39
Uḍuf n Urcalim
1 Deg useggʷas wiss tesɛa n Ṣidqiya, ajeǧid n Yahuda, deg uyur wiss ɛecra, yusa-dd Nabuxadraṣṣar, ajeǧid n Babil, ak-d marra řɛeskar nnes ɣar Urcalim uca nnḍen as-dd.
2 Deg useggʷas wiss ḥiṭac n Ṣidqiya, deg uyur wiss arebɛa, deg wass wiss tesɛa n uyur, wtin ibuxxac di řḥiḍ n tendint.
3 Xas uca udfen marra řḥukkam n ujeǧid n Babil uca qqimen di tewwart n wammas: Narjal-Caraṣar, Camjar-Nabu, Sarsaxim, azeǧif n imsexxaren n taddart n ujeǧid, Narjal-Carṣar, azeǧif n ayt n bu-tseḥḥart, uřa d marra řḥukkam inneɣni n ujeǧid n Babil.
4 Řami Ṣidqiya, ajeǧid n Yahuda, d marra iɛeskariyyen nnes ẓrin ten, arewřen nitni, ffɣen zi tendint s ǧiřet x webrid ɣar weḥwic n ujeǧid. Nitni kkin zi tewwart jar tnayen n řeḥyuḍ uca netta iṭṭef abrid ɣar Řewḍa.
5 Ḍfaren ten řɛeskar n Ikaldaniyyen, ḥarten x Ṣidqiya di řewḍat n Ariḥa. Nitni ṭṭfen t d ameḥbus uca iwyen t ɣar Nabuxadraṣṣar, ajeǧid n Babil, ɣar Ribla di temmurt n Ḥamat, u wanita iḥkem xas.
6 Ijja ujeǧid n Babil ad ɣarṣen iḥenjiren n Ṣidqiya zzat i tiṭṭawin nnes di Ribla. Uřa d marra tarwa n taṣiřet n Yahuda iɣarṣ asen ujeǧid n Babil.
7 Issdarɣeř netta tiṭṭawin n Ṣidqiya uca iqqen i-t s tnayen n ssnaseř n nnḥas maḥend ad t yawi ɣar Babil.
8 Sscemḍen Ikaldaniyyen taddart n ujeǧid d tudrin n řgens s tmessi uca ařẓin řeḥyuḍ n Urcalim.
9 Min iceṭṭen zi řgens nni ittwajjen di tendint, ixs ad yini marra inni tuɣa iɛdun ɣar ujeǧid n Babil d min iceṭṭen zi řgens, indeh i-ten Nabuzaradan, řqebṭan n iɛessasen n arrimet, di lmenfa.
10 Zeg imezřaḍ n řgens nni war ɣar iǧi walu, ijja Nebuzaradan, řqebṭan n iɛessasen n arrimet, ijj n wezyen di temmurt n Yahuda. Iwca asen deg wass nni imarjaɛen n uḍiř d iyyaren.
11 Nabuxadraṣṣar, ajeǧid n Babil, tuɣa yumur Nebuzaradan, řqebṭan n iɛessasen n arrimet, x Irmiya, inna:
12 “Awyi t-i-dd, ḥḍa xas. War dayes ttegg uřa d ijj n řɣar, maca egg akides am mammec i d ac ɣa yini.”
13 Xenni issekk Nebuzaradan, řqebṭan n iɛessasen n arrimet, ca n ireqqasen, netta jmiɛ ak-d Nebucazban, ameqqran n imsexxaren n ujeǧid, d Narjal-Caraṣar, azeǧif n ayt n tseḥḥart, u ak-d marra ikumandaren n ujeǧid n Babil.
14 Jjin ten ad awyen Irmiya zi řemraḥ n řeḥbes, sellmen t deg ufus n Jadalya, mmis n Axiqam, mmis n Cafan, maḥend ad t-i-dd-awyen ɣar taddart nnes. Ammu i iqqim izeddeɣ jar řgens.
Řwaɛd i Ɛabd-Malik
15 Yusa-dd wawař n SIDI ɣar Irmiya umi tuɣa ittwaḥṣar di řemraḥ n řeḥbes, inna:
16 “Ruḥ, siweř ak-d Ɛabd-Malik, Akuci, ini: ‘Ammu i iqqar SIDI n řɛeskarat, AREBBI n Israil: Xzar, Necc ad ssiwḍeɣ awařen inu ɣar tendint-a, i řɣar war iǧi i řxar, ad dd-ffɣen wawařen inu deg wass nni zzat i tiṭṭawin nnec.
17 Maca ad cek ssnejmeɣ deg wass nni, ammu i iqqar SIDI, u cek war tᵉttmewcid ca deg ifassen n yeryazen i zi teggʷeded.
18 Maɣar Necc ad cek ssnejmeɣ. War ccaten s ssif. Ad tiři tudart nnec d takeccaḍt nnec, maɣar cek tᵉttecřed xafi, ammu i iqqar SIDI.’ ”