5
1 Iřaɣa Musa i marra Israil uca inna asen: “Sřem, a Israil, i tweṣṣa d lfarayiḍ, tinni i xef ssiwřeɣ necc ass-a deg imezzuɣen nwem, ḥima ad tent třemdem u ad tent teḥḍam maḥend ad zzaysent teggem.
2 SIDI, AREBBI nneɣ, igga ijj n Řɛahd akidneɣ di Ḥurib.
3 War iǧi ak-d řejdud nneɣ i igga AREBBI Řɛahd-a, maca akidneɣ, neccin, inni da ibedden ddaren marra ass-a.
4 Udem ak-d wudem issiweř akidwem SIDI x wedrar, zi řwesṭ n tmessi.
5 Tuɣa ayi di řweqt nni beddeɣ jar SIDI d kenniw ḥima ad kenniw ssaregbeɣ x wawař n SIDI, minzi tuɣa kenniw teggʷdem zi tmessi u war tgeɛɛadem ca ɣar wedrar. Uca Netta inna:
6 ‘Necc d SIDI, AREBBI nnec, wenni cek-dd issuffɣen zi temmurt n Miṣra, zi taddart n tesmuɣi.
7 War ɣarek ttiřin ca irebbiten nneɣni zzat i wudem inu.
8 War ttegg i yixef nnec ijj n řexyař ineqcen niɣ min ma řexyař n min din iǧan sennej deg ujenna niɣ swadday x temmurt niɣ deg waman sadu temmurt.
9 War d asen ttbendeq u ad asen tɛebded, minzi Necc, SIDI, AREBBI nnec, d ijj n Arebbi ittasmen, wenni dd-yarezfen řmuɛṣiyyet n ibabaten deg iḥenjiren ař jjiř wiss třata u wiss arebɛa n yinni d ayi icarrhen,
10 maca wenni issecnen tamexsiwt icewwaren i řuřuf n yinni d ayi ittexsen u ḥeṭṭan tiweṣṣa inu.
11 War neṭṭeq s Yisem n SIDI, AREBBI nnec, di řbaṭeř, minzi SIDI war ittbarri wenni i ɣa ineṭqen s Yisem nnes di řbaṭeř.
12 Ḥḍa ass n ssebt ḥima ad t tessqeddsed am mammec d ac yumur SIDI, AREBBI nnec.
13 Setta n wussan ad txedmed, ad tegged marra řxedmet nnec,
14 maca ass wiss sebɛa d ass n ssebt n SIDI, AREBBI nnec. War dayes tᵉttegged uřa d ict n řxedmet, cek lla uřa d mmic d yeǧic d yismeɣ nnec d tayya nnec d ufunas nnec d weɣyuř nnec d řebhayem nnec uřa d abarrani nni akik iǧan daxeř i tewwura nnec lla, ḥima ismeɣ nnec d tayya nnec ad areyyḥen am cek.
15 Ad tɛeqřem belli tuɣa cek d ismeɣ di temmurt n Miṣra u SIDI, AREBBI nnec, aqa issuffeɣ i cek-dd ssenni s yijj n ufus ijehden d ijj n uɣiř isswiẓẓḍen. X uya yumur cek SIDI, AREBBI nnec, ad teḥḍid ass n ssebt.
16 Weqqar babac d yemmac, am mammec i d ak yumur SIDI, AREBBI nnec maḥend ussan n tudart nnec zemmaren ad zzuggarten uca ad iffeɣ umeddur nnec mliḥ x wudem n temmurt i d ac ɣa iwc SIDI, AREBBI nnec.
17 War neqq.
18 War zenna.
19 War ttacar.
20 War cehhed s ẓur ḍidd i jjar nnec.
21 War ttegg meẓri di temɣart n jjar nnec u war ḍemmeɛ di taddart n jjar nnec, niɣ deg iyyar nnes, niɣ deg yismeɣ nnes, niɣ di tayya nnes, niɣ deg ufunas nnes, niɣ deg weɣyuř nnes, niɣ di ca zi marra min iǧan ɣar jjar nnec.’
22 Issiweř SIDI awařen-a ak-d marra agraw nwem n řgens s ict n tmijja ijehden x wedrar, zi řwesṭ n tmessi, zeg iseynuten u zeg useynu ibbumbes u war immarni ca ktar. Yuri ten x tnayen n teřwiḥin n weẓru uca iwca i-tent i necc.
23 Uca imsar, umi tesřim kenniw i tmijja zi řwesṭ n taǧest uca adrar icemmeḍ s tmessi, aqa tqarrbem-dd ɣari, marra izeǧifen n tqebbař nwem d imɣaren nwem,
24 tennam ayi: ‘Xzar, SIDI, AREBBI nneɣ, isscen aneɣ-dd aɛuǧi nnes d řemɣaret nnes uca nesřa i tmijja nnes zi řwesṭ n tmessi. Ass-a neẓra belli SIDI issiweř ak-d bnadem uca wa iqqim iddar.
25 Řexxu xenni, mayemmi ɣa nemmet? Minzi timessi-ya imɣaren ad aneɣ tecc. Mařa neqqim nᵉttesřa i tmijja n SIDI, AREBBI nneɣ, ad nemmet.
26 Minzi man wen i din yeǧan jar marra min ɣares arrimet, wenni isřan i tmijja n AREBBI iddaren tessiweř-dd zi řwesṭ n tmessi am neccin, d wenni iddaren ɛad?
27 Ad dd-tqarrbed cek u ad tesřed ɣar marra min ɣa yini SIDI, AREBBI nneɣ, uca xenni ad tessiwřed akidneɣ x marra min d ac ɣa yini SIDI, AREBBI nneɣ, u neccin ad as nseř uca ad zzayes negg.’
28 Isřa SIDI i tmijja n wawařen nwem umi kidi tessiwřem uca inna ayi SIDI: ‘Sřiɣ i tmijja n wawařen n řgens-a, awařen nni kik ssiwřen. Aqa mliḥ, marra kik ssiwřen nitni.
29 Iři ad asen immewc ijj n wuř maḥend ad ayi ggʷeden uca ad ḥḍan tiweṣṣa inu marra ussan qaɛ ḥima nitni d tarwa nsen ad iřin mliḥ i řebda!
30 Ruḥ, tinid asen: Dewřem-dd ɣar iqiḍan nwem!
31 Uca cek, bedd da kidi, ḥima ad akidek ssiwřeɣ tiweṣṣa d lfarayiḍ nni i d asen ɣa tessřemded ḥima ad zzaysent ggen di temmurt nni i d asen ɣa wceɣ d řwart.’
32 Ḥḍam ḥima ad teggem am mammec i d awem yumur SIDI, AREBBI nwem, war ttḥeyydem x man aya, war iǧi ɣar yefus uřa ɣar uzeřmaḍ.
33 Ad tuyurem marra abrid nni d awem yumur SIDI, AREBBI nwem, ḥima ad teddarem uca ad tiřim mliḥ u ḥima ad zzuggarten ussan nwem di temmurt nni i ɣa teksim d řwart.”