1 “Ad imsar, mařa tesřid mliḥ i tmijja n SIDI, AREBBI nnec, ad teḥḍid marra tiweṣṣa nnes, tinni d ac ttumureɣ ass-a ḥima ad tent tegged, xenni ad cek issuɛřa SIDI, AREBBI nnec, x marra řegnus n temmurt. ◘ 2 Marra lbarakat-a ad xak dd-asent, ad ac dd-awḍent, mařa tesřid i tmijja n SIDI, AREBBI nnec.

3 Ad tᵉttwabarked di tendint u ad tᵉttwabarked deg iyyar. 4 Ad tᵉttwabarek řɣiǧet n uɛeddis nnec d řɣiǧet n temmurt nnec d řɣiǧet n řebhayem nnec d twarura n tfunasin nnec d imeẓyanen iɛizzen n wuǧi nnec. 5 Ad tᵉttwabarek tsuǧet nnec d tebqect nnec. 6 Ad tᵉttwabarked ɣar wadaf nnec, ad tᵉttwabarked deg wuffuɣ nnec.”

7 “SIDI ad isellem řɛedyan nnec, inni xak ɣa ikkaren d ibarḥaḍ zzat i wudem nnec. Ad xak dd-ffɣen deg webrid d ijj uca ad arewřen zzat i wudem nnec x sebɛa n ibriden. 8 SIDI ad ac yumur s lbaraka di tesrafin nnec u x marra min igga ufus nnec. Netta ad cek ibarek di temmurt nni i d ac ɣa iwc SIDI, AREBBI nnec. 9 SIDI ad cek yarr ad tekkared am yijj n řgens iqeddsen i Yixef nnes am mammec i d ac ijjuǧ, xmi ɣa teḥḍid tiweṣṣa n SIDI, AREBBI nnec, uca ad tuyured deg ibriden nnes. 10 Marra řegnus n temmurt ad ẓaren belli Isem n SIDI ittwadenna xak uca ad zzayek ggʷeden. 11 SIDI ad ac iwc řxar s ufeyyeḍ di řɣiǧet n uɛeddis nnec u di řɣiǧet n řebhayem nnec u di řɣiǧet n temmurt nnec, di temmurt nni ijjuǧ SIDI i řejdud nnec ad ac tt-i-dd-iwc. ◘ 12 SIDI ad ac yarzem tawwart n wexxam nnes n txubay iṣeřḥen, ijenwan, ḥima ad iwc anẓar i temmurt nnec di řweqt nnes u ḥima ad ibarek marra řxedmet n ufus nnec. Ad tarḍřed i waṭṭas n řegnus, maca cek war xasen tareṭṭřed. 13 SIDI ad cek yarr d azeǧif, war iǧi d unewwar, uca cek waha ad tiřid sennej, war tᵉttiřid swadday, mařa tesřid i tweṣṣa n SIDI, AREBBI nnec, wenni i d ac ttumureɣ ass-a ḥima ad tent teḥḍid uca ad zzaysent tegged. 14 War ttḥeyyid ca ɣar yefus uřa ɣar uzeřmaḍ x marra awařen nni d ac umureɣ ass-a ařami ɣa teḍfared irebbiten nneɣni, ad xasen tsexxared. 15 Maca ad imsar, mařa war tesřid i wawař n SIDI, AREBBI nnec, ḥima ad teḥḍid marra řumurat d tweṣṣa nnes i x d ac ttumureɣ ass-a, ḥima ad zzaysent tegged, xenni marra nnɛaři-ya ad xak dd-hwant u ad cek řeqfent:◘

16 Ad tiřid d amenɛuř di tendint u ad tiřid d amenɛuř deg iyyar. 17 Tasuǧet nnec d tebqect nnec ad iřint ttwaneɛřent. 18 D tamenɛuřt i ɣa tiři řɣiǧet n uɛeddis nnec d řɣiǧet n temmurt nnec u twarura n tfunasin nnec d imeẓyanen iɛizzen n wuǧi nnec. 19 Ad tiřid d amenɛuř ɣar wadaf nnec u ad tiřid d amenɛuř deg uffuɣ nnec.”

20 “Ad ac dd-issekk SIDI nneɛřet d uxarweḍ d uheddi ɣar marra mani isswiẓẓed ufus nnec, ař ɣa tᵉttwamḥid u ad tefnid deɣya zzat i wudem inu di ssibbet n řexdayem nnec tiɛeffanin, minzi tejjid ayi. 21 SIDI ad dayek isseřṣeq ṭṭaɛun ař cek ɣa iqḍa zi temmurt nni ɣar ɣa tadfed ḥima ad tt teksid d řwart. 22 SIDI ad cek iwwet s bu-deǧis, s tmessi n arwaḥ d ugeyyeḥ, s řeḥmu d řaẓaɣ, s imendi ittwasscemḍen zeg usemmiḍ uřa d jjriḥect n wefsu. Ina ad cek ḍfaren ař ɣa thellked. ◘ 23 Ajenna nni iǧan tiwa i uzeǧif nnec ad yiři d nnḥas u tammurt nni iǧan sadu nnec d uzzař. ◘ 24 Ad yarr SIDI, AREBBI nnec, anẓar n temmurt nnec d ijj n useynu n řeɛjaj d ibquqen n řeɛjaj. Man aya ad xak dd-ihwa ař ɣa tᵉttwateḥḥid. 25 SIDI ad cek yarr tᵉttwaɣeřbed zzat i wudem n řɛedyan nnec. Deg ijj n webrid ad dd-teffɣed ḍidd i řeɛdu nnec uca ad tarewřed zzat i wudem nnes x sebɛa n ibriden uca ad tiřid d ict n řqecɛet n unexřiɛ i marra tigeldiwin n ddunect. 26 Řxecbet nnec ad tiři d macca i ijḍaḍ n ujenna u i marra řmař x temmurt uca uřa d ijj war izemmar ad ten issiggʷed. 27 SIDI ad cek iwwet s tḥebba n Miṣra, s iɛebbuzen, s jdam, s wajjiḍ ař ɣa taf war tzemmared ad teggenfid. ◘ 28 SIDI ad cek iwwet s tubbuheřya, s tuddarɣeč u s arjef n wuř.”

29 “Deg wezyen n uziř ad tḥadid am uḥadi n udarɣař di taǧest. Ibriden nnec war ttiřin ṣeřḥen, wah, ad tiřid tᵉttwaḥṣared u tᵉttwakeccḍed marra ussan n tudart nnec uca war ittiři wi cek ɣa issenjmen. 30 Ad txeḍbed ict n temɣart uca ijj n weryaz nneɣni ad tt issnuqqeb, ad tebnid taddart i yixef nnec uca war dayes tzeddɣed, ad teggid ijj n umarjeɛ n uḍiř ad dayes teẓẓud tizayarin maca war zzaysent testenfiɛed. 31 Afunas nnec ad ittwaɣarṣ zzat i tiṭṭawin nnec uca war zzayes tᵉttetted, aɣyuř nnec ad t ucaren zzat i wudem nnec uca war d ac dd-ittɛiqqib. Uǧi nnec ad t wcen i řɛedyan nnec uca war ɣarek ittiři wi ɣa issenjmen. 32 Ad mmewcen iḥenjiren nnec d tḥenjirin nnec i yijj n řgens nneɣni. Tiṭṭawin nnec ad twařant uca ad daysen temmeẓred ass ikmeř uca war ittiři jjehd deg ufus nnec. 33 Řɣiǧet n temmurt nnec d marra řxedmet nnec ad t icc ijj n řgens i war tessined uca ad tiřid teḥṣared u ad třebzed waha marra ussan n tudart nnec. 34 Ad tdewřed d abuhaři zi ssibbet n min ɣa tẓared s tiṭṭawin nnec.”

35 “SIDI ad cek iwwet s tḥebba tiɛeffanin ɣar ifadden u ɣar iḍaren i zi war tzemmared ad zzaysen teggenfid, zi třeqqa n uḍar nnec ař aceqquf n uzeǧif nnec. 36 SIDI ad cek yarr jmiɛ ak-d ujeǧid nnec, wenni cek ɣa tegged x yixef nnec, ad traḥed ɣar ijj n řgens nni war tessined ca, uřa d řejdud nnec, uca din i ɣa tsexxared i irebbiten nneɣni n ukeccuḍ d weẓru. 37 Ad tiřid d ict n řqecɛet n unexřiɛ d ijj n umedya d ict n ssibbet i ustehzi iqesḥen jar marra řegnus mani cek ɣa indeh SIDI. 38 Ad tessuffɣed aṭṭas n zzariɛet ɣar yeyyar uca ad třeqḍed drus, minzi tamurɣi ad tt teḥřuw. ◘ 39 Ad teggid imarjaɛen n uḍiř ad daysen teẓẓud tizayarin uca ad tent tɛarrṣed, maca war tsessed binu uca war třeqqḍed walu, minzi ad tent icc ukecca. 40 Ad ɣarek iřin izemmuren di marra tammurt nnec, maca war tdehhned ixef nnec s zzect, minzi ad iwḍa zzitun zeg uzemmur nnec qbeř řweqt. 41 Ad dd-tejjed iḥenjiren d tḥenjirin, maca war ttiřin ca nnec, minzi ad ruḥen di tmeḥbast. 42 Marra ticejjura d řɣiǧet n temmurt nnec ad tent tᵉṭṭef tmurɣi d tasɣart nnes. 43 Abarrani nni iǧan di řwesṭ nnec, ad xak issuɛřa ixef nnes, sennej u sennej ɛad, uca cek ad tᵉttwassehwid ɣar temmurt, swadday ɣar wadday. 44 Netta ad ac yarḍeř, maca cek war d as tareṭṭřed. Netta ad yiři d azeǧif, cek ad tiřid d anewwar. 45 Uca ad xak dd-hwant marra nnɛaři-ya, ad cek ḍfarent, ad cek řeqfent ař ɣa tᵉttwamḥid, umi war tesřid i tmijja n SIDI, AREBBI nnec, ḥima ad teḥḍid řumurat nnes d tiweṣṣa nnes, inni d ac yumur Netta. 46 Ad iřint d ict n řeɛřamet d ijj n usiggʷid yewɛaren i cek u i zzariɛet nnec i řebda. 47 Minzi war tsexxared i SIDI, AREBBI nnec s řefraḥet d tcuni n wuř zi ssibbet n ufeyyeḍ n marra min din iǧan, 48 ad tsexxared i řɛedyan, inni i xak ɣa issekk SIDI, s řaẓ d ufadi, s tuɛɛaryent d řexṣeṣ n marra timesřayin, uca Netta ad igg azayřu n wuzzař x yiri nnec, ař cek ɣa imḥa. 49 SIDI ad xak dd-issgeɛɛed ijj n řgens iggʷej, zeg uneggaru n temmurt, am yijj n ugider iṭṭawen, ijj n řgens i umi war tzemmared ad tfehmed iřes nnes, ◼ 50 ijj n řgens ɣares udem iqḍeɛ, war ittweqqar awessar, war yareḥḥem x uḥenjir. 51 Ad yecc řɣiǧet n řebhayem nnec d řɣiǧet n temmurt nnec, ař ɣa tᵉttwamḥid, minzi war d ac ittejji irden, niɣ binu n jdid, niɣ zzect n ṭṭri, niɣ twarura n tfunasin nnec niɣ imeẓyanen iɛizzen n wuǧi nnec, ař cek i ɣa yareddeǧ. 52 Ad cek iḥṣar jar marra tewwura nnec, ař ɣa wḍan řeḥyuḍ yuɛřan imetnen, inni x tuɣa tᵉttecřed di marra tammurt nnec. Ad cek iḥṣar jar marra tewwura nnec di marra tammurt nni d ac iwca SIDI, AREBBI nnec. 53 Xmi d ak-dd ɣa innḍen u di řeḥṣaret i zi cek ɣa iḥṣaren řɛedyan nnec, ad tecced řɣiǧet n uɛeddis nnec d weysum n iḥenjiren nnec d tḥenjirin nnec nni d ac ɣa iwc SIDI, AREBBI nnec. ◘ 54 Aryaz nni i yareḍben u wenni iḍebɛen aṭṭas ad tiři tamuɣři nnes d taɛeffant ɣar umas u ɣar temɣart n wuř nnes u ɣar min d as iqqimen zeg iḥenjiren nnes, 55 maḥend war ittic uřa i yijj zzaysen ca n weysum n iḥenjiren nnes, inni i ɣa yecc umi war d as iqqim ca zi marra man aya di řeḥṣaret u di ḍḍiqa i zi xak ɣa ibezzez řeɛdu nnec di marra tiwwura nnec. 56 Tamɣart i yareḍben u tenni iḍebɛen aṭṭas, ɛemmarṣ war teggi třeqqa n uḍar nnes x temmurt di ssibbet n warḍab u n weḍbeɛ nnes, ad tiři tmuɣři nnes d taɛeffant ɣar weryaz n wuř nnes u ɣar mmis d yeǧis, 57 di ssibbet n llufan nni dd-iffɣen jar iḍaren nnes u di ssibbet n iḥenjiren nni turuw, minzi ad ten tecc s tnuffra di ssibbet n řexṣeṣ n marra di řeḥṣaret u di ḍḍiqa i xak ɣa ibezzez řeɛdu nnec di marra tiwwura nnec.”

58 “Mařa war teḥḍid marra awařen n Ccariɛa-ya nni yuran deg wedlis-a ittwannḍen maḥend ad teggʷeded Isem-a iɛuǧan, issaggʷaden, SIDI, AREBBI nnec, 59 xenni ad yarr SIDI jjrayeḥ nnec d jjrayeḥ jar zzariɛet nnec d ijj n arjef ař ṭṭarf. Ad iřint d jjrayeḥ mɣarent, ad dument, uca ad iřin řehřacat iɛeffnen i ɣa iqqimen ɣar zzat. 60 Netta ad ɣarek dd-yarr marra řehřacat n Miṣra i zi tuɣa teggʷded uca ad dayek řeṣqent. 61 Amenni ad ɣarek dd-yarr SIDI marra řehřacat d marra jjrayeḥ nni war yurin deg wedlis ittwanḍen n Ccariɛa-ya, ař ɣa tᵉttwamḥid. 62 Ad teqqimed ak-d ijj n wuru n yeryazen deg wemcan i di ɣa tiřim am yitran n ujenna deg waṭṭas, umi war tesřid i tmijja n SIDI, AREBBI nnec. 63 Am mammec zzaywem ifarḥ SIDI ḥima ad daywem igg tcuni u ad awem ittmarni, ammu zzaywem i ɣa ifarḥ SIDI maḥend ad kenniw ihellek u maḥend ad kenniw iteḥḥa uca kenniw ad tᵉttwaqeřɛem zi temmurt nni ɣar ɣa tadfed ḥima ad tt teksid d řwart. ◘ 64 SIDI ad ac ibezzeɛ x marra řegnus, zeg ujemmaḍ n ddunect ař ujemmaḍ nneɣni n ddunect uca din ad tsexxared i irebbiten nneɣni n ukeccuḍ d weẓru nni war tessined cek niɣ řejdud nnec. ◘ 65 War tᵉttifed řhudnet jar řegnus-a uca tařeqqa n uḍar nnec war tᵉttif areyyaḥ, minzi SIDI ad ac iwc din uř yarejfen d tmuɣři txessi d ijj n řeɛmar isřawen. 66 Tudart nnec ad ac tiři am tuyeř zzat nnec, ad tiřid teggʷeded ǧiřet d wass uca war ittiři weḍman x tudart nnec. 67 Ɣar ṣṣbeḥ ad tinid: ‘A, iři ad tiři d ǧiřet!’ u di ǧiřet ad tinid: ‘A, iři ad yiři d ṣṣbeḥ!’ zi ssibbet n tiggʷudi deg wuř nnec i d ac issiggʷiden u zi ssibbet n min ɣa twařint tiṭṭawin nnec. 68 SIDI ad cek yarr ɣar Miṣra deg iɣurruba x webrid min xef d ac nniɣ: ‘War t tẓarred ɛemmarṣ!’, uca din ad tezzenzem ixef nwem i řɛedyan nnec d isemɣan d tiyya, maca war ittiři wi kenniw i ɣa isɣen.”

69 Ina d awařen n Řɛahd nni yumur SIDI i Musa ḥima ad t igg ak-d ayt n Israil di temmurt n Mu’ab, sennej i Řɛahd i kidsen igga ɣar Ḥurib.