36
Asizdeg d ureqqeɛ n Israil
1 “Cek, a mmis n bnadem, nabb i idurar n Israil, ini: ‘Idurar n Israil, sřem i wawař n SIDI!
2 Ammu i iqqar Sidi inu, SIDI: Minzi řeɛdu inna xawem: Iya, aqa řegɛudi n řebda dewřent aneɣ d tasɣart! ...
3 ... s uya nabb, ini: Ammu i iqqar Sidi inu, SIDI: Minzi areddǧen u ṣarḍen kenniw zi marra iɣezdisen, ḥima ad tdewřem d tasɣart n min iqqimen n řegnus u minzi tᵉttwassekkaren xawem awařen uca tdewřem i uceqqaf jar řgens,
4 ... s uya, idurar n Israil, sřem i wawař n Sidi inu, SIDI! Ammu i iqqar Sidi inu, SIDI, i idurar d tewririn, i tɣezratin d řwaṭat, i řxirbat ttwareddǧent u i tneddam i ijjin, tinni idewřen i tkeccaḍt d řḥegra i min iqqimen n řegnus nni dd awem dd-innḍen,
5 ... s uya, ammu i iqqar Sidi inu, SIDI: S tidett, aqa di tmessi n tusmi inu iqeddsen ssiwřeɣ ḍidd i min iqqimen n řegnus u ḍidd i marra tammurt n Idum, inni iwcin tammurt inu d tasɣart i yixef nsen, s řefraḥet n wuř marra, s řeɛmar iccuren s useḥqar, maḥend ddmani n tarewsa ad asen iřint d takeccaḍt!
6 ... s uya, nabb ḍidd i temmurt n Israil uca ini i idurar d tewririn u i tɣezratin d řwaṭat: Ammu i iqqar Sidi inu, SIDI, xzar, Necc siwřeɣ di tusmi inu iqeddsen u deg wesɛar inu, minzi kenniw aqa tarbum řḥegra n řegnus.
7 ... s uya, ammu i iqqar Sidi inu, SIDI, Necc ssgeɛɛdeɣ afus inu, ẓuǧeɣ: S tidett, řegnus i d awem dd-innḍen ad arbun řḥegra s yixef nsen!
8 Maca kenniw, idurar n Israil, ad tewcem ɛawed řefruɛ nwem uca ad dd-tawyem řɣiǧet nwem i řgens inu Israil, minzi ɛřaḥař ad dd-asen.
9 Maɣar xzar, Necc ad iřiɣ akidwem uca Necc ad ɣarwem nqeřbeɣ u kenniw, a idurar, ad xawem carzen ɛawed u ad xawem zarrɛen.
10 Necc ad arniɣ iwdan xawem, marra taddart n Israil, wah, marra nettat, uca ad sszedɣen tineddam u ad bnan řxirbat ɛawed.
11 Ad xawem arniɣ iwdan d řmař u nitni ad arnin deg yixef nsen u ad dd-jjen řɣiǧet u Necc ad kenniw sszedɣeɣ din ɛawed, am deg wussan n wecḥař uya, wah, Necc ad arreɣ řḥař ḥsen x umezwar nwem u kenniw ad tessnem belli Necc d SIDI.
12 Ad jjeɣ iwdan ad xawem uyuren: řgens inu Israil. Nitni ad cek ṭṭfen d řwart, a řgens inu, u kenniw, a idurar n Israil, ad asen tiřim d řwart, u kenniw war tᵉttkeccaḍem ɛad arraw nsen.
13 Ammu i iqqar Sidi inu, SIDI: Minzi qqaren awem: Cem tᵉtted iwdan u cem d ict n temmurt i ittkeccaḍen arraw n řgens nnem! ...
14 ... s uya war tecced ɛad iwdan u war tessneqraḍed ɛad řgens nnem!, ammu i iqqar Sidi inu, SIDI.
15 Necc ad ggeɣ ɛemmarṣ ad tᵉttwaseř ɛad řḥegra n řegnus xam u war tkessid ɛad astehzi n řegnus u war tessneqraḍed ɛad řgens nnem!, ammu i iqqar Sidi inu, SIDI.’ ”
16 Yusa-dd ɣari wawař n SIDI, inna:
17 “A mmis n bnadem, umi tuɣa taddart n Israil tzeddeɣ di temmurt nnes, aqa ssxemmjen tt s webrid nsen d tmegga nsen. Abrid nsen tuɣa-t am řexmej n temɣart i x ǧan idammen deg wussan n weɛzař nnes.
18 Necc ssfarrɣeɣ xasen asɛar inu zi ssibbet n idammen nni ssizzřen x temmurt u zi ssibbet n imeyḍa n l’aṣnam nsem i zi tt ssxemjen.
19 Nexx ssbezzɛeɣ ten jar řegnus u nitni ttwassuysen di temmura. Necc ḥekmeɣ xasen ɛlaḥsab tuyurt nsen u ɛlaḥsab řexdayem nsen.
20 Umi iwḍen ɣar řegnus mani tuɣa uyuren, ssfeḍḥen Isem iqeddsen inu, minzi ittwanna xasen: ‘Ina d řgens n SIDI, maca tuɣa ittxeṣṣa ad ffɣen zi temmurt nnes.’
21 Maca Necc ssɛizzeɣ ten di ṭṭweɛ n Yisem inu iqeddsen nni tessefḍeḥ taddart n Israil jar řegnus mani tuɣa uyuren nitni ...
22 ... s uya, ini i taddart n Israil: Ammu i iqqar Sidi inu, SIDI: War tt tteggeɣ di ṭṭweɛ nwem, a taddart n Israil, maca di ṭṭweɛ n Yisem inu iqeddsen nni tessfeḍḥem kenniw jar řegnus mani tuɣa tuyurem.
23 Maɣar ad ssqeddseɣ Isem inu imɣaren nni tessfeḍḥem di řwest nsen, uca řegnus ad ssnen aqa Necc d SIDI, ammu i iqqar Sidi inu, SIDI, xmi ɣa ttwaqeddseɣ daywem zzat i tiṭṭawin nsen.
24 Minzi ad kenniw ksiɣ zi řegnus, ad kenniw ssmuneɣ zi marra timmura uca ad kenniw awyeɣ ɣar temmurt nwem.
25 Ad xawem zeǧɛeɣ aman izdigen uca ad ttwassizdegem. Necc ad kenniw ssizdegeɣ zi marra řexmujat nwem u zi marra imeyḍa nwem n l’aṣnam.
26 Ad awem wceɣ uř n jdid u ad ggeɣ buḥbeř amaynu di daxeř nwem uca ad kkseɣ zi arrimet nwem uř n weẓru uca ad awem wceɣ uř n weysum.
27 Ad ggeɣ Arruḥ inu di daxeř nwem u ad arreɣ kenniw ad teggem tiweṣṣa inu u ad teḥḍam lfarayiḍ inu u ad zzaysent teggem.
28 Ad tzedɣem di temmurt nni wciɣ i řejdud nwem, uca kenniw ad tiřim d řgens inu uca Necc ad iřiɣ d AREBBI nwem.
29 Necc ad kenniw ssnejmeɣ zi marra řexmujat nwem. Ad řaɣiɣ i imendi uca ad dayes arniɣ aṭṭas u war d awem tticeɣ řaẓ.
30 Ad arniɣ amenni řɣiǧet n tcejjura u n yeyyar, ḥima war xawem tekk ɛad řḥegra n řaẓ jar řegnus.
31 Xenni ad tidarem deg ibriden nwem iɛeffnen d tmegga nwem war iṣebḥen u kenniw ad tɛiffem zeg yixef nwem u zi jjɛayef nwem.
32 Maca war tt tteggeɣ di ṭṭweɛ nwem, ammu i iqqar Sidi inu, SIDI, snem tt mliḥ! Seḍḥam u ssnem řefḍiḥet n ibriden nwem, a taddart n Israil.”
33 “Ammu i iqqar Sidi inu, SIDI: ‘Deg wass nni ad ssizedgeɣ marra řmuɛṣiyyat nwem, ad sszedɣeɣ tineddam ɛawed uca ad bniɣ ɛawed řxirbat.
34 Tammurt ittwareddǧen ad tᵉttwacarz deg wemcan i ɣa tiři tᵉttwareddeǧ zzat i tiṭṭawin n marra inni tt iẓekkwan.
35 Ad inin: Tammurt nni tuɣa tᵉttwareddeǧ, tedweř am jjennet n Ɛadn u tineddam ttwaxarrabent d ttwareddǧent d ttwahedment, aqa ttwassjehdent u zeddɣen daysent imezdaɣ ɛawed.
36 Xenni ad ssnen řegnus nni iqqimen deg wenneḍ nwem, aqa Necc, SIDI, ad bniɣ min ittwahedmen ɛawed u ad ẓẓuɣ x min ittwareddǧen. Necc, SIDI, ssiwřeɣ u Necc ad t ggeɣ.’ ”
37 “Ammu i iqqar Sidi inu, SIDI: ‘Ad ayi tᵉttar taddart n Israil uřa d man aya ḥima ad asen t ggeɣ. Necc ad daysen arniɣ iwdan, ařami ad din iřin anect n iwdan am wuǧi.
38 Anect iǧan n wuǧi iqeddsen am wuǧi i ccuren tandint n Urcalim di řeɛyudat nnes ittwaggen, ammu i ɣa iřint tneddam ittwareddǧen ccurent s wuǧi d iwdan u nitni ad ssnen aqa Necc d SIDI.’ ”