35
Aɛqab n Yaɛqub ɣar Bayt-Il
1 Uca inna AREBBI i Yaɛqub: “Kkar, geɛɛed ɣar Bayt-Il uca qqim din. Egg din ijj n uɛalṭar min xef i ɣa tessarsed taɣarṣt i Arebbi, wenni d ac dd-ibanen umi dd-tarewřed zeg uɣembub n umac Ɛisu.”
2 Xenni inna Yaɛqub i řwacun n taddart nnes u i marra inni tuɣa akides: “Kksem irebbiten iɣriben nni iǧan jar awem, sizedgem ixef nwem uca beddřem arruḍ nwem.
3 Ad nekkar, ad ngeɛɛed ɣar Bayt-Il. Necc ad ggeɣ din ijj n uɛalṭar i Arebbi nni xafi dd-yarrin deg wass n řeḥṣaret inu, d wenni tuɣa akidi deg webrid nni uyureɣ.”
4 Uca wcin i Yaɛqub marra irebbiten iɣriben nni tuɣa ɣarsen uřa d tixrazin deg imezzuɣen nsen uca iffar i-ten Yaɛqub sadu tcejjart n yigg i tuɣa zzat i Cakim.
5 Řami fesyen iqiḍan, uyuren ssenni, tuɣa tiggʷudi n AREBBI x tneddam nni tuɣa di jjwayeh i d asen dd-innḍen, ařami nitni war ḍeffaren iḥenjiren n Yaɛqub.
6 Ammu i yiweḍ Yaɛqub ɣar Luz di temmurt n Kenɛan, aqa-tt d Bayt-Il, netta d marra řgens i tuɣa akides.
7 Ibna din ijj n uɛalṭar uca iřaɣa i wemcan nni Il-Bayt-Il, minzi dinni i d as dd-iḍhar AREBBI, umi dd-yarweř zeg uɣembub n umas.
8 Temmut Dibura, tamesseṭṭaḍt n Rifqa uca neḍřen tt swadday i Bayt-Il, sadu tabeǧuḍt uca iřaɣa isem nnes ‘Allun-Bakut’, aqa-tt d ‘tabeǧuḍt n imeṭṭawen’.
9 Iḍhar as-dd ɛawed AREBBI i Yaɛqub umi dd-idweř zi Fadan-Aram uca ibark i-t.
10 Inna as AREBBI: “Isem nnec d Yaɛqub. Zi ssa d tsawent war tteggen ɛad isem nnec ‘Yaɛqub’, maca ‘Israil’, d wa i ɣa yiřin d isem nnec.” Uca isemma t Israil.
11 Inna as AREBBI: “Necc d Arebbi, Amzemmar x kuřci! Egg řɣiǧet, mmarniy! Zzayek i ɣa iffeɣ ijj n řgens, wah, d ijj n wegraw n řegnus ad ffɣen zzayek u ijeǧiden ad ffɣen zi tejɛinna nnec.
12 Uca tammurt-a i wciɣ i Ibrahim d Isḥaq, i cek umi tt i ɣa wceɣ uca uřa i zzariɛet nnec awarni ac ad wceɣ tammurt.”
13 Xas uca igeɛɛed AREBBI sennej zeg wemcan mani kides issiweř.
14 Yaɛqub issgeɛɛed ijj n weẓru n řidaret deg wemcan mani kis issiweř, ijj n weẓru n řidaret. Iseyyeb xas ict n tewhibt n useyyeb uca ifarreɣ zzect x uzeǧif nnes.
15 Igga Yaɛqub isem n wemcan mani kides issiweř AREBBI ‘Bayt-Il!’
Axřaq n Binyamin d řmewt n Raḥil
16 Fesyen nitni iqiḍan nsen, ffɣen zi Bayt-Il uca umi tuɣa tteggwijen mɣir cwayt x Ifrata, xenni turuw-dd Raḥil u teɛdu xas tarwa teqseḥ.
17 Imsar, umi teɣɣuḍed di tarwa nnes, tenna as řqabřa: “War tteggʷed, aqa wa ɛawed ad yiři d mmim!”
18 Řami teḍřeq i buḥbeř am temmut din, aqa třaɣa as Bin-Uni, isem-a ixs ad yini ‘mmis n řeḥriq inu’, maca babas iřaɣa as Binyamin, ixs ad yini ‘mmis n zzhar inu’.
19 Ammu i temmut Raḥil uca neḍřent tt deg webrid ɣar Ifrata, ixs ad yini Bayt-Laḥm.
20 Uca igga Yaɛqub ijj n weẓru n řidaret x wenḍeř nnes. D wa d aẓru n řidaret n Raḥil x wenḍeř n Raḥil ař ass-a.
21 Xas uca ifsi Israil iqiḍan uca iwta aqiḍun nnes x uɛeddu n Majdal-Ɛidr.
22 Umi izdeɣ Israil di temmurt nni, imsar belli Rubin iruḥ iṭṭeṣ ak-d Bilha, tayya n babas, uca yiweḍ ad t ifhem Israil.
Aqa řexxu iwḍen ayt n Yaɛqub tenɛac.
23 Tarwa n Liya tuɣa aten: Rubin, amenzu n Yaɛqub d Cimɛun d Lawi d Yahuda d Issakar d Zabulun.
24 Tarwa n Raḥil tuɣa aten: Yusuf d Binyamin.
25 Tarwa n Bilha, tayya n Raḥil, tuɣa aten: Dan d Naftali.
26 Tarwa n Zilpa, tayya n Liya, tuɣa aten: Jad d Acir. Ina tuɣa aten d iḥenjiren n Yaɛqub inni d as dd-ittwaxeřqen di Fadan-Aram.
Řmewt n Isḥaq
27 Uca yusa-dd Yaɛqub ɣar babas Isḥaq di Mamri, di tendint n Arbaɛ, tenni iǧan d tandint n Ḥabrun, mani tuɣa Ibrahim izeddeɣ am ubarrani, uca Isḥaq amenni awarni as.
28 Iddar Isḥaq mya u-tmanyin n iseggʷusa.
29 Iḍřeq Isḥaq i buḥbeř, immut uca immarni ɣar řgens nnes, iwsar, ijjiwen zi tudart, uca Ɛisu d Yaɛqub, iḥenjiren nnes, neḍřen t.