17
Ittxeṣṣa ad awyen tiɣarṣa d tɣarṣa n wecmaḍ ɣar wadaf n Uqiḍun
1 Issiweř SIDI ak-d Musa, inna:
2 “Siweř ak-d Harun d warraw nnes u ak-d marra ayt n Israil, ini asen: ‘Wa d awař i iweṣṣa SIDI, iqqar:
3 Kuř aryaz zi taddart n Israil, wenni iɣarṣen i ufunas niɣ i yezmar niɣ i iɣayḍ di řmargeḥ niɣ wenni t iɣarṣen barra i řmargeḥ,
4 maca war t yiwi d tawhibt ɣar wadaf n Uqiḍun n Umsagar, maḥend ad t-i-dd-issqarreb d tawhibt ɣar SIDI zzat n Tzeddiɣt n SIDI, ad as dd-ittwaḥseb idammen nni. Netta issizzeř idammen, s uyenni ad ittwaqes weryaz nni zi řgens nnes,
5 maḥend, xmi ɣa qeddmen ayt n Israil tiɣarṣa nsen, tinni nnumen ɣarrṣen barra deg iyyar, nitni ad tent awyen ɣar SIDI, ɣar ukehhan ɣar wadaf n Uqiḍun n Umsagar, maḥend ad tent qeddmen din am tɣarṣa n řehna i SIDI.
6 Akehhan ad izeǧeɛ idammen x uɛalṭar n SIDI ɣar wadaf n Uqiḍun n Umsagar u netta ad issbexxar tadunt am yict n řefwaḥet ittfuḥen i SIDI.
7 War ttqeddamen ɛad tiɣarṣa nsen i imuyan ijennin, inni ḍeffaren nitni am ayt n farq-ccɣeř. Ta d ict n tewṣeyyet i řebda i nitni i marra jjiřat nsen.’
8 Ad asen tinid ɛawed: ‘Kuř aryaz n ayt n Israil u n ibarraniyyen, inni iǧan di řwesṭ nsen, wenni ixsen ad issbexxar ict n tɣarṣt n wecmaḍ niɣ ca n ṭaɣarṣt i ɣares,
9 maca war tt-i-dd-yiwi ɣar wadaf n Uqiḍun n Umsagar, ḥima ad tt issewjed i SIDI, aryaz nni ad ittwaqess zi řgens nnes.’ ”
Tawṣeyyet ḥima war ttᵉtten idammen
10 “Kuř ijj zi taddart n Israil niɣ zeg ibarraniyyen, inni izeddɣen di řwesṭ nsen, wenni i ɣa iccen idammen mammec ma ggin, Necc ad qeřbeɣ udem inu x řeɛmar nni iccen idammen nni, uca ad t qeḍɛeɣ zi řwesṭ n řgens nnes.
11 Minzi řeɛmar n arrimet deg idammen uca Necc wciɣ awem idammen x uɛalṭar, maḥend ad zzaysen ittwagg weṣřaḥ i řeɛmur nwem, minzi idammen d ina i ɣa iwyen aṣřaḥ i řeɛmar.
12 X uya aqa nniɣ i ayt n Israil: Uřa d ijj zzaywem war ittett zeg idammen, uřa d abarrani i izeddɣen di řwesṭ nwem war ittett idammen.
13 Kuř ijj zeg ayt n Israil u zeg ibarraniyyen i izeddɣen di řwesṭ nwem, wenni iymaren ijj n umuddar niɣ ijj n wejḍiḍ nni izemmar ad ittwacc, ad issizzeř idammen nnes uca ad ten issduriy s ucař.
14 Minzi řeɛmar n kuř aysum d idammen nnes, aqa aten d ijjen ak-d řeɛmar nnes. S uyenni nniɣ i ayt n Israil: ‘War ttᵉttem zeg idammen n mammec ma igga weysum!’, minzi řeɛmar n marra aysum d idammen nnes. Wenni zzaysen ɣa iccen, ad ittwaqess zi řgens nnes.
15 Marra wenni i ɣa iccen zeg ict n řxecbet niɣ zeg ijj n umuddar imezzqen, ma netta zi tarwa n temmurt niɣ netta d ijj n ubarrani, ad iṣebben arruḍ nnes uca ad issird ixef nnes s waman uca ad yiři ixmej ař tameddit. Awarni aya ad yiři izdeg.
16 Mařa war issird arruḍ u war issird arrimet nnes, xenni ad yarbu řmuɛṣiyyet nnes.”