1 “Uca cek ad ɣarek dd-tessqarrbed Harun, umac, d warraw nnes akides zi řwesṭ n ayt n Israil, ḥima ad ayi ɛebden am yikehhanen, Harun, Nadab, Abihu, Aliɛazar d Itamar, zeg warraw n Harun. ◘

2 Ad tegged arruḍ iqeddsen i Harun, umac, ad as yiři i uɛuǧi d telwizt. 3 Ad tessiwřed ɣar marra inni iǧan d imiɣisen n wuř, inni ccureɣ s arruḥ n tiɣit, maḥend ad ggen arruḍ i Harun, ḥima ad as ssqeddsen d akehhan i Necc. 4 Ina d arruḍ i ɣa ggen: ict n tejmect d ijj n upalṭu d ijj n useřham d ict tcamir imuden am ijj n ureqqam n ufennan, d ict n areẓẓet d ict n tḥezzamt. Ad ggen arruḍ iqeddsen i Harun, umac, u i warraw nnes, ḥima ad ayi sexxaren am ukehhan. 5 Nitni ad ksin ifiřan n wureɣ d afiřu adeḥmi d urjuwani d uzeggʷaɣ iḥedqen d řeqṭen azdad, 6 uca ad ggen apalṭu s ifiřan n wureɣ u s ufiřu adeḥmi d urjuwani d uzeggʷaɣ iḥedqen u s řeqṭen azdad imuden, ad yiři am řxedmet n ufennan. ◘ 7 Ad ɣares yiři tnayen n tɣarḍin immseřsaqen ɣar tnayen n ṭṭrufa nnes i zi ɣa ittwassmun upalṭu. 8 Taḥezzamt izewwqen, wenni iǧan x upalṭu nnes n ukehhan, ad zzayes tᵉttwagg d icten akides, s ifiřan n wureɣ u s ufiřu adeḥmi d urjuwani d uzeggʷaɣ iḥedqen u s řeqṭen azdad imuden. 9 Ad teksid tnayen n iẓra n uniks uca ad xasen tneqced ismawen n ayt n Israil. 10 Setta n ismawen x yijj n weẓru d setta n ismawen nneɣni x weẓru nneɣni ɛlaḥsab asettef n wexřaq nsen. 11 D man aya d ict n ṣṣenɛet n uneqqac n weẓru iɣřan. Am ict n txadent n ucemmiɛ, ammu i ɣa ttwaneqcen tnayen n yeẓra s ismawen n ayt n Israil. Ad asen tegged ticuyar n wureɣ i d as dd-innḍen. 12 Ad tegged iẓra nni x tɣarḍin n upalṭu, aqa aten d iẓra n řidaret i ayt n Israil. Harun ad yarbu ismawen nsen i řidaret zzat i wudem n SIDI x tnayen tɣarḍin nnes. 13 Ad tegged ticuyar n wureɣ 14 uca ɛawed tnayen n ssnaseř n wureɣ iṣfan. Ad ten tegged amecnaw ifiřan, amecnaw ict n řxedmet n umudi. Ad tcedded ssnaseř imuden ɣar tcuyar.

15 Ad tegged tajmect i řeḥkam. Ad tt tegged am řxedmet n ufennan, am upalṭu n ukehhan. Ad tt tegged s ifiřan n wureɣ u s ufiřu adeḥmi d urjuwani d uzeggʷaɣ iḥedqen u s řeqṭen azdad imuden. ◘ 16 Tajmect ad tiři s arebɛa n tɣemmura, tᵉttwaḍfeṣ. Tuzzeggart nnes ad tiři d ijj n wezyen n uɣiř, u tiru nnes d ijj n wezyen n uɣiř. 17 Ad xas tegged iẓra, arebɛa n řeṣfuf n iẓra. Ijj n ṣṣef ad yiři s yijj n řeɛqiq d azeggwaɣ d ict n tyaqut d ict n smaraxt. Wa d ṣṣef amezwaru. 18 Ṣṣef wiss tnayen ad yiři s yijj n karbunkel d yijj n ṣaffir aziza d yijj n diamanti. 19 Ṣṣef wiss třata ad yiři s yijj n weẓru n yasintu d yijj n axat d yijj n umatist. 20 U ṣṣef wiss arebɛa ad yiři s yict n texrisulit d yijj n uniks d yijj n yaspis. Ina ad ttwaṭṭfen deg wureɣ di tcuyar nsen. 21 Iẓra ad xasen iřin ismawen n ayt n Israil, tenɛac n yeẓra ɛlaḥsab ismawen nsen, s ineqqacen n txadent n ucemmiɛ, kuř aneqqic ɛlaḥsab isem nnes i d as dd-yusin. Aqa aten i tenɛac n tqebbař. 22 Ad tegged ssnaseř x tejmect, ifiřan imuden n wureɣ iṣfan. 23 Ad tegged tnayen n texrazin n wureɣ ɣar tejmect uca ad tcedded tnayen n texrazin nni ɣar tnayen n ṭṭrufa n tejmect. 24 Ad tcedded tnayen n ssnaseř n wureɣ imuden ɣar tnayen n texrazin ɣar řeḍruf n tejmect. 25 Ad tcedded tnayen n ixfawen n tnayen n ssnaseř imuden ɣar tnayen n tcuyar uca ad tent tcedded ɣar tɣarḍin i iǧan ɣar uɣezdis n zzat n upalṭu n ukehhan. 26 Ad tegged ɛawed tnayen n texrazin n wureɣ uca ad tent tegged ɣar tnayen n ixfawen n tejmect ɣar swadday, x tma nsen nni iǧan ɣar upalṭu, ɣar daxeř. 27 Ad tegged tnayen n texrazin n wureɣ, tinni i ɣa tcedned x tnayen n tɣarḍin n upalṭu n ukehhan, swadday, ɣar zzat, qibač i useřqi nnes ɣar sennej i tḥezzamt izewwqen n upalṭu. 28 Ad tessmuned tajmect s texrazin nnes ɣar texrazin n upalṭu ak-d ijj n ufiřu imuden adeḥmi, maḥend ad tiři tejmect sennej i tḥezzamt izewwqen n upalṭu uca war tᵉttbeṭṭi tejmect x upalṭu. 29 Ammu i ɣa yawi Harun ismawen n ayt n Israil di tejmect n řeḥkam x wuř nnes x minni i ɣa yadef ɣar Uqeddas, ařami i ɣa qqimen i řidaret zzat i wudem n SIDI i řebda. 30 Ad tessarsed iẓra n ‘Urim’ d ‘Tummim’ di tejmect n řeḥkam, maḥend ad iřin x wuř n Harun x minni i ɣa yadef zzat i wudem n SIDI. Ammu i ɣa yarbu Harun řebda řeḥkam n ayt n Israil x wuř nnes zzat i wudem n SIDI.

31 Ad tegged aseřham n upalṭu n ukehhan marra zeg ufiřu adeḥmi. ◘ 32 Ad yiři warzam i uzeǧif nnes di řwesṭ nnes. Ɣar tma n warzam ad din tiři ict n tma imuden, tenni i ɣa yiřin am warzam i yiri deg ijj n warruḍ n wuzzař n uɛeskari, war tᵉttcarrig. ◼ 33 Ɣar tmuwwa nnes ad tegged tiremmanin n ifiřan adeḥmi d urjuwani d uzeggʷaɣ iḥedqen, ɣar tmuwwa nnes i d as dd-innḍen, u jar asent ad tegged nnwaqes n wureɣ i d as dd-innḍen. 34 Ijj awarni i wenneɣni, ijj n nnaqus n wureɣ d ict n tremmant, uca ɛawed ijj awarni i wenneɣni, ijj n nnaqus n wureɣ d ict n tremmant, ammu i ɣa iřin ɣar tmuwwa n useřham u deg wenneḍ nnes. 35 Harun ad t yarḍ xmi ittssexxar netta, ařami i ɣa ittwaseř ddriz nnes x minni i ɣa yadef ɣar Zzawect Iqeddsen zzat i wudem n SIDI u xmi ɣa iffeɣ ɛawed, ḥima war ittmetti.

36 Ad tegged ict n teřwiḥt s nnuwwar n wureɣ iṣfan uca ad xas tneqced awařen-a am mammec neqqcen taxadent n ucemmiɛ: “AMQEDDAS i SIDI.” ◘ 37 Ad tt tcedded ɣar yijj n ufiřu adeḥmi x areẓẓet. Ad tiři teřwiḥt ɣar zzat n ureẓẓet. 38 Ad tiři teřwiḥt x tenyart n Harun, ḥima Harun ad yarbu řmuɛṣiyyet i iǧan di tmesřayin iqeddsen nni i ɣa ssqeddsen ayt n Israil ak-d marra tiwhibin n tmesřayin nsen iqeddsen. Ad tiři řebda x tenyart nnes, ḥima ad iřint tmesřayin nni arḍant zzat i wudem n SIDI.

39 Ad tegged tcamir s řeqṭen azdad. Ad tegged areẓẓet ɛawed s řeqṭen azdad. Taḥezzamt ad tt tegged am ijj n umudi n uxeyyaḍ.”*

40 “I warraw n Harun ad tegged tcamir u ad asen tegged tiḥezzamin u ad asen tegged ticuccay, maḥend ad asen iřin i uɛuǧi d telwizt. 41 Ad tessyarḍed Harun, umac, d warraw nnes i kides iǧan, uca cek ad ten tdehned, ad ten třeqqmed u ad ten tessqeddsed, ḥima ad ayi xedmen am yikehhanen. 42 Egg asen ssraweř n řeqṭen, ḥima ad dřen aysum n useḍḥi nsen. Ad iřin zi tejɛinna uca ad awḍen ɣar ifadden. 43 Ssřaweř nni ad iřin x arrimet n Harun d warraw nnes xmi ɣa yadfen ɣar Uqiḍun n Umsagar niɣ xmi dd ɣa qarrben ɣar uɛalṭar maḥend ad sexxaren di Zzawect Iqeddsen, ḥima war dd-ttiwyen řmuɛṣiyyet uca ad mmten. Ta ad tiři d ict n tewṣeyyet i řebda i netta u i zzariɛet nnes awarni as.”