14
Musa d řgens ẓwan Řebḥar n Telga
1 Xenni issiweř SIDI ak-d Musa, inna:
2 “Siweř ak-d ayt n Israil, maḥend ad dd-dewřen uca ad wten iqiḍan nsen zzat i Fi-Haxirut, jar Migdul d řebḥar, qibač i Baɛal-Ṣafun. Arendad nnes ad tewtem iqiḍan nwem x tma n řebḥar.
3 Xenni ad yini firɛun x ayt n Israil: ‘Aqa nitni weddaren di temmurt, aqa řexřa iḥṣar i-ten.’
4 Uca Necc ad ssqesḥeɣ uř n firɛun, ḥima ad ten iḍfar u Necc ad ttwassɛuǧiɣ x firɛun u x marra řɛeskar nnes uca ad ssnen Imiṣriyyen belli Necc d SIDI.” Uca ammu i tt ggin nitni.
5 Uca xebbaren i ujeǧiḍ n Miṣra belli řgens yarweř. Xenni ibeddeř wuř n firɛun d imsexxaren nnes x řgens uca nnan: “Mammec i negga aya, nessekk Israil zi tesmuɣi i iggin i neccin?”
6 Uca iḥezzem Firɛun akarru nnes, iksi akides řgens nnes.
7 Iksi akides setta-mya n ikarruten icewwaren d marra ikarruten n Miṣra uca igga acewwar n ineɣrafen zi řɛeskar nnes x kuř ijj zzaysen.
8 Aqa isseqseḥ SIDI uř n firɛun, ajeǧid n Miṣra, uca yardef netta ayt n Israil, maca ayt n Israil tuɣa ffɣen s yijj n ufus ittwassgeɛɛden.
9 Aredfen ten Imiṣriyyen uca iwḍen ɣarsen s marra iysan d ikarruten n firɛun d imnayen nnes d řɛeskar nnes, ɣar Fi-Haxarut, ɣar ujemmaḍ n Baɛal-Ṣafun, mani wtin iqiḍan nsen ɣar řebḥar.
10 Řami ten dd-yudes firɛun, ssgeɛɛden ayt n Israil tamuɣři nsen, ẓrin belli Imiṣriyyen ḍfaren ten-dd uca nitni ggʷeden aṭṭas. Xenni sɣuyen ayt n Israil ɣar SIDI.
11 Nnan i Musa: “Ma war ǧin ɛad imeḍřan di Miṣra ař d aneɣ dd-tawyed, maḥend ad nemmet di řexřa-ya? Maɣar teggid ammu, tessuffɣed aneɣ-dd zi Miṣra?
12 Ma war kidek nessiweř marra awařen-a di Miṣra, nenna: ‘Ejj aneɣ ad nexdem i Imiṣriyyen’? Xar mařa tuɣa neqqim nexdem i Imiṣriyyen x mařa nemmut di řexřa.”
13 Xenni inna Musa i řgens: “War tteggʷedem, beddem, texzarem asenjem n SIDI i d awem ɣa yewc ass-a, minzi Imiṣriyyen nni tᵉttwařam ass-a, ɛemmarṣ ad ten tẓarem ɛad i řebda.
14 SIDI ad xawem immneɣ uca kenniw ad tseɣdem waha.”
15 Inna SIDI i Musa: “Mayemmi ɣari tᵉttřaɣid? Ini i ayt n Israil ḥima ad fesyen iqiḍan nsen.
16 Sgeɛɛed taɣɣarct nnec, swiẓẓeḍ afus nnec x řebḥar uca farq i-t, ḥima ad iẓwa ayt n Israil x řbarr di řwesṭ n řebḥar.
17 Xzar, Necc ad ssqesḥeɣ uř n Imiṣriyyen, maḥend ad ten aredfen di řebḥar u Necc ad ssɛuǧiɣ Ixef inu s firɛun u s marra řɛeskar nnes, ikarruten nnes d imnayen nnes n iysan.
18 Ad ssnen Imiṣriyyen belli Necc d SIDI, xmi ɣa ttwassɛuǧiɣ s firɛun, s ikarruten nnes d imnayen nnes n iysan.”
19 Xenni immuṭṭi lmalak n AREBBI nni yuyuren zzat i řɛeskar n Israil uca idweř ɣar ḍeffar nsen: aqellij n useynu immuṭṭi zi zzat i wudem nsen uca ibedd ɣar ḍeffar nsen.
20 Yudef uqellij jar řɛeskar n Imiṣriyyen d řɛeskar n Israil. Tuɣa aseynu d taǧest ɣar uɣezdis-a u issiɣ i uɣezdis nneɣni s ǧiřet u war dd-iqarreb ijjen ɣar wenneɣni ǧiřet tekmeř.
21 Uca isswiẓẓeḍ Musa afus nnes x řebḥar uca iɛarn SIDI xenni řebḥar ɣar uɣezdis s yijj n usemmiḍ d acarqi ijhed, marra ǧiřet nni, uca yarra řebḥar ad ijeffef. Ammu i ttwammsebḍan waman.
22 Uyuren ayt n Israil x min yuẓɣen di řwesṭ n řebḥar uca aman ggin amecnaw řḥiḍ x yefus nsen d uzeřmaḍ nsen.
23 Aredfen ten Imiṣriyyen, ruḥen awarni asen di řwesṭ n řebḥar s marra iysan n firɛun d ikarruten nnes d imnayen nnes n yiysan.
24 Řami d yeffu řḥař, imsar belli SIDI iṣweḍ ɣar řɛeskar n Imiṣriyyen zeg uqellij n tmessi d iseynuten uca issxarweḍ řɛeskar n Miṣra.
25 Ijja tijarrarin n ikarruten nsen ad fesxent, ařami idweř iwɛar xasen ad uyuren ɣar zzat. Řexdenni nnan Imiṣriyyen, kuř ijjen zzaysen i yixef nnes: “Ittxeṣṣa ayi ad arewřeɣ zi zzat n tiṭṭawin n Israil, minzi SIDI immneɣ di ṭṭweɛ nsen ḍidd i Imiṣriyyen.”
26 Inna SIDI i Musa: “Swiẓẓeḍ afus nnec x řebḥar, ḥima ad dewřen waman x Imiṣriyyen, x ikarruten nsen u x imnayen nsen n iysan.”
27 Xenni isswiẓẓeḍ Musa afus nnes x řebḥar u ɣar řefjar n ṣṣbeḥ idweř řebḥar ɣar mani t tuɣa qbeř uca arewřen Imiṣriyyen nican ḍidd nnes uca iɣḍeř SIDI Imiṣriyyen di řwesṭ n řebḥar.
28 Dewřen-dd waman uca ttwaneḍřen ikarruten d imnayen n iysan n marra řɛeskar n firɛun i tuɣa yudef awarni asen ɣar řebḥar. War zzaysen iqqim uřa d ijjen.
29 Maca ayt n Israil uyuren x min yuẓɣen di řwesṭ n řebḥar u aman tuɣa ggin amecnaw řḥiḍ ɣar yefus nsen d uzeřmaḍ nsen.
30 Ammu i issenjem SIDI Israil deg wass nni zeg ufus n Imiṣriyyen uca Israil iẓra Imiṣriyyen i immuten x tma n řebḥar.
31 Iẓra Israil afus imɣaren i igga SIDI deg Imiṣriyyen uca iggʷed řgens zi SIDI, uca umnen nitni di SIDI u di Musa, amsexxar nnes.