52
1 “Faq, faq, arḍ s jjehd a, Ṣihyun, arḍ s werruḍ nnem iccuwwaren, a Urcalim, tandint tamqeddast! Zi ssa tsawent war ɣarem t-i-dd-ittidif ɛad wenni war ittwaxetnen d umexmuj.
2 Zerz xam taɛejjact, kkar, qqim cem, a Urcalim! Arxu ssnaseř zeg yiri nnem, a tameḥbust, a yeǧis n Ṣihyun!
3 Maɣar ammu i iqqar SIDI: ‘Temmenzem s baṭeř, ad tᵉttwassfekkem ɛawed břa tmenyat!’
4 Maɣar ammu i iqqar Sidi inu, SIDI: ‘Zic ihwa řgens inu ɣar Miṣra maḥend ad dinni iqqim am řbarrani, uca Accur iḥṣar i-t x walu!’ ”
5 “Uca řexxu, min ɣari ɛad xafi ad tt ggeɣ danita, iqqar SIDI, maɣar awyen řgens inu břa ssibbet uca inni xas ittṣellṭen ssɣuyyun, iqqar SIDI, ass marra ttɛeyyben deg Yisem inu.
6 S uya ad issen řgens inu Isem inu, s uya, aqa Necc Necc, wenni iqqaren deg wass nni: Necc aqa ayi da!”
7 “Mecḥař cnan x idurar iṣuraf n umbeccar nni ittbarrḥen s řehna, n umbeccar n řexbar aṣebḥan nni ittbarrḥen s usenjem, wenni iqqaren i Ṣihyun: ‘AREBBI nnem d Ajeǧid!’
8 Sřem i tmijja n iɛessasen nnem! Nitni ttsgeɛɛaden tmijja nsen, ttesřiwřiwen munen, maɣar udem deg udem akides ad twařan mammec i dd ɣa isseɛqeb SIDI Ṣihyun.
9 Sɣuyyent s řefraḥet, sřiwřewent tmunent, a řxirbat n Urcalim, maɣar SIDI issfewwej řgens nnes, ifekk Urcalim.
10 Iɛarra SIDI aɣiř nnes amqeddes zzat i tiṭṭawin n marra řegnus u marra timawwin n temmurt ad ẓarent asenjem n AREBBI nneɣ.”
11 “Ruḥem, ruḥem, ffɣem-dd ssenni, war ttḥadam walu n min ixemjen, ffɣem ssenni zi řwesṭ nnes, sizedgem ixef nwem, a kenniw inni yarebbun řeqcuɛ n SIDI!
12 Maɣar kenniw war tᵉtteffɣem s tezřa, war tarekkwařem, maɣar SIDI ad yuyur zzat nwem u AREBBI n Israil ad yiři d aɣezdis nwem aneggar.”