13
Tiweṣṣa zi jjihet n řehřac n řbarṣ
1 Issiweř SIDI ak-d Musa d Harun, inna:
2 “Mařa ijj n bnadem ɣares di teřmect n arrimet nnes aɛebbuz niɣ ict n tḥebbuct niɣ ijj n wengaz iccemřeř, uca wanita izemmar ad idweř d uḍun n řbarṣ di teřmect n arrimet nnes, ad t awyen ɣar Harun, akehhan, niɣ ɣar yijjen zeg warraw nnes, ɣar ikehhanen.
3 Akehhan ad ixzar ɣar wuḍun di teřmect n arrimet nnes uca mařa iẓra aqa iẓuṭṭan deg wemcan n wuḍun dewřen d icemřařen uca iban wuḍun ɛad yuǧeɣ x teřmect n arrimet nnes, aqa xenni d uḍun n řbarṣ. Xmi t ɣa iẓar ukehhan, ad t ibarreḥ d amexmuj.
4 Maca mařa angaz iccemřeř di teřmect n arrimet nnes d acemřař u war yuǧiɣ x teřmect u iẓeṭṭan war dwiřen d icemřařen, xenni ad ibelleɛ ukehhan x wenni di iǧa uḍun nni sebɛa n wussan.
5 Mařa iẓra i-t ukehhan deg wass wiss sebɛa uca iẓra aqa uḍun amenni iqqim, war imɣir wuḍun di teřmect, xenni ad t ibelleɛ ukehhan ɛawed sebɛa n wussan nneɣni.
6 Deg wass wiss sebɛa ad t iẓar ukehhan ɛawed uca mařa iban aqa uḍun yarsa uca war imɣir ɛad ktar x teřmect, xenni akehhan ad t ibarreḥ d amezdag. Tuɣa-tt d ict n tfuriy. Ad issird arruḍ nnes uca ad yiři izdig.
7 Maca mařa imɣar wuḍun aṭṭas x teřmect awarni řami t iẓra ukehhan di ṭṭweɛ n usizdeg nnes, ittxeṣṣa ad isscen ixef nnes i ukehhan twařa nneɣni.
8 Mařa iẓra ukehhan, aqa řehřac imɣar x teřmect, ad t ibarreḥ d amexmuj. Aqa-t d řehřac n řbarṣ i iǧa.
9 Xmi uḍun n řbarṣ aqa-t deg ijj n bnadem, ad t awyen ɣar ukehhan.
10 Mařa iẓra ukehhan, aqa iban ijj n uɛebbuz d acemřař di teřmect, u iẓeṭṭan dewřen d icemřařen u iban-dd weysum iddar deg uɛebbuz,
11 aqa-t d řbars aqdim di teřmect n arrimet nnes uca akehhan ad zzayes ibarreḥ d amexmuj. War xas ittbelliɛ ca, minzi netta aqa ixmej.
12 Mařa yuyur řbarṣ x tiřmect marra uca idřa řbarṣ marra tiřmect n wenni ɣar iǧa uḍun zeg uzeǧif nnes ař iḍaren nnes, ař mani izemmar ad iẓar ukehhan s tiṭṭawin nnes,
13 uca iẓra i-t ukehhan, iẓra řbars idřa marra arrimet nnes, xenni netta ad ibarreḥ d amezdag i wenni di iǧa wuḍun. Tiřmect aqa-tt d tacemřač qaɛ. Netta aqa izdig.
14 Maca deg wass mani dayes i ɣa dd-iban weysum iddar, ad yiři ixmej.
15 Mařa iẓra ukehhan aysum nni iddar, ad t ibarreḥ d amexmuj. Aysum iddaren ixmej, aqa-t d řehřac n řbarṣ.
16 Maca mařa ibeddeř weysum iddaren u idweř d acemřař, ittxeṣṣa as ad dd-yas ɣar ukehhan.
17 Mařa iẓra i-t ukehhan uca aqa amcan n uḍun idweř d acemřař, ad ibarreḥ ukehhan wenni di iǧa řehřac d amezdag. Netta aqa izdig.
18 Mařa din x teřmect n weysum ict n tḥebbuct u tᵉttwassgenfa tanita,
19 maca deg wemcan n tḥebbuct idweř d ijj n uɛebbuz imřeř niɣ d ijj n wengaz iccemřeř, acemřař iruḥ ɣar tezweɣ, xenni ad iẓar ukehhan man aya.
20 Xmi ɣares i ɣa ixzar ukehhan uca iẓra aqa-t sadu teřmect uca iẓeṭṭan nnes d icemřařen, xenni akehhan ad t ibarreḥ d amexmuj, aqa-t d uḍun n řbarṣ wenni yuyuren s tḥebbuct.
21 Maca mařa iẓra i-t ukehhan uca war dayes yufi uřa d ijj n uẓeṭṭu d acemřař uca war idwiř yuǧeɣ x teřmect, maca idweř yarsa, xenni ad xas ibelleɛ ukehhan sebɛa n wussan.
22 Mařa tuyur x teřmect marra, xenni akehhan ad t ibarreḥ d amexmuj. Aqa-t d uḍun n řbarṣ.
23 Maca mařa angaz iccemřeř n teřmect iqqim deg wemcan nnes, war imɣir ca, aqa-t d ccamet n tḥebbuct uca akehhan ad t ibarreḥ d amezdag.
24 Niɣ mařa idweř di teřmect n arrimet ijj n uyezzim n wecmaḍ uca aysum iddaren n uyezzim n wecmaḍ idweř d ijj n wengaz iccemřeř, acemřař iruḥ ɣar tezweɣ niɣ d acemřař,
25 uca iẓra ukehhan man aya, uca xzar, iẓeṭṭan i iǧan deg wengaz iccemřeř aqa dewřen d icemřařen, uca iban aqa amcan n wengaz yuǧeɣ di teřmect, aqa-t d řbarṣ nni dd-iffɣen zeg uyezzim n wecmaḍ. Akehhan ad t ibarreḥ d amexmuj. Aqa-t d uḍun n řbarṣ.
26 Maca mařa akehhan iẓra man aya uca war ittwiři iẓeṭṭan icemřařen deg wengaz iccemřeř uca iẓra angaz war yuǧiɣ x teřmect uca yarsa, xenni ad xas ibelleɛ ukehhan sebɛa n wussan.
27 Deg wass wiss sebɛa ad t iẓar ukehhan uca mařa imɣar wengaz ktar x teřmect, akehhan ad t ibarreḥ d amexmuj. Aqa-t d uḍun n řbarṣ.
28 Maca mařa angaz iccemřeř iqqim deg wemcan nnes, war imɣir x teřmect uca yarsa, aqa-t d aɛebbuz n wecmaḍ. Akehhan ad t ibarreḥ d amezdag, minzi aqa-tt d ccamet n wecmaḍ.
29 Mařa ijj n weryaz niɣ ict n temɣart dayes uḍun deg uzeǧif niɣ di tmart,
30 uca ixzar ukehhan ɣar uḍun, u xzar, aqa ittban yuǧeɣ di teřmect uca dayes iẓeṭṭan iwarɣen d izdaden, xenni akehhan ad t ibarreḥ d amexmuj. Aqa-tt d tfuri n yiřem, aqa-t d řbarṣ n uzeǧif niɣ n tmart.
31 Maca mařa iẓra ukehhan uḍun n tfuri n yiřem, iẓra aqa war yuǧiɣ di teřmect uca war dayes iẓeṭṭan ibarcanen, xenni ad xas ibelleɛ ukehhan x wenni di iǧa wuḍun n tfuri n yiřem i yijj n řmijař n sebɛa n wussan.
32 Ad iẓar ukehhan uḍun deg wass wiss sebɛa uca mařa iẓra, aqa tfuri n yiřem war temɣir, war dayes yufi iẓeṭṭan iwarɣen uca tfuri n yiřem war tuǧiɣ x teřmect,
33 xenni netta ad iḥeff i yixef nnes, maca amcan n tfuri n yiřem war t ittḥeffi ca uca akehhan ad ibelleɛ x wenni di iǧa tfuri n yiřem ɛad ict n twařa nneɣni i yijj n řmijař n sebɛa n wussan.
34 Deg wass wiss sebɛa ad iẓar ukehhan amcan n tfuri n yiřem. Mařa iẓra aqa tfuri n yiřem war temɣir ca, war tuǧiɣ x teřmect, xenni akehhan ad t ibarreh d amezdag. Ad issird arruḍ nnes uca ad yiři izdig.
35 Maca mařa tfuri n yiřem temɣar aṭṭas x teřmect awarni i usizdeg nnes,
36 uca iẓra i-t ukehhan uca iẓra tfuri n yiřem temɣar x teřmect, xenni war yarezzu ukehhan x iẓeṭṭan iwarɣen ɛad, netta aqa ixmej.
37 Maca mařa tfuri n yiřem aqa tban-dd tbedd di tiṭṭawin nnes, uca ffɣen-dd zzayes iẓeṭṭan ibarcanen, xenni aqa tᵉggenfa tfuri n yiřem uca netta aqa izdeg. Akehhan ad t ibarreḥ d amezdag.
38 Mařa banen-dd imucan ccemřeřen, iccemřeřen d icemřařen, di teřmect n ijj n weryaz niɣ n ict n temɣart,
39 uca iẓra ukehhan man aya uca iẓra aqa di teřmect n arrimet banen-dd imucan arsan, icemřařen, xenni aqa-tt d ict n tfuri n teřmect, netta aqa izdeg.
40 Mařa iwḍa ucuwwaf n uzeǧif n ijj n weryaz, aqa d aqeccar, xenni netta aqa izdig.
41 Mařa tanyart n ca n yijj ad tedweř tařeqqaɣt, aqa tanyart nnes tqeccar waha, netta aqa izdig.
42 Maca mařa din ijj n uḍun imřeř iruḥ ɣar tezweɣ x uzeǧif aqeccar niɣ x tenyart taqeccart, aqa-t d řbarṣ nni dd-iffɣen x uzeǧif nnes aqeccar niɣ x tenyart nnes taqeccart.
43 Mařa iẓra i-t ukehhan uca iẓra aqa aɛebbuz n wuḍun imřeř, iruḥ ɣar tezweɣ x uzeǧif nnes aqeccar niɣ x tenyart nnes taqeccart, iban-dd am řbarṣ n teřmect n arrimet,
44 xenni aqa aryaz d bu-řbarṣ i iǧa, netta aqa ixmej. Akehhan ad t ibarreḥ d amexmuj, uḍun aqa-t x uzeǧif nnes.”
45 “Ittxeṣṣa ad ittwacarreg warruḍ n bu-řbarṣ i di iǧa wuḍun uca ad iḍřeq i ucuwwaf x uzeǧif nnes, ad iřeḥḥef acřaɣem ɣar uyencic, ad iřaɣa: ‘Amexmuj! Amexmuj!’
46 Marra ussan i dayes i ɣa yiři wuḍun, ad yiři ixmej. Netta d amexmuj. Netta ad izdeɣ weḥḥdes uca tzeddiɣt nnes ad tiři barra i řmargeḥ n řɛeskar.”
47 “Mařa uḍun n řbarṣ deg ijj n warruḍ, deg ijj n warruḍ n taḍuft niɣ deg ijj n warruḍ n řeqṭen,
48 niɣ deg wecḍaḍ ixeyyḍen niɣ deg ufiřu immuden, niɣ n řeqṭen niɣ n taḍuft, niɣ ɣar yiřem, niɣ ɣar mammec ma řqecɛet n yiřem,
49 u ticti ittwawten deg warruḍ niɣ deg yiřem, niɣ ɣar wecḍaḍ ixeyyḍen niɣ ɣar ufiřu immuden, niɣ di mammec ma n řqecɛet nni tteggen s yiřem, tezzizu niɣ tezweɣ, aqa-t d uḍun n řbarṣ. Ad ittwasscen aya i ukehhan.
50 Akehhan ad ixzar ɣar wemcan n uḍun uca min iḍnen ad t ibelleɛ sebɛa n wussan.
51 Deg wass wiss sebɛa ad ixzar ɣar wuḍun. Mařa imɣar uḍun deg warruḍ, niɣ ɣar wecḍaḍ ixeyyḍen niɣ ɣar ufiřu immuden, niɣ deg yiřem n mammec ma řqecɛet nni tteggen s yiřem, aqa uḍun d řbars iqesḥen i yeǧa, aqa ixmej.
52 Ad issecmeḍ arruḍ niɣ afiřu d azirar niɣ afiřu immuden, niɣ n taḍuft niɣ n řeqṭen i iǧa, niɣ mammec ma řqecɛet nni tteggen s yiřem i dayes tuɣa uḍun, minzi aqa-t d řbarṣ iqesḥen. Ittxeṣṣa ad ittwassecmeḍ s tmessi.
53 Maca mařa iẓra ukehhan man aya uca aqa uḍun war imɣir ca deg warruḍ, niɣ deg wecḍaḍ ixeyyḍen niɣ deg ufiřu immuden, niɣ di mammec ma řqecɛet nni tteggen s yiřem,
54 xenni ad yumur ukehhan maḥend ad ssirden min di yeǧa wuḍun, uca awarni i man aya ad xas ibelleɛ twařa nneɣni řqedd n sebɛa n wussan.
55 Mařa iẓra ukehhan uḍun awarni i usird, uca iẓra uḍun war ibeddiř ca uca uḍun war imɣir, aqa arruḍ nni ixmej. Ittxeṣṣa ad t tessecmeḍed s tmessi. Aqa uḍun idweř yuǧeɣ ittᵉtt ɣar ḍeffar niɣ ɣar zzat.
56 Maca mařa iẓra ukehhan man aya uca iẓra belli uḍun yarsa awarni i usird, xenni ad t iqess zeg warruḍ, niɣ zeg yiřem, niɣ zeg wecḍaḍ ixeyyḍen niɣ zeg ufiřu immuden.
57 Maca mařa iban wuḍun twařa nneɣni deg warruḍ, niɣ ɣar wecḍaḍ ixeyyḍen niɣ ɣar ufiřu immuden, niɣ di mammec ma řqecɛet nni tteggen s yiřem, aqa idduqqez řbarṣ. Ittxeṣṣa ad tessecmeḍ s tmessi min dayes i iǧan uḍun.
58 Arruḍ, niɣ afiřu d azirar niɣ afiřu immuden niɣ mammec ma řqecɛet nni tteggen s yiřem, wenni tessirded uca iruḥ xas wuḍun, ad t tessirded twařa nneɣni uca xenni ad yiři izdig.”
59 Wa d azerf n wuḍun n řbarṣ n warruḍ n taḍuft niɣ n řeqṭen, niɣ n wecḍaḍ ixeyyḍen niɣ n ufiřu immuden, niɣ n mammec ma řqecɛet nni tteggen s yiřem, maḥend xenni ad barrḥen s tezdeg nnes niɣ s řexmej nnes.