13
Abarreḥ n Yasuɛ x qeṭṭu n ddunect
1 Ařami dd-iffeɣ zi Zzawect Tameqqrant, inna as ijjen zeg imeḥḍaren nnes: “A Amseɣɣar, xzar, mammec ǧan iẓra-ya d řebni-ya!”
2 Yarra-dd Yasuɛ, inna as: “Ma teẓrid řebni-ya imɣaren? War da ittɣimi uřa d ijj n weẓru x weẓru nneɣni i war ittnehdim.”
3 Řami tuɣa iqqim x wedrar n Zzitun qibač i Zzawect Tameqqrant, sseqsan t Buṭrus d Yaɛqub d Yuḥanna d Andrawus řami ten tuɣa weḥḥedsen:
4 “Ini aneɣ meřmi i ɣa yiři man aya, u man ad tiři řeɛřamet aqa marra timesřayn-a ad awḍent?”
5 Ibda Yasuɛ iqqar asen: “Xzarem, ḥima war kenniw iɣekkwi ḥed.
6 Aqa aṭṭas ad dd-asen s Yisem inu qqaren: ‘Aqa d Necc!’, uca ad ɣwan aṭṭas.
7 Mařa tesřim x imenɣan d řexbar n garrat, war ttnexřiɛem ca, minzi s uɣiř ad yiři man aya, maca war ittiři ɛad d aneggar.
8 Minzi řgens ad ikkar ḍidd i řgens nneɣni u tageldit ḍidd i tgeldit nneɣni. Ad iřin inhezzan n temmurt zeg wemcan ɣar wemcan nneɣni uca ad yiři řaẓ d uɣewwuɣ. Timesřayin-a d beddu n řewjeɛ n tarwa.
9 Ḥḍam ixef nwem, minzi ad kenniw sellmen i tudrin n ccreɛ, ad kenniw hettken s urekkuḍ di temzidawin nsen uca ad kenniw ssiwḍen ɣar ijeǧiden d řḥukkam di ssibbet inu, d cchadet i nitni.
10 Maca ɣar umezwar ittxeṣṣa ad ittwabarreḥ s Řexbar Aṣebḥan di marra řegnus.
11 Xmi kenniw i ɣa gewwden ḥima ad kenniw sellmen, war kessim s wemnus qbeř zi min ɣa tinim, war dayes txarriṣem ca, maca min ma d awem i ɣa immewcen di tsaɛɛet nni, siwřem zzayes, minzi war teǧim d kenniw i issawařen, maca d Arruḥ Iqeddsen.
12 Umas ad isellem umas maḥend ad t nɣen, u babas ad isellem mmis, uca ad tekkar tarwa x lwalidin nnes uca ad ten nɣen.
13 Ad kenniw carhen marra di ssibbet n Yisem inu, maca wenni i ɣa iṣbaren ař aneggar, ad ittwassenjem.
14 Xmi ɣa tẓarem nnɛi n wareyyeb, min xef tuɣa issawař unabi Daniyal, ittbedda mani war ittxeṣṣa ad ibedd - wenni iɣrin ad ifhem! - řexdenni ittxeṣṣa i yinni iǧan di Yahudiyya, ad arewřen ɣar idurar,
15 u wenni iǧan x tzeqqa war dd-ihekkwi ca ɣar taddart u war ittidef ca ḥima ad iksi ca zi taddart nnes,
16 u wenni iǧan deg iyyar war dd-ittɛiqqib ca ḥima ad iksi aseřham nnes.
17 Uct x tinni iǧan s ddeyset d tinni issuṭuḍen deg wussan nni!
18 Ẓaǧem ḥima war tᵉttiři tarewřa nwem di řmecta,
19 Minzi deg wussan nni ad din tiři ict n řmeḥnet i war tuɣi am nettat zeg wami dd-ixřeq AREBBI ddunect ař řexxu, uca war tᵉttiři ɛemmarṣ ɛawed.
20 Mařa SIDI war issemẓi ussan nni, war tnejjem uřa d ict n ddat, maca di ṭṭweɛ n yinni ittwafarzen, inni i ixḍar Netta, aqa issemẓi ussan nni.
21 Xenni mařa inna awem ijjen: ‘Aqa Lmasiḥ da!’, niɣ: ‘Aqa-t diha!’, war t ttamnem.
22 Minzi ad kkaren imasiḥen ifalsuten d inabiyyen issxarriqen, ad ggen řeɛřamat d řeɛjayeb ḥima, mařa izemmar, ad xedɛen ɛad inni ittwafarzen.
23 Kenniw maca, ḥḍam, aqa marra nniɣ awem t qbeř.
24 Maca deg wussan nni, awarni řmeḥnet nni, ad tebbarcen tfuct uca taziri war tᵉttic ɛad tafawt nnes,
25 itran ad dd-wḍan zeg ujenna uca ṣṣulaṭat i iǧan deg ijenwan ad ttwanhezzent.
26 Xenni ad ẓaren Mmis n bnadem xmi dd ɣa yas deg iseynuten, s jjehd d uɛuǧi ameqqran.
27 Řexdenni ad issekk lmalakat nnes uca ad iyru inni zzayes ittwafarzen zi arebɛa n tɣemmura n usemmiḍ, zi ṭṭarf aneggaru n temmurt ař ṭṭarf aneggaru n ujenna.
28 Řemdem zeg wartu n tazart amettiř-a: xmi ɣa dewřen řefruɛ nnes ad dd-areḍben uca tifray ad dd-ffɣent, xenni ad tessnem aqa anebdu yiweḍ-dd.
29 Ammu ittxeṣṣa uřa d kenniw, xmi ɣa tẓarem timesřayin-a ttemsarant, ad tessnem, aqa man aya yudes-dd, x tewwart.
30 S tidett ad awem iniɣ, jjiř-a war iɛeddu ca ař d ɣa yiři man aya marra.
31 Ajenna d temmurt ad ɛdun, maca awařen inu war ɛeddun ɛemmarṣ.
32 Maca ass nni d tsaɛɛet nni uřa d ijj war t issin, uřa d lmalakat nni iǧan deg ujenna, uřa d Mmis, mɣir Babas.
33 Xẓarem, ḥḍam, ẓaǧem, minzi war tessinem ca meřmi dd ɣa taweḍ řweqt nni.
34 Aqa-t am yijj n bnadem ittxeṣṣa as ad isafar, ijja taddart nnes, iwekkeř imsexxaren nnes s ṣṣulṭa, iwca i kuř ijj zzaysen řxedmet nnes, uca iɛřem as i uɛessas n tewwart maḥend ad iqqim ad iḥḍa.
35 Iwa ḥḍam xenni, minzi war tessinem ca meřmi i dd ɣa yas bab n taddart, ɣar uɛecci niɣ ɣar wezyen n ǧiřet niɣ ɣar usquqeɛ n uyaẓiḍ niɣ ɣar ṣṣbeḥ zic,
36 ḥima, mařa dd-ittis deɣya, war kenniw ittif tᵉtteṭṭṣem.
37 Min d awem qqareɣ řexxu, qqareɣ t i marra: Faqem!”