4
Awař n SIDI ḍidd i ikehhanen d řgens
1 “Sřem i wawař n SIDI, ayt n Israil, maɣar SIDI iksi tanfuč ḍidd i imezdaɣ n temmurt, minzi war din yeǧi řaman niɣ tamexsiwt icewwaren uřa d tussna n AREBBI di temmurt.
2 Tikkʷura d ixarriqen d umenɣi d tucceffra d zzina! Aqa aten dduqqzen, asizzeř n idammen awarni i usizzeř n idammen.
3 X uya tceṭṭen tammurt u kuř ijjen i dayes izeddɣen ittaẓeɣ: řewḥuc n yeyyar d yijḍaḍ n ujenna, wah, uřa d iseřman di řebḥar ttwakksen.
4 Maca uct x weryaz nni i d ɣa iksin tanfuč u uct x weryaz nni i ɣa icetcan. Řgens nnec axmi yinni ittemcubbcen ak-d ukehhan.
5 S uziř ad tenqarḍed u s ǧiřet ad inqarḍ ɛad anabi akidek, u yemmac ad tt sshellkeɣ.
6 Řgens inu idweř d aynaw, minzi aqa-t břa tussna. Umi cek tenḍared tussna, nḍareɣ cek maḥend war d ayi tsexxared ɛad am ukehhan. Umi cek tᵉttud Ccariɛa n AREBBI, uřa d Necc ad ttuɣ iḥenjiren nnec.
7 Mammec ma ktaren, arnin di ddnub akidi. Ad arreɣ ccan nsen d řefḍiḥet.
8 Nitni ttᵉtten zi ddnub n řgens inu u s wuř nsen ttarran meẓri i řmuɛṣiyyet nsen.
9 Am mammec i iǧa ukehhan, ammu i ɣa yiři uřa d řgens. Necc ad dayes xeřfeɣ ibriden nnes u timegga nnes ad as tent xeǧṣeɣ.
10 Nitni ad ccen, maca war tᵉttjjiwinen ca, nitni ad ssfesden ixef nsen, maca war ttmarenyen, minzi nitni semḥen deg uḥettu n tsexxart i SIDI.
11 Farq-ccɣeř d binu u binu n jdid aqa kksen uř i bnadem.
12 Řgens inu ittseqsa ṣṣanam nnes n ukeccuḍ u taɣɣarct nnes ad as tewc řexbar, minzi buḥbeř n farq-ccɣeř iɣarra i-ten ařami ffɣen s farq-ccɣeř nsen zi sadu aḥeṭṭu n AREBBI nsen.
13 X tqiccat n idurar ttqeddamen tiɣarṣa u x tewriririn ttawyen tiwhibin n řebxur, sadu řbeǧuḍ d ṣṣefṣaf d tcejjart n yigg, minzi tiři nsen teṣbeḥ. X uya ssefsadent yessitwem ixef nsent u tisřatin nwem ttareẓẓant řemřac s zzina.
14 Maca Necc war ssiwiḍeɣ řḥukm x yessitwem umi ssfesdent ixef nsent uřa x tesřatin nwem umi ttareẓẓant řemřac s zzina. Aqa nitenti ḥuzent ixef nsent ak-d temɣarin n farq-ccɣeř u ttqeddament tiɣarṣa jmiɛ ak-d temɣarin n farq-ccɣeř n zzawect. Ad iwḍa řgens i war ɣar iǧi řeɛqeř.”
15 “Waxxa cek, Israil, tessefseded ixef nnec, war ttarri uřa d Yahuda d bu-umarwas. War dd-ttisim ɣar Jiljal, war ttgeɛɛadem ɣar Bayt-Awan u war ttjaǧam: ‘S tidett am iddar SIDI!’
16 Minzi Israil dayes taɣennant am yict n tfunast tɛarren. Xenni řexxu, ad ten yarwes SIDI am yijj n yezmar ameẓyan deg iyyar iwesɛen aṭṭas.
17 Ifrayim iqqen ixef nnes ak-d řexyařat n l’aṣnam, ejj i-t, ismeḥ dayes.
18 Tasessit nsen dayes ssem, tteggen farq-ccɣeř awarni i farq-ccɣeř, u imeḥḍayen nsen ttexsen mɣir řefḍiḥet waha.
19 Ict n tḥaryaḍt tessjebd i-tt s wafriwen nnes: aqa nitni ad dewřen ttseḍḥan zi tɣarṣi nsen.”