6
1 “Tina d tiweṣṣa d lfarayiḍ nni yumur SIDI, AREBBI nwem, maḥend ad awem tent ssřemdeɣ, ḥima ad zzaysent teggem di temmurt i ɣar ɣa teẓwam maḥend ad tt teksim d řwart,
2 ḥima ad teggʷded SIDI, AREBBI nnec, uca ad teḥḍid marra tiweṣṣa nnes d řumurat nnes nni i d ac umureɣ, cek d mmic d mmis n mmic, marra ussan n tudart nnec, ḥima ussan n tudart nnec ad zzuggarten.
3 Seř, a Israil, ḥḍa ad zzaysent tegged, ḥima ad tiřid mliḥ u ḥima kenniw ad temmarnim s waṭṭas di temmurt ifeyyḍen s uɣi d tamment, am mammec tuɣa inna SIDI, AREBBI n řejdud nnec.”
4 “Seř, a Israil, SIDI, AREBBI nneɣ, SIDI d Ijj.
5 Ad texsed SIDI, AREBBI nnec, s marra wuř nnec u s marra řeɛmar nnec u s marra jjehd nnec.
6 Awařen-a nni i d ac umureɣ ass-a, ad iřin deg wuř nnec.
7 Ad ten tessiggzed i iḥenjiren nnec uca ad xasent tessiwřed xmi ɣa teqqimed di taddart nnec u xmi ɣa tuyured deg webrid u xmi ɣa tᵉṭṭṣed u xmi ɣa tekkared.
8 Ad ten tbeysed am yict n řeɛřamet deg ufus nnec, ad iřint am yijj n ufiřu n useggem jar tiṭṭawin nnec.
9 Uca ad ten tarid x řeḍruf ɣar uɣezdis n tewwart n taddart nnec u di tewwura nnec.”
10 “Uca ad imsar, xmi SIDI, AREBBI nnec, ad cek yawi di temmurt i x ijjuǧ i řejdud nwem, i Ibrahim d Isḥaq d Yaɛqub, maḥend ad ac tt iwc, s tneddam imɣaren icnan, tinni war tebnid cek
11 u s tudrin iccuren s marra řxar i zi war tent teccured cek, u s teɣzin nni cek war teɣzid, u s tzayarin d tzemmurin nni war teẓẓud cek. Uca xmi ɣa tecced u ad tejjiwned,
12 ḥḍa xenni maḥend war ttᵉttud SIDI wenni cek dd-issuffɣen zi temmurt n Miṣra, zi taddart n tesmuɣi.
13 Ad teggʷded SIDI, AREBBI nnec, ad t tɛebded u s Yisem nnes ad tejjaǧed.
14 War ggurem awarni i irebbiten nneɣni zi irebbiten n řegnus i d awem dd-innḍen
15 - minzi SIDI, AREBBI nwem d ijj n Arebbi ittasmen di řwesṭ nnec - ḥima war xak yareqq weɣḍab n SIDI, AREBBI nnec, uca ad cek iteḥḥa zeg wudem n temmurt.
16 War ttqeǧabem ca SIDI, AREBBI nwem, am mammec t tqeǧbem di Massa.
17 Ad teḥḍid nican řumurat n SIDI, AREBBI nwem uřa d cchadat nnes d tweṣṣa nnes nni i d ac yumur.
18 Egg min iǧan iseggden d min icnan di tiṭṭawin n SIDI, ḥima ad tiřid mliḥ u ḥima ad tadfed ɣar temmurt icnan i zi ijjuǧ SIDI i řejdud nnec, ḥima ad asen tt iwc.
19 ḥima ad taẓẓřed x marra řɛedyan zzat i wudem nnec, am mammec issiweř SIDI.”
20 “Xmi cek ɣa isseqsa mmic, ad yini: ‘Min teɛna cchadat d tweṣṣa d lfarayiḍ nni d awem yumur SIDI, AREBBI nneɣ?’,
21 xenni ad tinid i mmic: ‘Neccin tuɣa aneɣ d isemɣan n firɛun di Miṣra, maca SIDI issuffeɣ aneɣ-dd zi Miṣra s ufus ijehden.
22 SIDI igga, qibač i tiṭṭawin nneɣ, řeɛřamat d lmuɛjizat imɣaren d issiggʷden di Miṣra, ɣar firɛun u ɣar marra taddart nnes.
23 Uca issuffeɣ aneɣ-dd ssenni ḥima ad aneɣ issidef maḥend ad aneɣ yewc tammurt nni x ijjuǧ i řejdud nneɣ,ḥima ad asen tt iwc.
24 SIDI yumur aneɣ ad negg ɛlaḥsab marra tiweṣṣa-ya, ad neggʷed zi SIDI, AREBBI nneɣ, i řebda, di ṭṭweɛ n tizi nneɣ ḥima ad neddar am teǧa ass-a.
25 Man aya ad yiři d tasegda nneɣ xmi ɣa neḥḍa maḥend ad negg marra řumurat-a zzat i wudem n SIDI, am mammec d aneɣ yumur Netta.”