38
Irmiya deg wanu
1 Řami Cafaṭya, mmis n Mattan, d Jadalya, mmis n Facḥur, d Yuxal, mmis n Calamya, d Facḥur, mmis n Malkiya, sřin i wawařen nni issiweř Irmiya ɣar marra řgens, umi wanita inna:
2 “Ammu i iqqar SIDI: ‘Wenni i ɣa iqqimen di tendint-a, ad ittwaneɣ s ssif, s řaẓ u s ṭṭaɛun, maca wenni i ɣa iffɣen ɣar Ikaldaniyyen, ad iqqim iddar. Netta ad yawi akides buḥbeř nnes am tkeccaḍt, ad iqqim iddar!’.
3 Ammu i iqqar SIDI: ‘Tandint-a ad temmewc deg ufus n řɛeskar n ujeǧid n Babil u netta ad tt iṭṭef!’ ”,
4 řexdenni nnan řḥukkam i ujeǧid: “Ittxeṣṣa ad ittwaneɣ weryaz-a, minzi ammu i issefcař ifassen n iɛeskariyyen nni ɛad iqqimen di tendint-a uřa d ifassen n marra řgens umi ɣarsen issawař awařen-a, maɣar aryaz-a war yarezzu ca řehna i tendint-a, maca yarezzu řɣar.”
5 Inna ujeǧid Ṣidqiya: “Xzar, netta aqa-t deg ufus nnem, maɣar ajeǧid war izemmar ad awem igg walu.”
6 Ṭṭfen nitni Irmiya uca nḍaren t deg wanu n mmis n ujeǧid Malkiya, wenni iǧan di řemraḥ n řeḥbes. Seyyben Irmiya s iseɣwan swadday. Tuɣa war din bu waman deg wanu, maca mɣir abaryuḍ uca iɣḍes Irmiya deg ubaryuḍ.
7 Umi isřa Ɛabd-Malik, Akuci, ijj n umsexxar amcenneɛ di taddart n ujeǧid, aqa nḍaren Irmiya deg wanu, uca iqqim ujeǧid ɣar tewwart n Binyamin,
8 iffeɣ Ɛabd-Malik zi taddart n ujeǧid uca issiweř ak-d ujeǧid, inna:
9 “A sidi inu ajeǧid, iryazen-a ggin min war iḥřin di marra min ggin i unabi Irmiya, wenni nḍaren nitni deg wanu. Tuɣa izemmar ad dinni immet s řaẓ, maɣar ɛad walu aɣrum di tendint.”
10 Xenni yumur ujeǧid Ɛabd-Malik Akuci zi temmurt n Kuc, inna: “Ksi ssenni třatin n yeryazen sadu ufus nnec uca sgeɛɛed anabi Irmiya zeg wanu qbeř i ɣa immet.”
11 Ɛabd-Malik iksi iryazen nni sadu ufus nnes uca yudef ɣar taddart n ujeǧid ař wadday n wexxam n txubay. Ssenni iksi ikettanen iqdimen d warruḍ iqqarṣen uca issehwa i-ten-dd s iseɣwan ɣar Irmiya deg wanu.
12 Xenni inna Ɛabd-Malik Akuci i Irmiya: “Egg ikettanen iqdimen d warruḍ iqqarṣen sadu tiddiɣin n iɣaǧen nnec uca egg iseɣwan swadday!” Uca ammu i tt igga Irmiya.
13 Jebden-dd nitni Irmiya s iseɣwan uca ssgeɛɛden t-i-dd zeg wanu. Maca Irmiya iqqim di řemraḥ n řeḥbes.
Řhard n Ṣidqiya ak-d Irmiya i twařa wiss tnayen
14 Xenni issekk ajeǧid Ṣidqiya ca n imsexxaren nnes, ijja ad as dd-awyen anabi Irmiya ɣar wadaf wiss třata ɣar Taddart n SIDI. Inna ujeǧid i Irmiya: “Necc xseɣ ad cek sseqsiɣ x ict n řḥajjet, war xafi tt tteffar walu.”
15 Yarra-dd Irmiya x Ṣidqiya: “Mařa necc ssargbeɣ cek, ma war d ayi tneqqed zeɛma? U mařa wciɣ ac ijj n array, cek war ɣari tᵉttesřid!”
16 Xas uca ijjuǧ ujeǧid Ṣidqiya i Irmiya s tnuffra inna: “S tidett am iddar SIDI wenni d aneɣ iwcin tudart-a: ‘Uct xafi, mařa necc nɣiɣ cek niɣ mařa wciɣ cek deg ifassen n yeryazen nni yarezzun tudart nnec!’ ”
17 Inna Irmiya i Ṣidqiya: “Ammu i iqqar SIDI, AREBBI n řɛeskarat, AREBBI n Israil: ‘Mařa cek ad teffɣed s tidett ɣar řḥukkam n ujeǧid n Babil, ad teqqimed ad teddared, uca tandint-a war tᵉttwassecmaḍ s tmessi, cek ad teqqimed ad teddared, wah cek d taddart nnec.
18 Maca mařa war teffiɣed ca ɣar řḥukkam n ujeǧid n Babil, xenni ad temmewc tendint-a deg ufus n Ikaldaniyyen. Nitni ad tt sscemḍen s tmessi u cek war tnejjmed zeg ifassen nsen.’ ”
19 Ajeǧid Ṣidqiya inna i Irmiya: “Necc tteggʷedeɣ zeg Wudayen nni yeɛdun ɣar Ikaldaniyyen, ařami nitni war d ayi ssɛeddun ɣar ufus nsen u war zzayi tteggen min xsen.”
20 Inna as Irmiya: “Nitni war cek sellmen ca. Seř maca ɣar tmijja n SIDI, ɣar řḥařḍ inu, xenni ad tiřid mliḥ u ad teqqimed ad teddared.
21 Maca mařa tugid ad teffɣed, xenni d wa d awař nni d ayi isscen SIDI:
22 ‘Xzar, marra timɣarin nni tuɣa iqqimen di taddart n ujeǧid n Yahuda, ad ttwanedhent ɣar řḥukkam n ujeǧid n Babil. Xzar, nitenti ad inint:
Iryazen nni ak-d tuɣa teddared di řehna,
aqa ɣdaren cek u zemmaren xak,
nnuɣen iḍaren nnec deg ubaryuḍ,
uca nitni s yixef nsen dewřen ɣar ḍeffar!
23 Marra timɣarin nnec d iḥenjiren nnec ad ttwanedhen ɣar Ikaldaniyyen, uca uřa d cek simant nnec war tnejjmed zeg ufus nsen, minzi ad tᵉttwaṭṭfed zeg ujeǧid n Babil u tandint-a ad tᵉttwassecmeḍ s tmessi.’ ”
24 Xenni Ṣidqiya inna i Irmiya: “Ittxeṣṣa uřa d ijj war ittessen awařen-a, ammu war tmmetid.
25 Mařa řḥukkam sřin aqa necc ssiwřeɣ akidek, ad ɣarek dd-asen, ad ac inin: ‘Ini aneɣ min tennid i ujeǧid! War xaneɣ teffar walu, niɣ aqa ad cek nenneɣ: Min xas kidek issiweř ujeǧid?’
26 xenni ittxeṣṣa ad asen tinid: ‘Necc wḍiɣ s řqedd inu zzat i wudem n ujeǧid ḥima war ittejji ad ayi arren ɣar taddart n Yunatan maḥend ad dinni mmteɣ.’ ”
27 Řami dd-usin marra řḥukkam ɣar Irmiya, iḥaja ten marra awařen-a inni tuɣa yumur ujeǧid. Xas uca jjin t maɣar uřa d ijj war isři tamesřact simant nnes.
28 Ammu i iqqim Irmiya di řemraḥ n řeḥbes ař ass nni di tᵉttwaṭṭef Urcalim, wah, netta tuɣa-t ɛad din umi tᵉttwaṭṭef Urcalim.