1 “Ad tegged aɛalṭar n ukeccuḍ n ukasiya n xemsa n iɣaǧen di tuzzeggart d xemsa n iɣaǧen di tiru. Ad yiři s arebɛa n tɣemmura u řuɛřa nnes ad yiři třata n iɣaǧen. ◘ 2 Ɣar arebɛa n tɣemmura ad tegged accawen nnes. Accawen nnes ad dewřen d ijjen akides uca ad t třeḥḥfed s nnḥas. ◼ 3 Ad tegged tiydurin nnes, ḥima ad daysent tenḍared iɣɣeḍ n min iqqimen n tadunt nnes ittwacemḍen uca ad tegged ɛawed iɣenjayen nnes d ṭṭawyat nnes i urucci d furcayat nnes d tmejmarin nnes. Ad tegged marra řeqcuɛ nnes s nnḥas. 4 Ad tegged ict n tracca, ict n umudi n nnḥas, uca ad tegged arebɛa n texrazin n nnḥas i umudi nni, ɣar arebɛa n tɣemmura nnes. 5 Ad t tzeyyared sadu i tma n uɛalṭar, swadday, maḥend ad yiři umudi n nnḥas nni ɣar wezyen n uɛalṭar. 6 Ad tegged iɛumad i tarebbut i uɛalṭar, iɛumad n ukeccuḍ n ukasiya uca ad ten třeḥḥfed s nnḥas. 7 Iɛumad nnes ad ttwassidfen di texrazin. Ad iřin iɛumad i tarebbut ɣar tnayen n iɣezdisen n uɛalṭar xmi t ɣa arbun. 8 Ad tegged ijj n řxawi ɣar daxeř n tfeřwin. Am mammec i d ac imřa x wedrar, ammu i t ɣa ggen nitni.

9 Ad tegged řemraḥ n Tzeddiɣt. Ɣar jjihet n ljanub, ɣar yefus, ad tegged řizarat s řeqṭen azdad imuden, kuř ict zzaysent n mya n iɣaǧen di tuzzeggart i yijj n uɣezdis. ◘ 10 Ɛicrin n ipilaren nnes d ɛicrin n tyarsawin nnes ad iřin n nnḥas. Tisennarin n ipilaren d iqeḍban nsen i useřqi ad iřin n nnuqart. 11 Ammu ɣar jjihet n ccamal, di tuzzeggart, ad din iřint řizarat n mya iɣaǧen. Ad iřin ɛicrin n ipilaren nsent d ɛicrin n tyarsawin nsen n nnḥas. Tisennarin n ipilaren d iqeḍban nsen i useřqi ad iřin n nnuqart. 12 Di tiru n řemrah, ɣar uɣezdis n řɣarb, ad din iřint řizarat n xemsin n iɣaǧen di tuzzeggart ak-d ɛecra n ipilaren nsent d ɛecra n tyarsawin nsen. 13 Tiru n řemraḥ ɣar uɣezdis n ccarq, zi manis dd-tneqqar tfuct, ad tiři xemsin iɣaǧen. 14 Řizarat ɣar yijj n uɣezdis n zzat ad iřint xemmesṭac n iɣaǧen di tuzzeggart, ak-d třata n ipilaren nsent d třata n tyarsawin nsen. 15 Ɣar uɣezdis n zzat nneɣni ad din iřint ɛawed řizarat n xemmesṭac n iɣaǧen di tuzzeggart ak-d třata n ipilaren nsent d třata n tyarsawin nsen. 16 Ɣar wadaf n řemraḥ ad din yiři ijj n arwaq n ɛicrin n iɣaǧen, ggin t s ufiřu adeḥmi d urjuwani d uzeggʷaɣ iḥedqen u s řeqṭen azdad imuden, ijj n umudi n uxeyyaḍ, ak-d arebɛa n ipilaren nnes d arebɛa n tyarsawin nsen. 17 Marra ipilaren i d as dd-innḍen i řemraḥ ad iřin s iqeḍban n nnuqart i useřqi uca tisennarin nsen ad iřint n nnuqart d tyarsawin nsen n nnḥas. 18 Tuzzeggart n řemraḥ ad tiři mya n iɣaǧen u tiru ad tiři xemsin n iɣaǧen d xemsin ɛawed uca řuɛřa ad yiři xemsa n iɣaǧen, marra s řeqṭen azdad imuden uca tyarsawin nsen ad iřint n nnḥas.

19 Marra řeqcuɛ n Tzeddiɣt i iǧan i marra tasexxart nnes uřa d marra řewtad nnes d marra řewtad n řemraḥ ad iřin n nnḥas. *

20 Ad tumured ayt n Israil, ḥima ad ac dd-awyen zzect teṣfa teddez zi zzitun i tfawt, ḥima ad tareɣ tfawt řebda. ◘ 21 Harun d warraw nnes ad ḥḍan man aya zi ǧiřet ař ṣṣbeḥ zzat i wudem n SIDI deg Uqiḍun n Umsagar zzat i uřeḥḥaf i iǧan zzat i Cchadet. D man aya ad yiři d ict n tewṣeyyet i řebda nni ittxeṣṣa ad tᵉttwaḥḍa zi jjihet n ayt n Israil di marra jjiřat nsen.”