10
Amenɣi ɣar Jibɛun
1 Imsar, umi Aduni-Ṣadaq, ajeǧid n Urcalim isřa, aqa Yacuwa tuɣa iṭṭef Ɛay, iḥarrem i-tt qaɛ uca aqa igga ak-d Ɛay d ajeǧid nnes am tuɣa igga ak-d Ariḥa u ak-d ujeǧid nnes u aqa imezdaɣ n Jibɛun ggin řehna ak-d ayt n Israil u zeddɣen di řwesṭ nsen,
2 aqa nitni ggʷeden aṭṭas, minzi Jibɛun tuɣa d ict n tendint temɣar, umi tt tuɣa am yicten zi jar tneddam n tgeldit. Tuɣa-tt temɣar x Ɛay u marra iryazen nnes tuɣa aten d ayt n bu-teɣruḍt.
3 Issekk Aduni-Zedek, ajeǧid n Urcalim, imsekkan ɣar Huham, ajeǧid n Ḥabrun, ɣar Fir’am, ajeǧid n Yarmut, ɣar Yafiɛ, ajeǧid n Laxic u ɣar Dabir, ajeǧid n Ɛajlun, inna:
4 “Geɛɛdem-dd ɣari u tewcem ayi afus. Ejj aneɣ ad newwet Jibɛun, minzi tegga řehna ak-d Yacuwa u ak-d ayt n Israil.”
5 Nitni munen uca geɛɛden xemsa n ijeǧiden n Imuriyyen: ajeǧid n Urcalim, ajeǧid n Ḥabrun, ajeǧid n Yarmut, ajeǧid n Ɛajlun, nitni d marra řɛeskar nsen uca nnḍen i Jibɛun uca kkaren mmenɣen akides.
6 Ssekken iryazen n Jibɛun ireqqasen i Yacuwa, ɣar řmargeḥ n řɛeskar di Jiljal, nnan: “War semmeḥ ifassen nnec deg imsexxaren nnec, as-dd deɣya ɣarneɣ. Senjem aneɣ d tewced aneɣ afus, minzi marra ijeǧiden n ayt n Imuriyyen, inni i izeddɣen deg idurar, aqa munen xaneɣ.”
7 Xenni igeɛɛed-dd Yacuwa zi Jiljal, netta d marra řgens n řɛeskar akides d marra ayt n bu-teɣruḍt imeḥḍen.
8 Minzi SIDI inna i Yacuwa “War tteggʷed ca zzaysen, minzi wciɣ ten deg ufus nnec. Uřa d ijj zzaysen war izemmar ad ibedd zzat i wudem nnec.”
9 Yacuwa ihwa-dd xasen s řɣefřet. Igeɛɛaden-dd zi Jiljal ǧiřet am tekmeř.
10 SIDI issnexřeɛ i-ten zzat i wudem n Israil uca igga asen ijj n weɣḍar d ameqqran ɣar Jibɛun uca netta iḍfar i-ten x webrid ittgeɛɛaden ɣar Bayt-Ḥurun uca iwwet i-ten ař ṭṭarf n Ɛaziqqa d Maqida.
11 Imsar umi nitni arewřen zzat i wudem n Israil deg uhekkwu ɣar Bayt-Ḥurun, aqa SIDI inḍar xasen iẓra d imeqqranen zeg ujenna ař Ɛaziqqa uca mmuten. Inni immuten s ibquqen n tebruri tuɣa aten ktar zeg inni ittwanɣen s ssif s ifassen n ayt n Israil.
12 Xenni issiweř Yacuwa ak-d SIDI, deg wass umi isellem SIDI Imuriyyen i ayt n Israil, inna zzat i tiṭṭawin n Israiliyyen: “A tafuct, bedd ɣar Jibɛun, i cek a, ayur, ɣar teɣzurt n Ayalun”
13 Uca tafuct tbedd d uyur iqqim ibedd ařami yuɣa řgens tasɣart x řɛedyan nnes. Ma war yura man aya deg wedlis ittwannḍen n umsegged? Tafuct tbedd di řwesṭ n ujenna u war tqeǧeq ad tɣeǧi, ɛřayen ijj n wass ikmeř.
14 War din iǧi uřa d ijj n wass am wanita, war imsar zic uřa awarni as, ijj n wass i di tuɣa isřa SIDI ɣar tmijja n ijj n weryaz ammu, minzi SIDI tuɣa immneɣ di ṭṭweɛ n Israil.
15 Xenni iɛqeb-dd Yacuwa d marra Israil akides, ɣar řmargeḥ n řɛeskar di Jiljal.
16 Xemsa n ijeǧiden nni arewřen uca nnufaren deg ifri ɣar Maqqida.
17 Ittwanna man aya i Yacuwa, nnan: “Aqa ttwafen xemsa n ijeǧiden. Nitni nnuffaren deg ifri ɣar Maqqida.
18 Xenni inna Yacuwa: “Seqnunniyem tiṣuḍar d timeqqranin x uqemmum n ifri uca ssbeddem iryazen xasen, ḥima ad xasen ɛessen.
19 Kenniw s yixef nwem, war tᵉttɣimam tbeddem. Ḍfarem řɛedyan nwem, wtem aɣezdis aneggaru nsen. War ten ttejjim ad adfen ɣar tneddam nsen, minzi SIDI, AREBBI nwem, igga awem ten deg ufus nwem.”
20 Umi ikemmeř i-ten Yacuwa d ayt n Israil s ict n tecti tameqqrant ařami ttwaqḍan nitni, uca iwḍen mɣir inni yarewřen ɣar tneddam ifaryen,
21 aqa yareggʷeḥ marra řgens di řehna ɣar Yacuwa di řmargeḥ n řɛeskar ɣar Maqqida. Uřa d ijj war izɛim ad issenhez iřes nnes x ayt n Israil.
22 Xenni inna Yacuwa: “Arzmem aqemmum n ifri uca awyem-dd xemsa n ijeǧiden nni zeg ifri ɣari da!”
23 Nitni ggin t ammu, ssuffɣen-dd xemsa n ijeǧiden zeg ifri ɣares: ajeǧid n Urcalim, ajeǧid n Ḥabrun, ajeǧid n Yarmut, ajeǧid n Laxic d ujeǧid n Ɛajlun.
24 Umi dd-ssuffɣen nitni ijeǧiden nni ɣar Yacuwa, iřaɣa Yacuwa marra iryazen n Israil uca inna i ikumandaren x iɛeskariyyen nni tuɣa akides iruḥen: “Qarrbem-dd uca sarsem iḍaren nwem x tmejjarin n ijeǧiden-a.” Qarrben-dd nitni uca ssarsen iḍaren x timejjarin nsen.
25 Xenni inna asen Yacuwa: “War tteggʷdem ca, war ttejjim ad iɛqez wuř nwem, iřim d iryazen u iřim tmeḥḍem, minzi ammu i ɣa igg SIDI ak-d marra řɛedyan nwem, inni ak-d tᵉttmenɣam.”
26 Xenni iwwet i-ten Yacuwa uca inɣa i-ten. Yayeř i-ten ɣar xemsa n tḥenya uca qqimen ayřen ɣar tḥenya ařami d tameddit.
27 Imsar ɣar řweqt n uɣeǧay n tfuct, issekk Yacuwa maḥend ad ten-i-dd-kksen zi tḥenya, ad ten nḍaren deg ifri i di tuɣa nnuffaren. Xenni ggin tiṣuḍar d timeqqranin x uqemmum n ifri, inni din iǧan ař ass-a.
28 Deg wass nni iṭṭef Yacuwa Maqqida uca iwwet i-tt s řeqḍeɛ n ssif. Uca ajeǧid nnes, iḥarrem i-t uřa d marra nitni d kuř řeɛmar nni iǧan deg wemcan nni. War ijji ad iqqim uřa d ijj n umarweř uca igga ak-d ujeǧid n Maqqida am mammec tuɣa igga ak-d ujeǧid n Ariḥa.
29 Xenni iẓwa Yacuwa ak-d marra ayt n Israil zi Maqqida ɣar Libna uca immneɣ ak-d Libna.
30 Uca SIDI iwca i-tt deg ufus n Israil, ak-d ujeǧid nnes. Iwwet i-tt s řeqḍeɛ n ssif ak-d marra řeɛmar i dayes iǧan, war ijji ad iqqim uřa d ijj n umarweř, uca igga ak-d ujeǧid nnes am mammec tuɣa igga ak-d ujeǧid n Ariḥa.
31 Xenni iẓwa Yacuwa zi Libna ɣar Laxic d marra Israil akides uca inneḍ as-dd i tendint uca immneɣ akides.
32 SIDI iwca Laxic deg ufus n Israil. Uca Israil iṭṭef i-tt deg wass wiss tnayen uca iwwet i-tt s řeqḍeɛ n ssif ak-d marra řeɛmar i dayes iǧan, ammu nican am mammec tuɣa i-tt igga ak-d Libna.
33 Xenni igeɛɛed Huram, ajeǧid n Jazar, maḥend ad iɛawen Laxic, maca Yacuwa iwwet i-t uřa d řgens nnes ařami war ijji ad ɣares iqqim uřa d ijj n umarweř.
34 Yacuwa iẓwa zi Laxic ɣar Ɛajlun d marra Israil akides uca nnḍen as-dd uca mmenɣen akides.
35 Ṭṭfen tt deg wass nni uca wtin tt s řeqḍeɛ n ssif uca deg wass nni iḥarrem marra řeɛmar i dayes iǧan, ammu nican am mammec tuɣa igga ak-d Laxic.
36 Iẓwa Yacuwa zi Ɛajlun ɣar Ḥabrun d marra Israil akides, uca mmenɣen akides.
37 Nitni ṭṭfen tt uca wtin tt s řeqḍeɛ n ssif, ajeǧid nnes d marra tineddam nnes ak-d marra řeɛmar i dayes iǧan. War ijji ad iqqim uřa d ijj n umarweř, ammu nican am mammec tuɣa igga ak-d Ɛajlun. Netta iḥarrem i-tt ak-d marra řeɛmar i dayes iǧan.
38 Uca idweř-dd Yacuwa ɣar Dabir d marra Israil akides uca immneɣ akides.
39 Netta iṭṭef i-tt u nitni wtin ajeǧid nnes d marra tineddam nnes s řeqḍeɛ n ssif uca ḥarrmen marra řeɛmar i dayes iǧan. Netta war ijji ad iqqim uřa d ijj n umarweř. Am mammec tuɣa igga netta ak-d Ḥabrun, ammu igga ɛawed ak-d Dabir u ak-d ujeǧid nnes igga am tuɣa igga ak-d ujeǧid n Libna.
40 Ammu i iɣřeb Yacuwa x marra tammurt: Tammurt n Idurar d Temmurt n Ljanub d Temmurt Iwaṭan, d marra ijeǧiden nsen. War ijji ad iqqim uřa d ijj n umarweř. Marra min tuɣa ittarran nnefs, iḥarrem i-t i uteḥḥi, am mammec tuɣa i d as yumur SIDI AREBBI n Israil.
41 Yacuwa iwwet i-ten zi Qadac-Barniɛ ař Ɣazza u ammu uřa d marra tammurt n Jucan, ař Jibɛun.
42 Iṭṭef Yacuwa ijeǧiden-a d temmurt nsen s ict n tecti, minzi SIDI, AREBBI n Israil, immneɣ di ṭṭweɛ n Israil.
43 Xenni iɛqeb Yacuwa ɣar řmargeḥ n řɛeskar di Jiljal d marra Israil akides.