Ḥabaqquq
1
Acetci n Ḥabaqquq
1 Řḥukm issaggʷaden nni iẓra unabi Ḥabaqquq.
2 “A SIDI, ař meřmi i ɣa qqimeɣ ttřaɣiɣ
u Cek war d ayi tᵉttesřid,
ař meřmi i ɣa qqimeɣ ttřaɣiɣ ‘Lɛunf!’,
u Cek war d ayi tessenjamed!
3 Mayemmi d ayi tessecned řmuɛṣiyyet,
u tᵉttɣimid txezzared ɣar řeɣben?
Maɣar areddeǧ d lɛunf
aqa aten arendad inu,
u imsar umcubbec, ikkar-dd uruddez.
4 X uya tedweř ccariɛa břa jjehd,
u war dd-itteffeɣ ɛemmarṣ řḥeqq,
maɣar aɛeffan ittenneḍ i umsegged.
X uya i dd-itteffeɣ řḥeqq ifarɣ.
Tamwarrit n SIDI x tẓaǧit
5 Xzarem jar řegnus, xzarem,
innurzem uqemmum s utebhet,
maɣar Necc ad ggeɣ
ict n řxedmet deg wussan nwem
i war tᵉttimnem mařa tt ḥajan.
6 Maɣar xzarem,
Necc ssekkareɣ Ikaldaniyyen,
řgens iqesḥen u imqeǧqen,
wenni igguren di řewseɛ n temmurt,
ḥima ad iṭṭef tizeddiɣin
nni war iǧin nnes.
7 Issaggʷaden u issnexřaɛen iǧan!
Řḥeqq nnes d uɛuǧi nnes
tteffɣen-dd zzayes.
8 Iysan nnes fsusen x uɣiřas,
nitni mmuzzaren
mahu uccanen n ǧiřet,
imnayen nnes ttrabaɛen.
Imnayen nnes ttasen-dd zi řaggʷaj,
nitni ṭṭawen am ugider
nni ittqeǧqen maḥend ad yecc.
9 Aqa netta ittas-dd, amen ikmeř, i lɛunf,
iɣembab nsen xezzaren ɣar zzat,
u netta issmuna imeḥbas am yejdi.
10 Netta ittqeṣṣar x ijeǧiden
u inni i ɣar teǧa ṣṣulṭa
ittegg i-ten d taḍeḥḥact.
Wah, netta iḍeḥḥec x kuř lqelɛa,
minzi netta ittɛurrec ucař
uca ad tent iṭṭef.
11 Xenni ad inneɛtar am usemmiḍ,
ad iɛdu, ad idweř d amednub,
maɣar jjehd nnes wanita d arebbi nnes.
Acetci wiss tnayen n Ḥabaqquq
12 Zi mecḥař uya
ma Cek war teǧid d SIDI,
AREBBI inu, Amqeddas inu?
Neccin war nettmetti ca!
A SIDI, Cek tarrid i-t i řḥukm,
a Taṣḍart, Cek tfarzed t
maḥend ad yiři i lɛiqab.
13 Cek d amezdag aṭṭas n tiṭṭawin
ḥima ad twařant řɣar.
Cek war tzemmared
ad tṣewḍed di řmuɛṣiyyet.
Mayemmi tṣewḍed waha
deg yinni itteggen s řeɣdaret?
Mayemmi i tesseɣḍed
xmi iṣarreḍ uɛeffan
i wenni i xas iseggden?
14 Cek teggid iwdan
am yiseřman n řebḥar,
am immudar nni ittbuɛen
x temmurt i war ɣar iǧi řḥakem!
15 S tsennart issgeɛɛad i-ten-dd marra,
iyarru i-ten s tracca nnes,
uca issmun i-ten di tracca nnes n udellaɛ.
X uya ifarreḥ u ittfaja.
16 X uya iwehheb tiɣarṣa i tracca nnes,
uca ibexxar tiwhibin n řebxur
i tracca n udellaɛ nnes.
minzi zzaysent i tedweř
tesɣart nnes temɣar,
uřa d macca nnes aqa tředd.
17 Ma iɛeddeř ad iqqim issexwa
tracca nnes x man aya,
uca ad iqqim řebda ineqq řegnus
břa ma ad yejj ḥed?