53
Aswaḍeɛ n Umsexxar n SIDI (Řexbar Aṣebḥan Wiss Xemsa)
1 “Xzar, Amsexxar inu ad yegg s řeɛqeř, ad ittwassɛuǧa u ad ittwassuɛřa, wah, ad ittwassɛuǧa ař ṭṭarf.
2 Am zzayek nnxeřɛen aṭṭas - ammu s waṭṭas ixsar udem nnes, war iǧi ɛad am n ijj n bnadem, u addud nnes, war iǧi ɛad am n tarwa n bnadem -
3 ammu i ɣa issengez Netta aṭṭas n řegnus, wah, ɛad ijeǧiden ad sseɣden, maɣar min war d asen barrḥen, ad t ẓaren, u min ɛemmarṣ war sřin, ad t fehmen.”
4 “Man wen yumnen di řexbar nneɣ u wi i umi d ittwasscen uɣiř n SIDI?
5 Maɣar am tseṭṭa imɣar Netta zzat i wudem nnes, am weẓwar zi temmurt yuẓɣen. Netta tuɣa war ɣares addud niɣ acewwar xmi t nẓar, war ɣares bu waẓri n řxeẓrat ařami dayes i ɣa nemmeẓri.
6 Tuɣa ittwasseḥqar, immenḍar zeg iwdan, aryaz n řeḥriq, issen řeḥřac, am yijjen i umi řeḥḥfen aɣembub, ammu i tuɣa ittwasseḥqar u neccin war t nḥessib walu.
7 S tidett, iksi xas řeḥřac nneɣ uca yarbu řeḥriq nneɣ, maca neccin nḥesb i-t am yijjen teřqef i-t lmuṣiba, am yijjen iɣḍeř i-t u iḥṣar i-t AREBBI.
8 Maca netta ittwassnuqqeb x iɛeddiyen nneɣ, x řmuɛṣiyyet nneɣ řebzen t. Temmars xas tecti nni d aneɣ dd-issakkwaḍen řehna, u s iyezzimen nnes idweř aneɣ d agenfi.
9 Marra neccin tuɣa nweddar am wuǧi, nedweř kuř ijj ɣar webrid nnes, maca SIDI yarra ad xas tewḍa řmuɛṣiyyet nneɣ marra.
10 Deǧen t, uca ijja i-ten ad t ssbehdřen. War yarzim aqemmum nnes. Am izmar nedhen t ɣar tɣarṣt, am texsi tegnu qibač i wenni tt iǧasen, ammu war yarzim Netta aqemmum nnes.
11 Immeksi-dd zi řeḥṣaret u zi řeḥkam. Man wen zi jjiř nnes tuɣa ixemm dayes, zeɛma ittwaqess zi temmurt n yinni iddaren, aqa xas ticti zi ssibbet n uɛeddi n řgens inu!
12 Immewc as wenḍeř ɣar iɛeffanen, maca ɣar ttujar tuɣa-t di řmewt nnes iqesḥen, waxxa netta ɛemmarṣ war iggi lɛunf u ɛemmarṣ war tuɣi řɣecc deg uqemmum nnes.
13 Maca tuɣa iǧa i arḍa n SIDI maḥend ad t iřbez, isseḥřec i-t. Řami řeɛmar nnes igga ixef nnes d taɣarṣt n umarwas i ddnub nneɣ, ad iẓar Netta zzariɛet, ad isszuggar Netta ussan nnes uca arḍa n SIDI ad iqfeř s ufus nnes.
14 Di ssibbet n umarret n řeɛmar nnes ad t iẓar uca ad ijjiwen. S tussna nnes ad isegged Umsexxar inu, Amsegged, aṭṭas n yewdan, maɣar ad yarbu řmuɛṣiyyet nsen.
15 S uya ad as wceɣ tasɣart jar imeqqranen uca ak-d aytbab n ṣṣulṭa ad ibḍa takeccaḍt, minzi isebbeř tudart nnes i řmewt uca ittwaḥseb zeg inni ittɛeddan uca yarbu ddnub n waṭṭas uca ittar di ṭṭweɛ n yinni ittɛeddan.”