1 “Xenni nedweř-dd uca ngeɛɛed abrid n Bacan. Iffeɣ-dd Ɛuj, ajeǧid n Bacan, i umsagar akidneɣ, netta d marra řgens nnes, i garra di Idraɛi. ◘ 2 Xenni inna ayi SIDI: ‘War zzayes tteggʷed ca, minzi sellmeɣ t, netta d marra řgens nnes d temmurt nnes, ɣar ifassen nnec uca ad zzayes tegged am mammec teggid s Siḥun, ajeǧid n Imuriyyen nni tuɣa izeddɣen di Ḥacbun.’ ◘ 3 Uca SIDI, AREBBI nneɣ, isellem Ɛuj, ajeǧid n Bacan d marra řgens nnes ɣar ifassen nneɣ uca narniy t ař mani war nejji ad iqqim uřa d ijj n umarweř. 4 Di řweqt nni neṭṭef marra tineddam. War din tuɣi uřa d ict n tendint war zzaysen tt neṭṭif: settin n tneddam d marra jjihet n Arjub, tageldit n Ɛuj di Bacan. 5 Marra tineddam nni ttwafaryent s řeḥyuḍ d tiwwura d iɛumad i ubelleɛ. Sennej i uya tuɣa din aṭṭas n tneddam deg iyyaren. 6 Uca nḥarrem i-tent i uteḥḥi, am mammec negga zi Siḥun, ajeǧid n Ḥacbun. Di kuř tandint aqa nḥarrem iryazen d temɣarin d iḥenjiren i uteḥḥi. 7 Maca neksi i yixef nneɣ marra řebhayem d min iqqimen d takeccaḍt zi tineddam. 8 Ammu i neṭṭef di řweqt nni tammurt zi tnayen n ijeǧiden n Imuriyyen nni iǧan x ujemmaḍ n L’Urdun, zi teɣzart n Arnun ař adrar n Ḥarmun 9 - tenni umi qqaren Iṣayduniyyen s yisem n Hirmun Siryun u Imuriyyen qqaren as Sinir - 10 marra tineddam n řwaṭa yuɛřan d marra Jilɛad d marra Bacan ař Salxa d Idraɛi, marra tineddam n tgeldit n Ɛuj di Bacan. 11 Minzi mɣir Ɛuj, ajeǧid n Bacan, tuɣa iqqim zi min iqqimen n Irafawiyyen. Xzar, qama nnes d ict n qama n wuzzař, ma war iǧi di Rabba n ayt n Ɛammun? Tuzzeggart nnes tesɛa n iɣaǧen u tiru nnes arebɛa n n iɣaǧen, ɛbaren tt s uɣiř n ijj n weryaz. 12 Di řweqt nni neṭṭef tammurt-a d řwart, zi tendint n Ɛaruɛir, nni iǧan ɣar teɣzart n Arnun, uřa d azyen n idurar n Jilɛad ak-d tneddam nnes, uca wciɣ tt i Irubiniyyen d Ijadiyyen. ◘ 13 Min iqqimen n Jilɛad d marra Bacan, tageldit n Ɛuj, wciɣ tt i wezyen n teqbič n Manassa. Marra jjihet n Arjub ak-d marra Bacan qqaren as tammurt n Irafawiyyen. 14 Ya’ir, mmis n Manassa, iṭṭef marra tammurt n Arjub ař weymir i iǧan ak-d Ijacuriyyen d Imaɛkiyyen uca iřaɣa jjwayeh nni s yisem nnes: jjihet n Bacan, dcurat n Ya’ir. D wa d isem nsen ař ass-a.”

15 “I Makir wciɣ as Jilɛad. 16 I Irubiniyyen d Ijadiyyen wciɣ asen min iqqimen n Jilɛad ař teɣzart n Arnun, ař řwesṭ n iɣzar nni iǧan d aymir, ař tiɣzart n Yabbuq nni iǧan d aymir ak-d ayt n Ɛammun. 17 Ɛawed wciɣ asen Řewḍa d L’Urdun nni iǧan d aymir zi Kinnarat ař řebḥar n Řewḍa, Řebḥar Ameǧah, wadday n teysarin n wedrar n Fisja, ɣar uɣezdis n ccarq.” ◼

18 “Di řweqt nni weṣṣiɣ kenniw, nniɣ: ‘SIDI, AREBBI nwem, iwca awem tammurt-a, ḥima ad tt tᵉṭṭfem d řwart. Ittxeṣṣa ad teẓwam twejdem i umenɣi zzat i aytmatwem, ayt n Israil, marra ayt n umenɣi. ◘ 19 Iɛeddeř ad qqimen di tneddam nwem, tenni d awem wciɣ necc, mɣir temɣarin nwem d iḥenjiren nwem d řebhayem nwem - aqa ssneɣ belli ɣarwem aṭṭas n řebhayem - 20 ař ɣa iwc SIDI arraḥet i aytmatwem am mammec i d awem iwca, uca uřa d nitni ad ksin tammurt nni i d asen ɣa iwc SIDI, AREBBI nwem, d řwart x ujemmaḍ n yeɣzar n L’Urdun. Xenni iɛeddeř ad dd-tdewřem, kuř ijj ɣar tesɣart i d awem wciɣ necc i kuř ijjen zzaywem.’ 21 Di řweqt nni weṣṣiɣ i Yacuwa, nniɣ: ‘Tiṭṭawin nnec ẓrint marra min igga SIDI, AREBBI nwem, s tnayen n ijeǧiden-a. Ammu i ɣa yegg SIDI s marra tigeldiwin i ɣar ɣa teẓwid. ◘ 22 War zzaysen teggʷdem, minzi SIDI, AREBBI nwem, ad immneɣ di ṭṭweɛ nwem.’

23 Uca ẓuǧeɣ ɣar SIDI di řweqt nni, nniɣ: 24 ‘Sidi inu, SIDI! Cek tebdid ad tessecned i umsexxar nnec řemɣaret nnec d ufus nnec ijehden, minzi man arebbi i din deg ujenna niɣ di temmurt izemmar ad yegg řexdayem d jjehd am mammec ten tᵉttegged Cek? ◘ 25 Ejj ayi ad ẓwiɣ, zawgeɣ Cek, uca ad ẓarɣ tammurt icnan, tenni iǧan x ujemmaḍ n L’Urdun, aqa idurar nni icnan d Lubnan!’ 26 Maca SIDI iṣxeḍ xafi afugem nnes di ṭṭweɛ nwem uca war d ayi isři. Inna ayi SIDI: ‘Cfa min d ayi tᵉttared, aqa d aṭṭas. War kidi ssiwiř ɛad x tmesřact-a. ◘ 27 Aři ɣar tqiccat n Fisja uca sgeɛɛed tamuɣři nnec ɣar řɣarb, ɣar ccamal, ɛar ljanub u ɣar ccarq u xzar i tt s ixef n tiṭṭawin nnec, minzi war tẓekkʷwid ca L’Urdun-a. 28 Sellem řumur i Yacuwa, egg dayes uř u sejhed i-t, minzi netta ad iẓwa zzat i wudem n řgens-a uca netta ad ten yarr ad warten tammurt i ɣa tẓared x wedrar Fisja.’ 29 Uca neqqim di teɣzurt zzat i Bayt-Faɣur.”