9
Taḥraymect n ayt n Jibɛun
1 Umi marra ijeǧiden, inni yeǧan x ujemmaḍ n L’Urdun ṣrin x man aya - ijeǧiden x Temmurt n Idurar, di Temmurt Iwaṭan u ɣar marra tma n Řebḥar Ameqqran ař qibač i idurar n Lubnan: Iḥittiyyen d Imuriyyen d ayt n Kenɛan d Ifariziyyen d Iḥiwiyyen d Iyabusiyyen -
2 munen nitni ḥima ad mmenɣen ak-d Yacuwa u ak-d Israil x ijj n array.
3 Umi imezdaɣ n Jibɛun sřin min tuɣa igga Yacuwa ak-d Ariḥa d Ɛay,
4 ggin t s teḥraymect. Nitni uyuren deg webrid uca ggin ixef nsen d imsekkan. Iwyen tixuncay tibuřay x iɣyař nsen, tixuncay n yiřem tibuřay ttwacarrgent u twaxeyyḍent ɛawed i binu.
5 Qqnen ɛawed tisiřa d řbari, ittwaḍarrfen x iḍaren nsen u yarḍen arruḍ abuřay, u marra aɣrum n řeɛweč nsen tuɣa yuẓeɣ ittfruruy.
6 Uyuren ammu ɣar Yacuwa di řmargeḥ n řɛeskar n Jiljal, nnan as i netta u i ayt n Israil: “Neccin nusa-dd zeg ict n temmurt tiggʷej. Řexxu xenni, ggem ijj n řɛahd akidneɣ.”
7 Arrin-dd iryazen n Israil x Iḥiwiyyen: “Ad taɣ kenniw tzeddɣem jar aneɣ. Mammec nzemmar ad kidwem negg ijj n řɛahd?”
8 Nitni maca nnan i Yacuwa: “Neccin d imsexxaren nnec.” Xenni inna asen Yacuwa: “Min teɛnam kenniw d manis i dd-tusim?”
9 Nitni arrin-dd xas: “Imsexxaren nnec usin-dd zeg ict n temmurt tiggʷej aṭṭas di ṭṭweɛ n Yisem n SIDI, AREBBI nwem. Minzi neccin nesřa xas řexbar u x marra min igga di Miṣra,
10 d marra min igga Netta ak-d ijeǧiden n ayt n Imuriyyen inni yeǧan aɣirin i L’Urdun, Siḥun, ajeǧid n Ḥacbun, d Ɛuj, ajeǧid n Bacan nni tuɣa izeddeɣ di Ɛactarut.
11 Uca ssiwřen akidneɣ imɣaren nneɣ d marra imezdaɣ n temmurt, nnan: ‘Ṭṭfem řeɛweč deg ufus nwem i webrid, uyurem i umsagar akidsen uca ad asen tinim: Neccin d imsexxaren nwem.’ Xenni řexxu, ggem akidneɣ ijj n řɛahd.
12 Aɣrum-a nneɣ da tuɣa ɛad iḥma umi t-i-dd akidneɣ neksi zi tudrin nneɣ d řeɛweč deg wass ařami ɣarwem dd-neṭṭef abrid. Řexxu aqa-t yuẓeɣ idweř ittfruruy.
13 Uřa d tixuncay n yiřem n binu nni neccur, tuɣa atent n jdid, maca xzarem, řexxu feǧqent. Aqa d arruḍ nneɣ d sandaliyat nneɣ ḥfant s webrid i iggʷejen s waṭṭas.”
14 Xenni ksin iryazen n Israil zi řeɛweč. War ksin ccwar zeg uqemmum n SIDI.
15 Igga Yacuwa akidsen řehna u igga akidsen ɛawed ijj n řɛahd, ad ten yejj ad ddaren uca uřa d řḥukkam n tmesmunt jjuǧen asen.
16 Awarni třata n wussan awarni i umi tuɣa i d asen wcin řɛahd, sřan nitni belli aqa d jjiran nsen, u aqa zeddɣen di řwesṭ nsen.
17 Minzi ayt n Israil kksen iqiḍan nsen uca iwḍen ɣar tneddam nsen deg wass wiss třata. Tuɣa tineddam nsen Jibɛun d Kafira d Biɛrut d Qaryat-Yaɛarim.
18 Ayt n Israil war ten nɣin ca, minzi řḥukkam n tmesmunt tuɣa jjuǧen asen aya ɣar SIDI, AREBBI n Israil. S uyenni i teqqim marra tmesmunt tmuɣmuɣ x řḥukkam.
19 Xenni nnan marra řḥukkam n tmesmunt: “Neccin nejjuǧ asen aya ɣar SIDI, AREBBI n Israil. S uyenni řexxu war nzemmar ad ten nḥada.
20 Ittxeṣṣa ad nkemmeř tajaǧit-a u ad ten nejj ad ddaren, maḥend war xaneɣ dd-iweṭṭi uduqqez n weɣḍab di ssibbet n tjaǧit nni d asen negga.
21 Řḥukkam nnan asen: “Nitni ad qqimen ddaren uca ad dewřen d inezdamen d inuyam i marra tamesmunt, am mammec d asen t nnan řḥukkam.”
22 Iřaɣa i-ten Yacuwa, inna: “Mayemmi xaneɣ tcemtem, tennam: ‘Neccin nzeddeɣ ɣar řaggʷaj s waṭṭas xawem!’, waxxa kenniw tzeddɣem di řwest n temmurt nneɣ?
23 Řexxu xenni, kenniw tᵉttwaneɛřem. War zzaywem ittwakkes ad tiřim d imsexxaren, inezdamen d inuyam i Taddart n AREBBI inu.”
24 Nitni arrin-dd x Yacuwa, nnan: “I imsexxaren nnec ittwanna nican belli SIDI, AREBBI nwem, yumur amsexxar nnes Musa, aqa Netta ad awem iwca marra tammurt uca ad ihellek marra imezdaɣ n temmurt zzat i tiṭṭawin nwem. S uya tuɣa neggʷed aṭṭas x tudart nneɣ zzat i wudem nwem. S uyenni i negga neccin aya.
25 Řexxu xenni, xzar, aqa aneɣ deg ufus nnec. Egg akidneɣ min tᵉttwařid mliḥ d min iǧan nican di tiṭṭawin nnec ḥima ad zzayneɣ tegged.”
26 Ammu i zzaysen igga uca netta ifekk i-ten zeg ufus n ayt n Israil, ařami nitni war ten nɣin ca.
27 Deg wass nni simant nnes igga i-ten Yacuwa d inezdamen d inuyam i tmesmunt u i uɛalṭar n SIDI, ař ass-a, deg wemcan nni ɣa yixḍar Netta.