2
Tasexxart n Bulus di Tissaluniki
1 Maɣar kenniw simant nwem, a aytma, tessnem belli adaf nneɣ nni d ɣarwem negga, war tuɣi iǧi baṭeř.
2 Tuɣa xaneɣ ikka uweddeb d řḥagra di Filippi qbeř, am mammec tessnem. Awarni man aya, aqa nbarreḥ awem Řexbar Aṣebḥan n Lmasiḥ s teryast di AREBBI nneɣ u s umenɣi ameqqran.
3 S minzi afewwej nneɣ war iǧi ca zeg uɣekkwi niɣ zi řexmej niɣ zi řɣecc,
4 maca nessawař am iwdan i ittwaḥesben nican zi AREBBI ařami d aneɣ iwekkeř tabarreḥt n Řexbar nnes d Aṣebḥan, war iǧi i arḍa n iwdan, maca i arḍa n AREBBI wenni iqeǧben uřawen nneɣ.
5 Minzi ɛemmarṣ war tuɣi nᵉttegg tiqedduḥin, aqa kenniw tessnem tt, u war nᵉttegg ɛemmarṣ ijj n uřeḥḥaf x ṭṭmeɛ nneɣ, AREBBI aqa-t din!
6 War narezzu aɛuǧi n iwdan, uřa zzaywem uřa zeg inneɣni, waxxa tuɣa nzemmar ad negg ixef nneɣ jar awen am rrusul n Lmasiḥ.
7 Maca tuɣa aneɣ d iḥninen akidwem, am yict n tebřiɣt tᵉtthilla deg iḥenjiren nnes.
8 Ammu ɛawed tuɣa nᵉttexs kenniw u tuɣa dayneɣ meẓri maḥend ad ncarc akidwem, war iǧi Řexbar Aṣebḥan n AREBBI waha, aḥeqqa uřa d tudart nneɣ, minzi tdewřem d imɛizzen ɣarneɣ.
9 Ɛeqřem xenni, a kenniw awmaten nneɣ, mammec tuɣa nᵉttamar u nxeddem s ifassen nneɣ ǧiřet d wass, ḥima war xawem nᵉttegg ddqeř.
10 Kenniw d AREBBI aqa d řechud x mammec d awem tuɣa nettbarreḥ s Řexbar Aṣebḥan n AREBBI di řeṣfayet d tnicant n wuř, u mammec tuɣa neggur břa řɛib jar marra inni yumnen.
11 Aqa tessnem ɛawed mammec tuɣa nɛeǧem ijj-ijj zzaywem, am yijj n babas i iḥenjiren nnes, u mammec negga daywem uř u neched i kenniw,
12 maḥend ad tuyurem am mammec isdaheǧ qibač i AREBBI, wenni d awem dd-iřaɣan ɣar Tgeldit nnes u ɣar uɛuǧi nnes.
13 S uyenni nettqada AREBBI břa qeṭṭu, umi kenniw tqebřem Awař n AREBBI i tᵉṭṭfem zzayneɣ, war iǧi am yijj n wawař n iwdan, maca am Wawař n AREBBI, uca d man aya i yeǧa d tidett, u Awař-a ixeddem daywem s řexdayem n yinni yumnen.
14 Minzi kenniw, a aytma, tdewřem d imeḍfaren n tmesmunin n AREBBI i iǧan di Yahudiyya di Yasuɛ Lmasiḥ, minzi kenniw teksim ɛawed arrmeḥ zeg ayt n řgens nwem, am mammec ksin uřa d nitni arrmeḥ zeg Wudayen,
15 inni inɣin Siditneɣ Yasuɛ Lmasiḥ uřa d inabiyyen i zzaysen dd-ffɣen, uca ɛawed darrcen xaneɣ. Aqa aten war areṭṭin ca i AREBBI, maca dewřen ḍidd n iwdan marra.
16 Maɣar menɛen aneɣ, maḥend ad nessiweř ɣar řegnus, ḥima řegnus ad ṭṭfen Tudart. Ammu i ttɛemmaren nitni řmizan n ddnub nsen řebda, maca iwḍa-dd xasen weɣḍab ař aneggar.
Amnus n Bulus d Timutiyu
17 A kenniw aytmatneɣ, ɣar drus n řweqt nedweř neccin d iyujiřen nwem zi jjihet n uɣembub, maca war iǧi zi jjihet n wuř. S uya tuɣa narezzu s meẓri d ameqqran ad nẓar aɣembub nwem.
18 Tuɣa nexs ad ɣarwem dd-nas, necc Bulus ict n twařa d ict n twařa nneɣni ɛad, maca cciṭan ibedd ayi deg webrid.
19 Minzi man wen i iǧan d asitem nneɣ, d řefraḥet nneɣ niɣ d ttaj n uɛuǧi nneɣ zzat i Siditneɣ Yasuɛ Lmasiḥ xmi dd ɣa yas, illa kenniw waha?
20 Aqa kenniw d aɛuǧi nneɣ d řefraḥet nneɣ.