15
Izři n uɣelleb n Musa
1 Řexdenni izehhed Musa jmiɛ ak-d ayt n Israil zhid-a i SIDI, nnan:
“Ad zehhdeɣ i SIDI,
minzi Netta yuɛřa di řuɛřa!
Ayis d wenni xas yenyin
inḍar i-ten di řebḥar.
2 SIDi d jjehd inu d azehhed inu.
Netta idweř d asenjem inu.
Wa d Arebbi inu,
necc ad t ssemɣareɣ.
Netta d AREBBI n baba,
necc ad t ssɛuǧeɣ!
3 SIDI d aryaz n umenɣi,
SIDI d Isem nnes!
4 Ikarruten n firɛun d řɛeskar nnes
inḍar i-ten di řebḥar
u acewwar n ineɣrafen nnes n řɛeskar
ɣarqen di Řebḥar n Telga.
5 Aman ihewřen dřin i-ten.
Amecnaw aẓru, hwan ɣar řaǧaɣ.
6 A SIDI, afus afusi nnec
ittwaɛezz s jjehd,
afus afusi nnec,
a SIDI, aqa iřbez řeɛdu.
7 S řemɣaret n uɛuǧi nnec tᵉteḥḥid
inni kik ittemɛařan.
Mařa tessekked řḥaduq n weɣḍab nnec,
ad ten yecc wanita amecnaw iɣeǧ.
8 S usuḍi n wenzaren nnec
ɛurrcen waman,
ttwassbedden tseǧya am weɣbar,
aman ihewřen jemden
di řwesṭ n řebḥar.
9 Inna řeɛdu: ‘Ad ten aredfeɣ,
ad ten ɛduɣ,
ad bḍiɣ řmur,
řeɛmar inu ad zzaysen ijjiwen,
ad dd-jebdeɣ ssif inu,
afus inu ad zzaysen ikkes řwart nsen.’
10 Tsuḍed s nnefs nnec
uca ideř i-ten řebḥar.
Nitni hwan-dd am řexfif
deg waman imɣaren.
11 A SIDI, man wen i iǧan
am Cek jar irebbiten?
Wi iǧan am Cek,
d wenni ittwassɛuǧen di tqeddast,
amweqqar deg izřan n uṣebbeḥ,
man wen itteggen řeɛjayeb am Cek?
12 Tesswiẓẓḍed afus afusi nnec,
tsarḍ i-ten temmurt.
13 Cek tgewwded řgens-a
s tmexsiwt nnec icuwwaren,
aqa tefdid t,
s jjehd nnec tnedhed ten
ɣar Tzeddiɣt Iqeddsen nnec.
14 Řegnus sřin x uya uca arjijen.
Teṭṭef teggʷudi deg imezdaɣ n Filicit.
15 Řexdenni imeqqranen n tqebbař
n Idum ttbehten,
inni ɣar teǧa ṣṣulṭa di Mu’ab
ttarjijen,
u marra imezdaɣ n Kenɛan aqa fesyen!
16 Tewḍa xasen řɛurret d tiggʷudi.
S řemɣaret n uɣiř nnec
seɣden am weẓru,
ařami iẓwa řgens nnec, a SIDI,
ařami iẓwa řgens-a
i tkesbed i Yixef nnec.
17 Cek ad ten tnedhed
uca ad ten teẓẓud
x wedrar n řwart nnec,
amcan i teggid d Tazeddiɣt nnec,
a SIDI, Zzawect Iqeddsen
i iggin ifassen nnec, a Sidi inu.
18 SIDI ad iḥkem i řebda qaɛ!
19 Minzi ayis n firɛun yudef ɣar řebḥar
s ikarruten nnes d imnayen nnes
uca iqřeb xasen SIDI ɛawed
aman n řebḥar.
Maca ayt n Israil ẓwan x řaẓaɣ
di řwesṭ n řebḥar.”
20 U Maryam, tanabit, učmas n Harun, teksi aǧun deg ufus nnes u marra timeṭṭa ffɣent awarni as s ibendiren d ccḍiḥ s nnubtat.
21 Xenni tarra-dd xasen Maryam snnubet nnes: “Ɣennjem i SIDI, minzi aqa Netta yuɛřan aṭṭas! Inḍar ayis ak-d wenni xas yenyin di řebḥar.”
22 Xenni ijja Musa řgens n Israil ad ifsi iqiḍan nsen, inni iǧan x tma n Řebḥar n Telga, uca ruḥen di řexřa n Cur, uyuren třata n wussan di řexřa břa ad afen aman.
23 Uca iwḍen ɣar Mara, maca war zemmaren ad swen aman n Mara, minzi tuɣa aten d imerzagen. X uya ggin as i wemcan nni ‘Mara’.
24 Innedqem řgens x Musa, inna: “Min ɣa nsu?”
25 Netta iřaɣa i SIDI uca SIDI immeř as ijj n ukeccuḍ uca inḍar i-t daxeř deg waman uca dewřen waman d imiẓiden. Din i d as igga i řgens ict n tewṣeyyet d ict n lfariḍa u dinni i-ten iqeǧeb.
26 Inna: “Mařa tesřid mliḥ i wawař n SIDI, AREBBI nnec, teggid min iǧan nican di tiṭṭawin nnes, ad tesřed i řumarat nnes, ad teḥḍid marra tiweṣṣa nnes, xenni Necc war d awem-dd ssekkiɣ řehřac i dd-ssekkeɣ x Miṣra, minzi Necc d SIDI, Amesgenfi nnec!”
27 Řexdenni iwḍen ɣar Ilim, mani tuɣa tenɛac n řɛunṣarat n waman, d sebɛin n tcejjura n tini uca wtin iqiḍan nsen dinni zzat i waman.