1 Issiweř SIDI ak-d Musa awarni i řmewt n tnayen n warraw n Harun, awarni řami dd-qarrben nitni zzat i wudem n SIDI uca mmuten. ◘ 2 SIDI inna i Musa: “Siweř ak-d Harun, umac, ḥima war ittidef řebda ɣar Uqeddas daxeř i uřeḥḥaf zzat i tqebbart n weṣřaḥ nni iǧan x Ttabut, ḥima war ittmetti ca, minzi Necc ttbaneɣ-dd deg ijj n useynu sennej i tqebbart n weṣřaḥ. ◘ 3 S uya ad yadef Harun ɣar Uqeddas: s ijj n ufunas, ameẓyan n tfunast, i tɣarṣt n ddenb, u s yijj n icarri i tɣarṣt n wecmaḍ. 4 Ad yarḍ tcamir iqeddsen n řeqṭen uca ssarwař n řeqṭen ad yiři x arrimet nnes. Ad ibyes taḥezzamt n řeqṭen uca ad yarekkeb areẓẓet n řeqṭen. Aqa man aya d arruḍ iqeddsen. Mařa ad ten yarḍ, ittxeṣṣa as ad issird arrimet nnes s waman d amezwaru. 5 Ad iksi zi tmesmunt n ayt n Israil tnayen n imyanen zeg iɣayḍen i tɣarṣt n ddenb d ijj n icarri i tɣarṣt n wecmaḍ. 6 Ad dd-issqarreb Harun afunas ameẓyan n tɣarṣt n wecmaḍ, wenni iǧan i yixef nnes, uca ad igg aṣřaḥ i yixef nnes u i taddart nnes. ◼  ◘ 7 Ad iksi tnayen n imyanen uca ad ten igg zzat i wudem n SIDI ɣar wadaf n Uqiḍun n Umsagar. 8 Ad inḍar Harun taqedduḥt x tnayen n imyanen: ict n tqedduḥt x SIDI u ict n tqedduḥt x iɣayḍ innufsřen, qqaren as ‘Ɛazazil’. 9 Ad dd-issqarreb Harun amyan nni x dd-tewḍa taqedduḥt i SIDI uca ad t issewjed d tɣarṣt n ddenb. 10 Amyan i x dd-tewḍa taqedduḥt n iɣayḍ innufsřen, ad t igg iddar zzat i wudem n SIDI, maḥend ad zzayes igg aṣřaḥ uca xenni ad t issekk am yiɣayḍ innufsřen ɣar řexřa.

11 Ad dd-issqarreb Harun afunas ameẓyan n tɣarṣt n ddenb, wenni tuɣa i yixef nnes, uca ad igg aṣřaḥ i yixef nnes u i aytbab n taddart nnes uca ad iɣarṣ i ufunas ameẓyan n tɣarṣt n ddenb, wenni iǧan i yixef nnes. 12 Ad iksi ɛawed ijj n řmejmar iccur s řefḥem itteḥduduqen n uɛalṭar zzat i wudem n SIDI uca ad iccur tnayen n ifassen nnes s řebxur azdad ittfuḥen, uca ad yawi marra aya daxeř i uřeḥḥaf. 13 Ad igg řebxur x tmessi zzat i wudem n SIDI, ḥima aseynu n řefwar n řebxur ad ideř taqebbart n weṣřaḥ i iǧan x Cchadet, uca war ittmetti ca. 14 Ad iksi cwayt zeg idammen n ufunas ameẓyan uca ad ten irucc s uḍaḍ nnes x wudem n tqebbart n weṣřaḥ ɣar uɣezdis n ccarq uca ɛawed ad irucc cwayt zeg idammen sebɛa n twařawin s uḍaḍ nnes zzat i tqebbart n weṣřaḥ. ◘ 15 Xenni ad iɣarṣ i umyan n tɣarṣt n ddenb, wenni iǧan i řgens uca ad yawi idammen ɣar daxeř i uřeḥḥaf uca ad igg s idammen nnes am mammec igga s idammen n ufunas ameẓyan: ad ten irucc x tqebbart n weṣřaḥ u zzat i tqebbart n weṣřaḥ. 16 Ammu i i ɣa igg aṣřaḥ x Uqeddas i řḥajjat ixemjen n ayt n Israil u i ixeṭṭan nsen i dd-ittasen ak-d marra ddnub nsen. Ammu i ɣa yegg di ssibbet n Uqiḍun n Umsagar, wenni iǧan akidsen di řwesṭ n marra timesřayin ixemjen nsen.

17 Uřa d ijj n bnadem ad yiři ɛad deg Uqiḍun n Umsagar zeg wami i ɣa yadef maḥend ad igg aṣřaḥ deg Uqeddas ař ɣa iffeɣ ɛawed. Ammu i ɣa igg aṣřaḥ i yixef nnes u i marra agraw n řgens n Israil. 18 Ad iffeɣ ař uɛalṭar i iǧan zzat i wudem n SIDI uca ad igg asřaḥ x uɛalṭar. Ad iksi cwayt zeg idammen n ufunas ameẓyan u cwayt zeg idammen n umyan uca ad issars aya x waccawen n uɛalṭar deg wenneḍ nnes. 19 Sebɛa n twařawin ad xas irucc s uḍaḍ nnes cwayt zeg idammen uca ad t issizdeg u ad t issqeddes zi řexmej n ayt n Israil. 20 Awarni řami ikemmeř aṣřaḥ n Uqeddas d Uqiḍun n Umsagar d uɛalṭar, ad dd-issqarreb xenni amyan iddaren. 21 Ad issars Harun tnayen n ifassen nnes x uzeǧif n umyan iddaren uca ammu i ɣa inɛem Harun sennej i uzeǧif n umyan x marra řmuɛṣiyyet n ayt n Israil d marra ixeṭṭan nsen i dd-yusin ak-d marra ddnub nsen uca ad ten issars x uzeǧif n umyan uca ad t issekk ɣar řexřa s ufus n ijj n weryaz wenni isswejden i ddegga. 22 Uca iɣayḍ ad yawi ak-d ixef nnes marra řmuɛṣiyyet nsen ɣar ict n jjihet texřa. Netta ad issekk amyan ɣar řexřa.

23 Xenni ad yadef Harun ɣar Uqiḍun n Umsagar uca ad ikkes arruḍ n řeqṭen nni yarḍ, umi yudef ɣar Uqeddas uca ad t yejj din. 24 Ad issird arrimet nnes s waman deg wemcan amqeddas uca ad yarḍ arruḍ nnes. Xenni ad iffeɣ, ad issewjed taɣarṣt n wecmaḍ nnes d tɣarṣt n řgens uca ad igg aṣřaḥ i yixef nnes u i řgens. 25 Ad issbexxar tadunt n tɣarṣt n ddenb x uɛalṭar.

26 Wi dd-isekken amyan am umyan innufsřen, ad iṣebben arruḍ nnes, ad issird arrimet nnes s waman. Awarni as ad yadef ɣar řmargeḥ n řɛeskar.

27 Afunas ameẓyan n tɣarṣt n ddenb d umyan n ṭɣarṣt n ddenb i zi ttwassidfen idammen nsen, maḥend ad zzaysen ittwagg aṣřaḥ deg Uqeddas, ad ten ssuffɣen barra i řmargeḥ n řɛeskar uca ad zzaysen sscemḍen iřmawen nsen d weysum nsen d umessař nsen s tmessi. ◘ 28 Wi ten ɣa isscemḍen, ad iṣebben arruḍ nnes, ad issird arrimet nnes s waman. Awarni as ad yadef ɣar řmargeḥ n řɛeskar.

29 Ta d ict n tewṣeyyet i řebda i kenniw. Deg uyur wiss sebɛa, deg wass wiss ɛecra n uyur, ad tesswaḍɛem ixef nwem uca war tteggem uřa d ict n řxedmet, niɣ wenni dd-ixeřqen di temmurt niɣ ubarrani nni izeddɣen di řwest nwem. ◘ 30 Minzi deg wass nni ad ittwagg weṣřaḥ i kenniw, maḥend ad tᵉttwassizedgem. Kenniw marra ad tᵉttwassizedgem zzat i wudem n SIDI. 31 Ass nni ad yiři d ijj wass n ssebt, arraḥet tmun i kenniw. Ad tesswaḍɛem ixef nwem, aqa-tt d ict n tewṣeyyet i řebda. 32 Akehhan, wenni dehnen u řeqqmen nitni deg wemcan n babas, maḥend ad yiři d akehhan, ad igg aṣřaḥ uca ad yarḍ arruḍ n řeqṭen, arruḍ iqeddsen. 33 Ad igg aṣřaḥ x Zzawect Iqeddsen u x Tqiḍunt n Umsagar u x uɛalṭar. Ad igg aṣřaḥ ɛawed x marra ikehhanen u x marra řgens n wegraw. 34 Ta d ict n tewṣeyyet i řebda i kenniw, ḥima ad ittwagg weṣřaḥ x marra ayt n Israil i marra ddnub nsen, ict n twařa deg useggʷas.” Uca igga am mammec iweṣṣa SIDI i Musa. ◘