2
SIDI ad dd-yarr x Ḥabaqquq i twařa wiss tnayen
1 Necc ad beddeɣ
deg wemcan n tɛessast inu
u ad ssbeddeɣ ixef inu
x ṣṣumɛet n tɛessast,
ad ṣewḍeɣ maḥend ad ẓareɣ
min i d ayi ɣa yini Netta,
u min i dd ɣa yarreɣ x ucetci inu.
2 Yarra-dd xafi SIDI, inna:
Ari řewḥiy
ari t ifarz x teřwiḥin,
maḥend wenni iɛeddun
am dd-ittazzeř, izemmar ad t iɣar.
3 Maɣar řewḥiy ittraja ɛad
ař řweqt nni yuran.
Ittemḥizwar ɣar uqeṭṭu
u war issxarriq ca.
Mařa iqqim war dd-ittis, qqim raja t,
maɣar ad dd-yas s tidett,
war iɛeṭṭař.
4 Xzar, aqa ittuff, wah,
řeɛmar nnes war iseggem dayes,
maca amsegged s l’iman nnes ad iddar.
5 S tidett, binu aqa icemmet!
Binu aqa-t am yijj n bu-nnfaxet
wenni war ittareyyḥen,
wenni issemɣaran řeɛmar nnes
ameřhaf am řaxart.
Netta war ittjjiwin am řmewt
u iyru ɣares marra řegnus
u issmun ɣares marra iyduden.
6 Ma war dd xas ttiwyen
ijj n wawař iweznen
uřa d ijj n yeẓri
iccur s řemɛani innufaren, ad inin:
Uct x wenni ijarrwen
min war iǧin nnes!
Ař meřmi ɛad?
Uct x wenni issdeqqařen
ixef nnes s werhan!
7 Ma war dd-ttekkaren s řɣefřet
inni i cek ɣa izeɛfen,
u ma war dd-ttfaqan ca
inni cek ɣa yarren tᵉttarjijed,
u ma war d asen tᵉttiřid
d takeccaḍt nsen?
8 Maɣar cek tkeccḍed aṭṭas n řegnus,
ad cek keccḍen marra řegnus iqqimen
di ssibbet n idammen n iwdan
d lɛunf x temmurt,
u x tendint u x marra
inni dayes izeddɣen.
9 Uct x wenni ikessben s řɣecc
takeccaḍt i taddart nnes,
maḥend ad ibna řɛucc nnes di řuɛřa,
ḥima ad injem ammu zeg ufus n řɣar.
10 Cek tcawared řefḍiḥet i taddart nnec,
ḥima ad teqḍid x řegnus,
uca ammu i teggid ddenb
di řeɛmar nnec.
11 Minzi aẓru isɣuyyu-dd zi řḥiḍ,
u taḥnact tᵉttarra-dd xas
zi jar tefřawt.
12 Uct x wenni ibennan
ict n tendint s idammen
uřa x wenni issrusan dsas
n yict n tendint s řɣecc!
13 Xzar, ma war iǧi zi SIDI n řɛeskarat,
aqa řegnus arebbren ixef nsen i tmessi,
u ccuɛub ttaḥřen i walu?
14 Maɣar tammurt ad tᵉttwaccur
s tussna n uɛuǧi n SIDI,
am mammec ttdařen waman řebḥar.
15 Uct x wenni i ɣa isseswen jjar nnes,
wenni ixeǧḍen binu s ssem nnec
u xenni issᵉscar i-t,
maḥend ad iẓar tuɛɛaryant nsen.
16 Ad tessjjiwned ixef nnec s řefḍiḥet
deg wemcan n ccan.
Su cek řexxu ɛawed,
uca ejj axtan nnec war iǧin ittban.
Řkas zeg ufus afusi n SIDI
ad ɣarek dd-yas,
uřa d řefdiḥet x uɛuǧi nnec.
17 Maɣar řɛunf i teggid ḍidd i Lubnan
ad cek ideř
uřa d areddeǧ n řmař i zi ten tessiggʷded,
di ssibbet n idammen n iwdan
d lɛunf x temmurt,
u x tendint u x marra inni dayes izeddɣen.
18 Ma tizi n ijj n řexyař ineqcen,
umi t inqec uneqqac s yixef nnes,
man tizi n yijj n řexyař ifesyen
umi aneqqac nnes
d ijj n umseřmed n ixarriqen,
řami wenni t iggin ittceř x min igga,
umi ittegg l’aṣnam ignawen?
19 Uct x wenni iqqaren i ukeccuḍ ‘Faq!’
u i weẓru ignawen: ‘Kkar!’.
Ma izemmar ad isseřmed?
Xzar, aqa řeḥḥfen t s wureɣ d nnuqart
u war dayes qaɛ buḥbeř.
20 SIDI aqa-t di Zzawect nnes iqeddsen.
Susem zzat i wudem nnes,
marra tammurt!