37
Tanukra n Israil
1 Tuɣa ufus n SIDI xafi uca SIDI issuffeɣ ayi-dd di Arruḥ uca issars ayi di řwesṭ n řewḍa nni tuɣa yeccuren s iɣsan.
2 Netta indeh ayi deg wenneḍ nnes, u xzar, aqa din aṭṭas s waṭṭas n iɣsan x wudem n řewḍa, u xzar, aqa aten uẓɣen aṭṭas.
3 Netta inna ayi: “A mmis n bnadem, ma ad ddaren iɣsan-a ɛawed?” Nniɣ necc: “A Sidi inu, SIDI, Cek tessned t!”
4 Xenni inna ayi: “Nabb x yeɣsan-a, ini asen: ‘A iɣsan uẓɣen, sřem i wawař n SIDI.
5 Ammu i iqqar Sidi inu, SIDI, i iɣsan-a: Xzar, Necc ad daywem ssidfeɣ buḥbeř uca ad teddarem ɛawed.
6 Ad xawem ggeɣ iẓewran u ad xawem ssgeɛɛdeɣ aysum uca ad kenniw dřeɣ s iřem uca ad daywem ggeɣ buḥbeř, ad teddarem ɛawed. Xenni ad tessnem belli Necc d SIDI.’ ”
7 Řami tuɣa ttnabbeɣ am mammec d ayi ittwaweṣṣa, uca tuɣa din ijj n řḥess řami tuɣa ttnabbeɣ, u xzar, aqa da ict n tarjijit uca iɣsan munen, kuř iɣes ak-d iɣes nnes.
8 Ẓřiɣ, u xzar, aqa dewřen xasen-dd iẓewran u yuři xasen weysum u Netta idřa i-ten s yiřem sennej nsen, maca war daysen tuɣi ɛad buḥbeř.
9 Netta inna ayi: “Nabb i Arruḥ, nabb, a mmis n bnadem, uca ini i Arruḥ: ‘Ammu i iqqar Sidi inu, SIDI: As-dd zi arebɛa n tɣemmura n usemmiḍ, a Arruḥ, u suḍ deg ina inni ittwanɣen, ḥima ad ddaren.’ ”
10 Xenni nabbeɣ am mammec i d ayi ittwaweṣṣa. Uca yudef Arruḥ daysen uca ddaren ɛawed uca kkaren bedden x iḍaren nsen, aqa d ijj n řɛeskar d ameqqran aṭṭas s waṭṭas.
11 Xenni inna ayi: “A mmis n bnadem, iɣsan-a aqa aten marra taddart n Israil. Xzar, nitni qqaren: ‘iɣsan nneɣ uẓɣen uca řayas nneɣ iweddar u neccin nettwaqḍeɛ!’
12 S uya, nabb, ini asen: ‘Ammu i iqqar Sidi inu, SIDI: Xzar, Necc ad arzmeɣ imeḍřan nwem, ad kenniw ssgeɛɛdeɣ zeg imeḍřan nwem, a řgens inu, u Necc ad kenniw awyeɣ x wudem n temmurt n Israil.
13 Kenniw ad tessnem, belli Necc d SIDI, umi arzmeɣ imeḍřan nwem uca ssuffɣeɣ-dd kenniw zeg imeḍřan nwem, a řgens inu.
14 Necc ad ggeɣ Arruḥ inu daywem di daxeř nwem u kenniw ad teddarem ɛawed u Necc ad kenniw ssarseɣ x wudem n temmurt nwem u kenniw ad tessnem belli Necc, SIDI, ssiwřeɣ uca ggiɣ t, ammu i iqqar SIDI.’ ”
Asmuni n Israil d Yahuda
15 Yusa-dd ɣari wawař n SIDI, inna:
16 “Cek, a mmis n bnadem, ksi ijj n uzeǧaḍ n ukeccuḍ uca ari dayes: ‘I Yahuda u i arraw n Israil, imɛacaren nnes!’ Ksi awarni as azeǧaḍ nneɣni uca ari dayes: ‘I Yusuf, azeǧad n Ifrayim, u i marra taddart n Israil, imeddukkař nnes!’
17 Smun ten xenni ijj ak-d wenneɣni, egg zzaysen ijj n uzeǧaḍ i cek. Ad dewřen d ijj deg ufus nnec.
18 Xmi kik i ɣa issiwřen tarwa n řgens nnec, ad inin: ‘Ma war texsed ad aneɣ tessecned min ixs ad inint tmesřayin-a i cek?’,
19 ini asen: ‘Ammu i iqqar Sidi inu, SIDI: Xzar, Necc ad ksiɣ azeǧaḍ n Yusuf, wenni iǧan deg ufus n Ifrayim, azeǧaḍ n tqebbař n Israil, imɛacaren nnes, uca ad ten ssmuneɣ ak-d uzeǧaḍ n Yahuda uca ad ten ggeɣ d ijj n uzeǧaḍ uca ad dewřen d ijj deg ufus inu.’
20 Izeǧaḍen zeg ukeccuḍ i x turid, ad iřin deg ufus nnec zzat i tiṭṭawin nsen.
21 Xenni ini asen: ‘Ammu i iqqar Sidi inu, SIDI: Xzar, Necc ad ṭṭfeɣ ayt n Israil zi řwest n řegnus mani ɣar uyuren uca ad ten ssmuneɣ zeg wenneḍ uca ad ten awyeɣ ɣar wudem n temmurt nsen.
22 Necc ad ten ggeɣ d ijj n řgens di temmurt, x idurar n Israil, d ijj n Ujeǧid ad yiři i marra idsen d Ajeǧid uca ɛemmarṣ ɛad ad iřin i tnayen n řegnus u ɛemmarṣ ɛad ad ttwabḍan di tnayen n tgeldiwin.
23 War ssxemmajen ɛad ixef nsen s imeyḍa nsen n l’aṣnam, s nnɛawat nsen n l’aṣnam u s řmuɛṣiyyat nsen. Necc ad ten ssnejmeɣ zi marra tineddam nsen i di xḍin nitni u Necc ad ten ssizedgeɣ. Xenni nitni ad ayi iřin d řgens u Necc ad asen iřiɣ d AREBBI.
24 Amsexxar inu Dawud ad xasen yiři d ajeǧid uca ad din yiři ijj n Umeksaw i marra nitni. Nitni ad ḍfaren lfarayiḍ inu uca ad ḥḍan tiweṣṣa inu, ad zzaysent ggen.
25 Ad zedɣen di temmurt nni wciɣ i umsexxar inu Yaɛqub, i di tuɣa zeddɣen řejdud nwem, wah, nitni ad dayes zedɣen i řebda, nitni d iḥenjiren nsen d iḥenjiren n iḥenjiren nsen, uca Amsexxar inu Dawud ad yiři d Řḥakem nsen i řebda.
26 Necc ad kidsen qeḍɛeɣ ijj n Řɛahd n řehna, ad yiři d Řɛahd i řebda. Necc ad ten barkeɣ u ad daysen arniɣ aṭṭas u Necc ad ggeɣ Zzawect inu Iqeddsen di řwesṭ nsen i řebda.
27 Ad ɣarsen tiři Tzeddiɣt inu u Necc ad iřiɣ d AREBBI nsen u nitni ad iřin d řgens inu,
28 uca ad ssnen řegnus, belli Necc d SIDI nni issqeddsen Israil xmi ɣa tiři Zzawect inu Iqeddsen di řwesṭ nsen i řebda.’ ”