedya-ya, yuyur ssenni.
Anabi war ɣares bu ccan di tendint nnes
54 Řami dd-yusa ɣar temmurt nnes, ikkar isseřmad i-ten di temzidawin nsen ařami qqimen tbehten, nnan: “Manis d as dd-tekka tiɣit-a d řeɛjayeb-a?
55 Ma war iǧi wa d mmis n unejjar? Ma war qqaren i yemmas Maryam, d aytmas ma war d asen qqaren Yaɛqub d Yasi d Cimɛun d Yahuda?
56 Ma war ǧint suyᵉtmas qaɛ ɣarneɣ? Manis d as dd-ikka man aya marra?”
57 Uca nderfen zzayes. Maca Yasuɛ inna asen: “Anabi ɛemmarṣ war iǧi břa ccan, mɣir di tendint nnes u di taddart nnes.”
58 Uca war iggi diha řeɛjayeb aṭṭas zi ssibbet n břa l’iman nsen.