2
1 “Xenni nedweř-dd uca nefsi iqiḍan uca nuyur ɣar řexřa, deg webrid ɣar Řebḥar n Telga, am mammec d ayi inna SIDI uca nenneḍ aṭṭas n wussan i idurar n Saɛir.
2 Xenni issiweř SIDI akidi, inna:
3 ‘Aṭṭas i tennḍem i wedrar-a, aqa cfa. Arrem azeǧif ɣar ccamal
4 uca umur řgens, ini: Ad tekkem kenniw x weymir n aytmatwem, ayt n Ɛisu, inni izeddɣen di Saɛir. Nitni ad zzaywem ggʷeden, maca ittxeṣṣa kenniw ad teḥḍam ixef nwem aṭṭas.
5 War kisen ttemɛařam, minzi war d awem tticeɣ uřa d ijj n cbar zi temmurt nsen, minzi Necc wciɣ idurar n Saɛir d řwart i Ɛisu.
6 Ad xasen tesɣem řeɛweč s nnuqart ḥima ad tzemmarem ad teccem u ad xasen tesɣem ɛawed aman s nnuqart ḥima ad teswem.
7 Minzi SIDI, AREBBI nnec, tuɣa ibarek i cek di marra řxedmet n ifassen nnec. Netta issen ticři nnec di řexřa-ya ameqqran. Marra arebɛin n iseggʷusa-ya tuɣa SIDI, AREBBI nnec, akidek uca war d ac ixeṣṣi walu.’ ”
8 “Umi nekka x yaytmatneɣ, ayt n Ɛisu nni tuɣa izeddɣen di Saɛir, x webrid n Řewḍa n Ilat d Ɛiṣyun-Jabir, nedweř-dd uca nekka x webrid n řexřa n Mu’ab.
9 Xenni issiweř akidi SIDI: ‘War ssaggʷad Mu’ab u war kisen ttmenɣam, minzi Necc war d awem tticeɣ walu d řwart zi temmurt nsen, minzi Necc wciɣ Ɛar d řwart i ayt n Luṭ.’
10 Tuɣa zeddɣen din Imiyyen, ijj n řgens d ameqqran d aṭṭas uca nitni d iziraren am Iɛanaqiyyen.
11 Nitni ttwaḥesben d Irafawiyyen am Iɛanaqiyyen uca ayt n Mu’ab qqaren as Imiyyen.
12 Uřa d Ixuriyyen tuɣa zeddɣen qbeř di Saɛir, maca ayt n Ɛisu ksin řwart nsen uca teḥḥan ten zzat i wudem nsen uca ggin zeddɣen din deg wemcan nsen, am mammec tuɣa ittegg Israil s temmurt n řwart nnes, tenni i d asen iwca SIDI.
13 ‘Kkarem řexxu, teẓwam teɣzurt n Zarad!’ Uca neẓwa teɣzurt n Zarad.
14 Tmenya u-třatin n iseggʷusa i nuyur zi Qadac-Barniɛ ařami neẓwa taɣzurt n Zarad, ařami iqḍa jjiř nni n iɛeskariyyen inni issnen amenɣi zi řwesṭ n řmargeḥ n řɛeskar, am mammec tuɣa d asen ijjuǧ SIDI.
15 Ammu i xasen tuɣa afus n SIDI, ḥima ad ten iteḥḥa zi řwesṭ n řmargeḥ n řɛeskar ařami qḍan marra.
16 Umi qḍan u mmuten marra iɛeskariyyen inni issnen amenɣi zi řwesṭ n řgens, imsar
17 aqa issiweř akidi SIDI, inna:
18 ‘Ass-a ad teẓwid aymir n temmurt n Mu’ab, ɣar tendint n Ɛar.
19 Ad dd-tqarrbed ɣar urendad n ayt n Ɛammun. War ten ttessiggʷid ca, war xasen ttɛeddid ca, minzi war d awem tticeɣ řwart zi temmurt n ayt n Ɛammun, minzi wciɣ tt d řwart i ayt n Luṭ.’
20 Tᵉttwaḥseb uřa d Ɛammun d ict n temmurt n Irafawiyyen. Tuɣa Irafawiyyen zeddɣen din qbeř u Iɛamuniyyen qqaren asen Izamzumiyyen.
21 Tuɣa-ten d ijj n řgens imɣar aṭṭas, d azirar n waddud am Iɛanaqiyyen. Tuɣa yareddeǧ i-ten SIDI zzat i wudem nnes u nitni ksin řwart nsen uca zeddɣen deg wemcan nsen.
22 Tuɣa Netta igga ammu ɛawed i ayt n Ɛisu, inni tuɣa izedɣen di Saɛir, maɣar iteḥḥa Ixuriyyen zzatsen uca nitni ksin řwart nsen uca zeddɣen din ař ass-a.
23 Uca Ikafturiyyen nni tuɣa iffɣen zi Kaftur, teḥḥan Iɛawiyyen, inni tuɣa izeddɣen di dcurat ař Ɣazza, uca nitni ggin ad din zedɣen ař ass-a.
24 ‘Kkarem, fesyem iqiḍan nwem uca ẓwam taɣzurt n teɣzart n Arnun. Xzar, wciɣ Siḥun, ajeǧid n Ḥacbun, Amuri, d temmurt nnes deg ifassen nwem. Bda ad tt teksid uca tadfed akides ɣar garra.
25 Ass-a ad bdiɣ ad arreɣ tiggʷudi d řɛurret zzayek x marra řegnus sadu ajenna marra, inni i xak ɣa isřen řexbar uca ad arjijen u ad qdiddsen zzatek.’
26 Xenni ssekkeɣ ireqqasen zi řexřa n Qadimut ɣar Siḥun, ajeǧid n Ḥacbun s wawařen n řehna, nniɣ:
27 ‘Ad kkeɣ x temmurt nnec d abrid, x webrid ad raḥeɣ. War heyyḍeɣ x webrid ɣar yefus uřa ɣar uzeřmaḍ.
28 Ad ayi tezzenzed macca i nnuqart ḥima ad cceɣ, aman ad ayi ten tewced i nnuqart ḥima ad sweɣ. Ad ẓwiɣ x iḍaren inu waha
29 - am mammec d ayi sarrḥen ayt n Ɛisu nni izeddɣen di Saɛir d ayt n Mu’ab nni izeddɣen di Ɛar - ařami ɣa ẓwiɣ L’Urdun ɣar temmurt i d aneɣ ɣa iwc SIDI, AREBBI nneɣ.’
30 Maca Siḥun, ajeǧid n Ḥacbun war ixs ad aneɣ yejj ad tt neẓwa, minzi SIDI, AREBBI nnec, isseqsaḥ buḥbeř nnes, u isseqsaḥ uř nnes ḥima ad t isellem deg ifassen nnec, am teǧa ass-a.
31 Uca inna ayi SIDI: ‘Xzar, Necc bdiɣ ad sellmeɣ Siḥun d temmurt nnes ɣarek. Bda ad tt teksid ḥima ad twarted tammurt nnes.’
32 Xenni iffeɣ-dd Siḥun ɣar umsagar akidneɣ, netta ak-d marra řgens nnes, i garra di Yahaṣ.
33 SIDI, AREBBI nneɣ, isellem aneɣ t uca narni t, netta d iḥenjiren nnes d marra řgens nnes.
34 Neksi marra tineddam nnes uca nḥarrem kuř tandint i uteḥḥi, iryazen d temɣarin d iḥenjiren, war nejji ad iqqim uřa d ijj n umarweř.
35 Mɣir řebhayem d min ittwakeccḍen zi tneddam aqa neksi aya d tkeccaḍt i yixef nneɣ.
36 Zi Aruɛir nni yeǧan ɣar tma n teɣzart n Arnun, u zi tendint nni yeǧan di teɣzurt ař Jilɛad, war din tuɣi uřa d ict n tendint tuɛřa xaneɣ ɛad. SIDI, AREBBI nneɣ, isellem aneɣ marra.
37 Maca cek war dd-tqarrbed ca ɣar temmurt n ayt n Ɛammun, marra min tuɣa ɣar tma n teɣzart n Yabbuq d tneddam x idurar, u war dd-tqarrbed ca ɣar uřa d ict n temmurt i d aneɣ iḥarrem SIDI.”