45
Kurac, amedhun n SIDI, ad ibarreḥ s ufekki
1 “Ammu i iqqar SIDI i umedhun nnes, i Kurac, wenni zi ṭṭfeɣ afus nnes afusi maḥend ad as ssaḍareɣ řegnus zzat i wudem nnes: ‘Ad ssarxuɣ tiḥezzamin s řesnaḥ x tejɛinnatin n ijeǧiden, ḥima ad as arzmeɣ tiwwura, u řebniyyat n tewwura war ttwabelliɛent ca.
2 Necc ad ac izwareɣ, ad waṭiɣ min war ihewnen, ad arẓeɣ tiwwura n nnḥas u ad wtiɣ zzekrunat n wuzzař d iwetwiten.
3 Ad ac wceɣ řeknuz n taǧest, agřa innuffaren, ḥima ad tessned aqa Necc, SIDI, d wenni cek iřaɣan s yisem nnec, AREBBI n Israil.
4 Di ṭṭweɛ n umsexxar inu Yaɛqub, Israil wenni farzeɣ, řaɣiɣ ac s yisem nnec, wciɣ ac isem n ccan, waxxa war d ayi tessined ca.
5 Necc d SIDI, war din iǧi wenneɣni, nhřa Necc war iǧi AREBBI. Ad ac ḥezzmeɣ abyas, waxxa war d ayi tessined ca,
6 maḥend ad ssnen zi mani dd-tneqqar tfuct ař mani tɣeǧi, aqa nhřa Necc war din iǧi uřa d ict n tmesřact, Necc d SIDI, war din iǧi nneɣni.
7 Necc tteggeɣ tafawt u xeǧqeɣ-dd taǧest, tteggeɣ řehna u xeǧqeɣ-dd řɣar, Necc, SIDI, d wenni itteggen marra aya.’ ”
8 “Udumem, a kenniw ijenwan, zi sennej, jjem iseynuten ad dd-farrɣen tasegda, ad tennurzem temmurt, uca jjem ten ad awyen asenjem i řɣiǧet u ejj tasegda ad teɣmi jmiɛ akides. Necc, SIDI, xeřqeɣ t.”
9 “Uct x wenni ittemcubbucen ak-d Wenni t iggin, ijj n uqedduḥ jar iqedduḥen nneɣni? Ma tzemmar třaxt ad tini i wenni t iggin: ‘Min teggid?’ Niɣ tzemmar řqecɛet nnec ad tini: ‘War ɣares bu ifassen’?
10 Uct x wenni iqqaren i babas: ‘Min dd-tejjid?’ Niɣ i temɣart: ‘Min dd-turud?’ ”
11 “Ammu i iqqar SIDI, Amqeddas n Israil, d Wenni t iggin: ‘Seqsam ayi x tmesřayin i dd ittasen, ttecřem xafi ad ḥḍiɣ iḥenjiren inu uřa d řxedmet n ifassen inu.
12 Necc ggiɣ tammurt u xeřqeɣ-dd xas bnadem. Wah d Necc i tt yeggin, ifassen inu bezzɛen ijenwan, u marra řɛeskarat nsen ttumureɣ tent.
13 Necc ssekkareɣ t di tsegda uca ad seggmeɣ marra ibriden nnes. Netta ad ibna tandint inu ɛawed uca ad issnufseř imeḥbas inu, war iǧi i ttaman u war iǧi i tarzeft!’ iqqar SIDI n řɛeskarat.”
14 “Ammu i iqqar SIDI: ‘Arber n Imiṣriyyen d ṣṣeřɛet n ayt n Kuc d Saba, iryazen imɣaren di tiddi, ad ɣarem dd-ẓwan uca ad iřin nnem. Nitni ad cem ḍfaren, ad ɣarem ɛdun di ssnaseř, ad am sejden, ad am sellmen ixef nsen, ad neɛmen: ‘S tidett, ɣarem i iǧa Arebbi, war din iǧi wenneɣni, uřa d ijj nneɣni mɣir AREBBI!’
15 D tidett, Cek d Arebbi inuffaren, AREBBI n Israil, Amsenjem.
16 Nitni marra ad seḍḥan, ad ttwafeḍḥen ɛawed. Imziřen n řexyařat n l’aṣnam ad ffɣen jmiɛ, nnfeḍhen.
17 Israil ad ittwassenjem s ufus n SIDI s ijj n usenjem ittduman. War tᵉttseḍḥim u war tᵉttnefḍiḥem i řebda qaɛ.’ ”
18 “Maɣar ammu i iqqar SIDI, wenni dd-ixeřqen ijenwan, Netta, AREBBI, d wenni ikewwnen tammurt uca ittegg i-tt, Netta, d wenni tt issmetnen. War tt-i-dd-ixřiq texwa, maca ikewwen i-tt maḥend ad xas zeddɣen: Necc d SIDI, war iǧi uřa d ijj nneɣni!”
19 “War ssiwřeɣ s tnuffra, di ca n wemcan ibarrecnen di temmurt. Necc war nniɣ i tarwa n Yaɛqub: Arzum ayi baṭeř! Necc d SIDI nni issawařen tasegda, d wenni ittbarrḥen min iǧan iseggmen.”
20 “Munem, asem-dd, qarrbem-dd munen, a kenniw, inni innejmen zi řegnus! Nitni war ssinen walu, inni yarebbun řexyařat ineqcen n ukeccuḍ uca ttɛebbden i yijj n arebbi nni war izemmaren ad issenjem.
21 Barrḥem, qarrbem-dd. Mcawarem di win jar awem: Man wen iggin ad sřen aya zeg wecḥař uya, man wen zzayes ibarrḥen zi meřmi? Ma war iǧi d Necc, SIDI? Nhřa Necc war iǧi uřa d ijj n AREBBI nneɣni, nhřa Necc war din iǧi Arebbi Amsegged d Umsenjem.
22 Qeřbem-dd ɣari u tejjem ixef nwem ad ttwassnejmem, a kenniw, marra iwdan n ṭṭrufa n temmurt, maɣar Necc d Arebbi u war din iǧi uřa d ijj n nneɣni.
23 Necc jjuǧeɣ ɣar Ixef inu, iffeɣ-dd ijj n wawař zeg uqemmum inu di tsegda uca awař-a war din iqqim wedwař: Aqa marra afud ad yaḍar zzati, marra iřes ad ɣari ijjaǧ!
24 Ad xafi qqaren: ‘Di SIDI waha teǧa tasegda ifeyyḍen d jjehd!’ Nitni ad ɣares dd-asen, maca marra inni xas ittfugmen, ad seḍḥan.
25 Maca marra zzariɛet n Israil, ad ttwaseggden nitni di SIDI uca ad t cennɛen.”