1 Issiweř SIDI ak-d Musa, inna:

2 “Wa d azerf n bu-řbarṣ i wass n usizdeg nnes. Ittxeṣṣa ad t nedhen ɣar ukehhan, ◘ 3 uca ad iffeɣ ukehhan ɣar barra i řmargeḥ n řɛeskar. Xmi ɣares i ɣa ixzar ukehhan uca iẓra aqa iggenfa wuḍun n řbarṣ n bu-řbarṣ, 4 ad yumur ukehhan, maḥend ad ksin i wenni i ɣa ittwassizedgen tnayen n ijḍaḍ iddaren izdigen, uřa d akeccuḍ n tcejjart n tengelt, d uzeggʷaɣ iḥedqen, d tɛelǧet. ◼ 5 Ad yumur ukehhan maḥend ad ɣarṣen i yijj n wejḍiḍ deg ict n řqecɛet n třaxt, sennej i waman ittazzřen. 6 Xenni ad iksi ajḍiḍ iddaren d ukeccuḍ n tcejjart n tengelt d uzeggʷaɣ iḥedqen d tɛelǧet uca ad ten issuf ak-d wejḍiḍ iddaren deg idammen n wejḍiḍ i ittwaɣarṣen sennej i waman ittazzřen. 7 Ad irucc sebɛa n twařawin x wenni ittwassizedgen zi řbarṣ. Xenni ad t ibarreḥ d amezdag uca ad yarxu i wejḍiḍ iddaren maḥend ad iḍew sennej i wudem n yeyyar. 8 Uca wenni ittwassizedgen ad iṣebben arruḍ nnes uca ad iḥeff marra acuwwaf nnes, ad issird ixef nnes s waman. Xenni ad yiři izdeg. Awarni as ad yadef ɣar řmargeḥ n řɛeskar uca ad izdeɣ barra i uqiḍun nnes ɛad sebɛa n wussan.

9 Deg wass wiss sebɛa ad iḥeff marra acuwwaf n uzeǧif nnes d tmart nnes d temmiwin n tiṭṭawin nnes, wah, ad iḥeff marra acuwwaf nnes, ad iṣebben arruḍ nnes uca ad issird arrimet nnes s waman, xenni ad yiři izdeg.

10 Deg wass wiss tmenya ad iksi tnayen n izmaren kemmřen d icten texsi icnan qaɛ n ijjen useggʷas ak-d třata zi ɛecra n ijjen ifa n waren azdad am tewhibt n řɣiǧet ixeǧḍen s zzect, u ɛawed ijjen ulux n zzect. 11 Akehhan, wenni t issizedgen, ad yarr aryaz nni ittxeṣṣa ad ittwassizdeg, ak-d marra aya zzat i wudem n SIDI ɣar wadaf n Uqiḍun n Umsagar. 12 Ad iksi ukehhan izmar nni uca ad t-i-dd-issqarreb am tɣarṣt n umarwas ak-d ulux n zzect, uca ad t issenhezz am tewhibt n wenhezzi zzat i wudem n SIDI. 13 Xenni ad iɣarṣ i yezmar nni deg wemcan mani ɣarrṣen taɣarṣt n ddenb d tɣarṣt n wecmaḍ, deg wemcan amqeddas. Minzi taɣarṣt n umarwas, am tɣarṣt n ddenb, i ukehhan i teǧa, aqa-tt d tamqeddast qaɛ. ◘ 14 Ad iksi ukehhan cwayt zeg idammen n tɣarṣt n umarwas uca akehhan ad ten igg x iɣes n umezzuɣ afusi n wenni i ɣa ittwassizedgen uřa x yimez n ufus nnes afusi u x yimez n uḍar nnes afusi. 15 Amenni i ɣa iksi ukehhan ca zeg ulux n zzect uca ad tt inɣeř x třeqqa n ufus nnes azeřmaḍ. 16 Ad issuf ukehhan aḍaḍ nnes afusi s zzect nni ɣares deg ufus nnes azeřmaḍ uca ammu i ɣa irucc s uḍaḍ nnes cwayt zi zzect sebɛa n twařawin zzat i wudem n SIDI. 17 Uca min iqqimen zi zzect nni ɣares deg ufus nnes, ad tt igg ukehhan x iɣes n umezzuɣ afusi n wenni i ɣa ittwassizedgen, uřa x yimez n ufus nnes afusi u x yimez n uḍar nnes afusi, tiwa n idammen n tɣarṣt n umarwas i xasen igga qbeř. 18 Min iqqimen n zzect nni iǧan ɣar ukehhan di třeqqa n ufus nnes, ad t inɣeř x uzeǧif n wenni i ɣa ittwassizedgen uca ammu i t ɣa isseṣřeḥ ukehhan zzat i wudem n SIDI. ◼ 19 Ad issewjed ukehhan xenni taɣarṣt n ddenb uca ad isseṣřeḥ wenni ittwassizedgen zi řexmej nnes. Awarni as ad iɣarṣ i tɣarṣt n wecmaḍ. 20 Ad issbexxar ukehhan taɣarṣt n wecmaḍ d tewhibt n řɣiǧet x uɛalṭar. Ammu i t ɣa isseṣřeḥ ukehhan uca ad yiři izdeg.

21 Mařa netta iẓřeḍ uca afus nnes war t issiweḍ, xenni ad iksi ijj n yizmar am tɣarṣt n umarwas maḥend ad xas igg aṣřaḥ am igga izmar d tewhibt n wenhezzi. Ad iksi řa d ict n teɛcart n ijj n ifa n waren azdad ixeǧḍen s zzect am tewhibt n řɣiǧet, uřa d ijj n ulux n zzect 22 d tnayen n tejlilliḥin niɣ tnayen n idbiren imeẓyanin, anect izemmar ufus nnes ad issiweḍ. Ict ad tiři d taɣarṣt n ddenb u tenneɣni ad tiři d taɣarṣt n wecmaḍ. 23 Deg wass wiss tmenya ad ten yawi di ṭṭweɛ n usizdeg nnes ɣar ukehhan, ɣar wadaf n Uqiḍun n Umsagar, zzat i wudem n SIDI. 24 Ad iksi ukehhan izmar n tɣarṣt n umarwas d ulux nni n zzect uca akehhan ad ten issenhezz am tewhibt n wenhezzi zzat i wudem n SIDI. 25 Xenni ad iɣarṣ i izmar n tɣarṣt n umarwas uca akehhan ad iksi cwayt zeg idammen n tɣarṣt n umarwas, ad ten yarr x iɣes n umezzuɣ afusi n wenni ittwassizedgen uřa x yimez n ufus nnes afusi u x yimez n uḍar nnes afusi. 26 Ad ifarreɣ ukehhan ca n zzect x třeqqa n ufus aẓeřmaḍ n yixef nnes. 27 S uḍaḍ nnes afusi ad irucc ukehhan s zzect nni ɣares deg ufus nnes aẓeřmaḍ sebɛa n twařawin zzat i wudem n SIDI. 28 Akehhan ad igg cwayt zi zzect nni ɣares iǧan deg ufus nnes x iɣes n umezzuɣ afusi n wenni ittwassizedgen uřa x yimez n ufus nnes afusi u x yimez n uḍar nnes afusi, deg wemcan nnit mani ttwaggen idammen n tɣarṣṭ n umarwas qbeř. 29 Min iqqimen zi zzect nni ɣar ukehhan deg ufus nnes, ad t igg x uzeǧif n wenni ittwassizedgen, maḥend ad xas igg aṣřaḥ zzat i wudem n SIDI. 30 Xenni ad issewjed ijj zi tnayen n tejlilliḥin niɣ zeg idbiren imeẓyanen, anect umi izemmar ufus nnes ad issiweḍ. 31 Zi min d as ɣa issiweḍ ufus nnes, ad yiři ijj i tɣarṣt n ddenb u wenneɣni i tɣarṣt n wecmaḍ, sennej i tewhibt n řɣiǧet. Akehhan ad igg aṣřaḥ x wenni ittwassizedgen zzat i wudem n SIDI. 32 Wa d azerf i wenni di iǧa wuḍun n řbarṣ uca afus nnes war izemmar ad issiweḍ i usizdeg nnes.”

33 Issiweř SIDI ak-d Musa d Harun, inna:

34 “Xmi ɣa tadfem ɣar temmurt n Kenɛan, tenni d awem ɣa wceɣ d agřa, uca mařa ggiɣ Necc uḍun n řbarṣ x ca n taddart n temmurt nni ɣarwem d agřa, 35 ad dd-yas xenni wenni ɣar teǧa taddart nni, ad ixebbar akehhan, ad yini: ‘Ittɣiř ayi-dd axmi din ca n wuḍun di taddart.’ 36 Xenni akehhan ad issekk, maḥend ad ssexwan taddart qbeř i dd ɣa yas ukehhan s yixef nnes, ḥima ad ixemm uḍun, ḥima war ittwassexmij marra min iǧan di taddart. Awarni as ad dd-yas ukehhan, maḥend ad ixemmem taddart. 37 Mařa ixzar ɣar uḍun uca iẓra aqa uḍun n řeḥyuḍ n taddart banen-dd dayes iḥufar zzizwen niɣ zewɣen, uǧɣen x wudem n řḥiḍ, 38 xenni ad iffeɣ ukehhan zi taddart nni zi wadaf n taddart uca ad iqqen taddart sebɛa n wussan. 39 Deg wass wiss sebɛa ad dd-idweř ukehhan uca mařa iẓra aqa uḍun ibezzeɛ x řeḥyuḍ n taddart, 40 xenni ad iweṣṣa ukehhan, maḥend ad kksen iẓra mani iřseq wuḍun u ad ten nḍaren deg ijj n wemcan ixemjen barra i tendint. 41 Ad yejj ad qeccaren daxeř n taddart ɣar marra iɣezdisen nnes, uca ad zeǧɛen abeǧaɛ i qeccaren barra i tendint deg ijj n wemcan d amexmuj. 42 Xenni ad ksin iẓra nneɣni, ad ten ggen deg wemcan n iẓra nni iheřcen uca ad ksin abeǧaɛ nneɣni maḥend ad zzayes ḥenncen taddart. 43 Mařa uḍun idweř-dd uca issfuffi ɛawed di taddart awarni řami kksen iẓra u qeccaren taddart awarni řami tt ḥenncen, 44 xenni ad dd-yas ukehhan ad tt iqeǧeb. Mařa iẓra, aqa uḍun ibezzeɛ di taddart, xenni aqa din ijj n řbarṣ iqesḥen di taddart. Aqa-tt texmej. 45 Ad hedmen taddart, iẓra nnes d tḥenya nnes d marra tarrist n taddart uca ad ssiggʷejen aya barra i tendint ɣar ijj n wemcan d amexmuj. 46 Wi ɣa yadfen ɣar taddart deg ijj n wass zeg wussan awarni řami bellɛen taddart, netta ad yiři ixmej ař tameddit. 47 Wi ɣa iṭṭṣen di taddart, ad iṣebben arruḍ nnes u wi ɣa iccen di taddart, ad issird arruḍ nnes. 48 Mařa yudef ukehhan, maḥend ad tt iqeǧeb uca iẓra aqa uḍun war imɣir di taddart, awarni řami ḥenncen taddart, xenni ad ibarreḥ ukehhan belli taddart tezdeg, minzi uḍun ittwassgenfa. 49 Ad iksi tnayen n ijḍaḍ d ukeccuḍ n tcejjart n tengelt d uzeggʷaɣ iḥedqen d tɛelǧet, maḥend ad zzaysen ikkes ddenb x taddart. ◼ 50 Ad iɣarṣ i yijj n wejḍiḍ deg ict n řqecɛet n třaxt, sennej i waman iddaren. 51 Ad iksi akeccuḍ n tcejjart n tengelt d tɛelǧet d uzeggʷaɣ iḥedqen uřa d ajḍiḍ iddaren uca ad issuf marra aya deg idammen n wejḍiḍ ittwaɣarṣen u deg waman iddaren uca ad irucc taddart sebɛa n twařawin. 52 Ammu i ɣa ikkes ddenb x taddart s idammen n wejḍiḍ, s waman iddaren d wejḍiḍ iddaren d ukeccuḍ n tcejjart n tengelt d tɛelǧet d uzeggʷaɣ iḥedqen. 53 Ad yejj ajḍiḍ iddaren ad iḍwa barra i tendint sennej i wudem n yeyyar. Ammu i ɣa igg aṣřaḥ x taddart nni uca ad tiři tizdig.”

54 “Wa d azerf x marra řehřacat n řbarṣ u x tfuri n yiřem, 55 x řbarṣ n arruḍ u n taddart, 56 x ijj n uɛebbuz, x ict n tḥebbuct u x ijj n wengaz iccemřeř n teřmect. 57 Azerf-a aqa i tɣuri deg wass i di ɣa yiři ḥed ixmej niɣ deg wass i di ɣa yiři ḥed izdeg. Wa d azerf n řbarṣ.”