7
1 “Wa d azerf i tɣarṣt n umwarwas. Aqa d tamqeddast qaɛ.
2 Deg wemcan mani ɣarrṣen i tɣarṣt n wecmaḍ, ad ɣarṣen i tɣarṣt n umarwas. Ad izeǧeɛ idammen nnes x uɛalṭar ɣar marra iɣezdisen nnes.
3 Ad yawi marra tadunt nnes: anewwar n tadunt d tadunt nni idřin adan,
4 uca ad ikkes tnayen n tiẓẓař ak-d tadunt i xasent iǧan ɣar tejɛinna, uřa d min yuyřen ɣar tsa uca yarsa x tiẓẓař,
5 uca akehhan ad issbexxar aya x uɛalṭar am yict n tewhibt n tmessi i SIDI. Aqa-tt d taɣarṣt n umarwas.
6 Marra awtem jar ikehhanen ad zzayes yecc. Ad ittwacc deg ijj n wemcan amqeddas, aqa-tt d tamqeddast qaɛ.
7 Ad yiři ijj n uzerf am i tɣarṣt n ddenb am i tɣarṣt n umwarwas. Ad yiři weysum n tɣarṣt i ukehhan, wenni tuɣa zzayes igg aṣřaḥ x ca n yijjen.
8 Akehhan nni i ɣa iqeddmen taɣarṣt n wecmaḍ n ca n ijjen, i ukehhan nni ad tiři teřmect n tɣarṣt n tmessi nni dd-iqeddem, tiřmect ad tiři i netta.
9 Kuř tawhibt n řɣiǧet nni ḍarrḥen nitni di tefqunt uřa d marra min ittwasswejden di ṭṭajjin niɣ deg wexdim, d man aya ad yiři i ukehhan nni t iqeddmen, ad yiři i netta.
10 Kuř tawhibt n řɣiǧet i ittwaxeǧḍen s zzect n zzitun niɣ yuẓɣen, ad tiři i marra arraw n Harun, am i yijj am i wenneɣni.”
11 “Wa d azerf i tɣarṣt n řehna tenni i ɣa iqeddem bnadem i SIDI.
12 Mařa ad tt iqeddem i uqadi, xenni ad iqeddem ak-d tewhibt n uqadi uřa d řemsemnat břa antun ixeǧḍen s zzect d teřfaf břa antun ttwadehnent s zzect d řemsemnat n waren azdad ttwaxeǧḍent s zzect.
13 Ad iqeddem tawhibt nnes ak-d řemsemnat n weɣrum s wentun, jmiɛ ak-d tewhibt n uqadi, tenni iǧan zi tewhibin nnes n řehna.
14 Zi kuř ddarb n tawhibt ad iqeddem icten zzayes am tewhibt n usgeɛɛed i SIDI. Ad tiři i ukehhan nni i ɣa izeǧɛen idammen n tɣarṣa n řehna x uɛalṭar ɣar marra iɣezdisen nnes, ad tiři i netta.
15 Aysum n tewhibt n uqadi, tenni iǧan zi tewhibin nnes n řehna, ad ittwacc deg wass i di ɣa iqeddem tawhibt nnes. War ittejji zzayes walu ař ṣṣbeḥ.
16 Mařa tawhibt nnes tusa-dd ak-d ijj n lwaɛd niɣ teǧa d ict n tewhibt s řxaḍar, ad tᵉttwacc deg wass i di i ɣa iqeddem taɣarṣt nnes uca min zzayes iceṭṭen ad ittwacc deg wass i-t-i-dd-iḍfaren.
17 Min iceṭṭen ɛad zeg weysum n tɣarṣt ad ittwacmeḍ s tmessi deg wass wiss třata.
18 Mařa ittwacc ɛad zeg weysum n tɣarṣt nnes n řehna deg wass wiss třata, xenni wenni tt iqeddmen war ittiři i arḍa n SIDI u taɣarṣt nnes war d as tᵉttwiḥsib ca d taɣarṣt n řehna. Ad tiři d ict n jjɛifect uca wenni zzayes ɣa iccen ad yarbu řmuɛṣiyyet nnes.
19 Aysum nni iḥadan ca n tmesřact ixemjen, war zzayes ttᵉttem. Ad t sscemḍen s tmessi. Zi min iceṭṭen n weysum, izemmar ad zzayes yecc marra wenni izedgen.
20 D wenni i ɣa iccen zeg weysum n tɣarṣt n řehna, tenni iǧan i SIDI, am xas yarsa řexmej nnes, řeɛmar nni ad ittwaqess zi řgens nnes.
21 Mařa iḥada ḥed ca n tmesřact ixmej, amecnaw řexmej n bnadem niɣ řexmej n yict n řebhimet ixemjen niɣ ca n tmesřact i iǧan d nnɛi n řexmej, uca xenni ad yecc zeg weysum n tɣarṣin n řehna i SIDI, řeɛmar nni ad ittwaqess zi řgens nnes.”
Tadunt d idammen aqa d řeḥram i macca
22 Issiweř SIDI ak-d Musa, inna:
23 “Siweř ak-d ayt n Israil, ini: ‘Kenniw war ttᵉttem ca qaɛ tadunt n ufunas niɣ n izmar niɣ n iɣayḍ.
24 Tadunt n ict n řxecbet d tadunt n ijj n umuddar mezzqen t, tɛeddeř ad tᵉttwagg i mammec ma tegga řxedmet, maca kenniw war zzayes ttᵉttem walu.
25 Man wen i ɣa iccen tadunt n yict n řebhimet i zi dd ɣa ssqarrben ict n tewhibt n tmessi i SIDI, řeɛmar nni zzayes i ɣa iccen, ad ittwaqess zi řgens nnes.
26 Di marra tizeddiɣin nwem war ttᵉttem uřa d ca zeg idammen, am zeg ijḍaḍ am zi řebhayem.
27 Kuř ijj n řeɛmar nni i ɣa iccen mɣir ca zeg idammen, řeɛmar nni ad ittwaqess zi řgens nnes.’ ”
Tasɣart n tɣarṣa n řehna i ikehhanen
28 Issiweř SIDI ak-d Musa, inna:
29 “Siweř ak-d ayt n Israil, ini: ‘Wi i dd ɣa issqarrben tɣarṣt nnes n řehna i SIDI, ad iqeddem tawhibt nnes i SIDI zi tɣarṣt n řehna nnes.
30 S ifassen nnes ad yawi tiwhibin n tmessi zzat i SIDI. Tadunt i iǧan x idmaren ad tt yawi ak-d idmaren nni, maḥend ad tt issenhezz zi ssa ɣar da am yict n tewhibt n wenhezzi zzat i wudem n SIDI.
31 Akehhan ad issbexxar tadunt x uɛalṭar, maca idmaren ad iřin i Harun d warraw nnes.
32 Zi tɣarṣa nwem n řehna ad tqeddmem i ukehhan ɛawed acekrud afusi d tawhibt n usgeɛɛed.
33 Acekrud afusi ad yiři d tasɣart n wenni zeg warraw n Harun i ɣa iqeddmen idammen n tɣarṣi n řehna d tadunt nsent.
34 Minzi Necc ksiɣ idmaren n wenhezzi d ucekrud i dd-ittwassgeɛɛden d tawhibt zi tɣarṣi n řehna n ayt n Israil u wciɣ ten i ukehhan Harun u i warraw nnes am yict n lfariḍa i řebda, zi jjihet n ayt n Israil.
35 Ta d tasɣart ittwassdehnen n Harun d tesɣart ittwassdehnen n warraw nnes zi tewhibin n tmessi n SIDI deg wass i ten dd-issqarreb, maḥend ad iřin d ikehhanen i SIDI,
36 tasɣart nni iwca SIDI i ayt n Israil deg wass i ten idhen. Aqa d ict n tewṣeyyet i řebda i marra jjiřat nsen.’ ”
37 Wa d azerf i tɣarṣt n wecmaḍ d tewhibt n řɣiǧet d tɣarṣt n ddenb d tɣarṣt n umarwas d tɣarṣa i udeccen d tɣarṣa n řehna,
38 azerf i iweṣṣa SIDI i Musa deg wedrar n Sina, ass min di iweṣṣa ayt n Israil ad qeddmen tiwhibin nsen i SIDI di řexřa n Sina.