☰ 1 Itissalunikiyyen 1
1 Itissalunikiyyen
1
Aseǧem d usemɣar ɣar umezwaru
1 Bulus d Silwanus d Timutiyu, i tmesmunt n Itissalunikiyyen, tenni di AREBBI, Babatneɣ, u di Siditneɣ Yasuɛ Lmasiḥ: arḍa d řehna ad kiwem iřin. ◘
 
2 Aqa nettqada AREBBI i kenniw marra řebda, u ntidar kenniw břa qeṭṭu di tẓaǧitin nneɣ. ◘ 3 Qibač i wudem n AREBBI Babatneɣ, nettfekkar di řexdayem n l’iman nwem, deg utamar n tayri nwem u di ṣṣbar n usitem nwem di Siditneɣ Yasuɛ Lmasiḥ, ◘ 4 maɣar nessen aqa kenniw tᵉttwafarzem, a aytma, imɛizzen n AREBBI, 5 Minzi Řexbar Aṣebḥan nneɣ war dd ɣarwem yiwiḍ s wawařen waha, maca uřa s jjehd, s Arruḥ Iqeddsen u s řeqnaɛet d tidett. Aqa tessnem mammec d aneɣ tuɣa jar awem di ṭṭweɛ nwem. ◘ 6 Aqa kenniw tdewřem d imeḍfaren zzayneɣ uřa zi Siditneɣ, maɣar umi xawem tekka řmeḥnet tameqqrant, tᵉṭṭfem deg wawař s řefraḥet n Arruḥ Iqeddsen. ◘ 7 Ammu tdewřem d amedya i qaɛ yinni yumnen di Makiduniya u di Axaya. 8 Minzi řexbar n Wawař n Siditneɣ aqa iffeɣ-dd zzaywem, war iǧi di Makiduniya d Axaya waha, maca l’iman nwem di AREBBI idweř ittwassen tanya di marra imucan, ařami nehřa ma nessiweř xas ɛad. 9 Minzi nitni s yixef nsen ɛawden aneɣ, mammec tuɣa tarezmem aneɣ tawwart, uca mammec dd-tdewřem zi l’aṣnam ɣar AREBBI, ḥima ad tɛebdem AREBBI iddaren wenni d tidett, 10 am tᵉttrajam Mmis zeg ijenwan, Wenni dd-issnekkar zi taddart n imettinen, Yasuɛ, wenni d aneɣ i ɣa issnejmen zeg weɣḍab i dd ɣa yasen. ◘
 
 
◘ 1:1 Rum. 1:7; Afa. 1:2; 1 Bṭ. 1:2. ◘ 1:2 Afa. 1:16; Fil. 1:3; Kul. 1:3; 2 Ts. 1:3. ◘ 1:3 Yḥ. 6:29. ◘ 1:5 1 Kur. 2:4; 4:20; 1 Ts. 2:1. ◘ 1:6 1 Kur. 4:16; 11:1; Fil. 3:17; 2 Ts. 3:9. ◘ 1:10 Řex. 1:11; Fil. 3:20; 2 Ts. 1:10; Asa. 1:7.
☰