6
1 Issiweř SIDI ak-d Musa, inna:
2 “Umur Harun d warraw nnes, ini asen: ‘Wa d azerf i tɣarṣt n wecmaḍ. Taɣarṣt n wecmaḍ x ukeccuḍ x uɛalṭar ad teqqim tareqq ǧiřet tekmeř ař ṣṣbeḥ u ittxeṣṣa timessi n uɛalṭar ad teqqim ad tecmeḍ dayes.
3 Akehhan ad yarḍ aseřham nnes n řeqṭen, ad ibyes ssarwař nnes n řeqṭen x arrimet nnes, uca ad iksi iɣɣeḍ n min iqqimen n tadunt n tɣarṣt n wecmaḍ, tenni tecca tmessi, uca ad t issars zzat i uɛalṭar.
4 Xenni ad ikkes arruḍ nnes uca ad yarḍ arruḍ nneɣni, ad yawi iɣɣeḍ n min iqqimen n tadunt barra i řmargeḥ n řɛeskar ɣar yijj n wemcan iṣfa.
5 Ittxeṣṣa ad teqqim tmessi tareqq x uɛalṭar, ittxeṣṣa war txessi ca. Akehhan ad xas issarɣ akeccuḍ kuř ṣṣbeḥ uca ad xas isettef taɣarṣt n wecmaḍ uca ad xas issbexxar tadunt n tɣarṣa n řehna.
6 Timessi x uɛalṭar ad teqqim tareqq řebda, war txessi.’ ”
7 “Wa d azerf i tewhibt n řɣiǧet. Arraw n Harun ad tt awyen zzat i wudem n SIDI zzat i uɛalṭar.
8 Netta ad zzayes iksi ijj n wuru zeg waren azdad n tewhibt n řɣiǧet ak-d ca n zzect nnes d marra jjawi i iǧan x tewhibt n řɣiǧet. Ad issbexxar aya x uɛalṭar. Aqa d ict n řefwaḥet ittfuḥen, ict n řidaret dayes i SIDI.
9 Harun d warraw nnes ad ccen min zzayes iceṭṭen. Ittxeṣṣa ad t ccen břa antun deg wemcan amqeddas. Ad t ccen di řemraḥ n Uqiḍun n Umsagar.
10 War iɛeddeř ad t ggʷen s wentun. Ta d taɣarṣt nsen nni wciɣ Necc zi tewhibin inu n tmessi. Aqa-tt d tamqeddast qaɛ am tɣarṣt n ddenb d tɣarṣt n umarwas.
11 Marra iwetman jar warraw n Harun ad zzayes ccen. Aqa-tt d ict n tewṣeyyet i řebda x tewhibin n tmessi n SIDI i marra jjiřat nwem. Marra wi tt ɣa iḥadan, ad ittwaqeddes.”
12 Issiweř SIDI ak-d Musa, inna:
13 “Ta d tawhibt n Harun d warraw nnes i zi dd ɣa qarrben ɣar SIDI deg wass min di i ɣa ittwadhen Harun: taɛcart n ijj n ifa n waren azdad am ict n tewhibt n řɣiǧet i řebda, azyen nnes di ṣṣbeḥ d wezyen nnes nneɣni ɣar uɛecci.
14 Deg ijj n uxdim ad tessewjed aya s zzect n zzitun uca ad t tawyed d tawhibt awarni t txeǧḍed. Ad tqeddmed iřeqqwaz ttwarẓan n tewhibt n řɣiǧet am ict n řefwaḥet ittfuḥen i SIDI.
15 Akehhan nni ɣa dehnen deg wemcan nnes zeg iḥenjiren nnes, ad tt issewjed. Aqa-tt d tawṣeyyet i řebda. Tawhibt-a ad tᵉttwabexxar i SIDI marra.
16 Marra tawhibt n řɣiǧet n ukehhan ad tiři tekmeř. War zzayes ttᵉtten ca.”
17 Issiweř SIDI ak-d Musa, inna:
18 “Siweř ak-d Harun d warraw nnes, ini asen: ‘Wa d azerf i tɣarṣt n ddenb: deg wemcan mani tᵉttwaɣarṣ taɣarṣt n wecmaḍ, ad tᵉttwaɣarṣ ɛawed taɣarṣt n ddenb zzat i wudem n SIDI. Aqa-tt d tamqeddast qaɛ.
19 Akehhan nni tt ɣa iqeddmen d taɣarṣt ad zzayes yecc. Ittxeṣṣa ad tᵉttwacc deg ijj n wemcan amqeddas di řemraḥ n Uqiḍun n Umsagar.
20 Marra wi ɣa iḥadan aysum nnes ad zzayes ittwaqeddes. Mařa ingez cwayt zeg idammen x yijj n warruḍ, xenni ittxeṣṣa ad tessirded min xas ibeqqḍen deg ijj n wemcan amqeddas.
21 Uca řqecɛet n třaxt i di tt ssnennan, ad tᵉttwarẓ, maca mařa ssenwen tt deg ict n řqecɛet n nnḥas, xenni ittxeṣṣa ad ḥekken u ad ssřiřen řqecɛet s waman.
22 Marra wi iǧan d awtem jar ikehhanen ad zzayes yecc. Aqa-tt d tamqeddast qaɛ.
23 Maca uřa d ict n tɣarṣt n ddenb i zi ttwaqeddmen idammen nnes deg Uqiḍun n Umsagar, maḥend ad iřin i weṣřaḥ di Zzawect Iqeddsen, war zzayes ittwacc ca. Ad tᵉttwacmeḍ s tmessi.’ ”