27
Adrar n Ɛibal d wedrar n Jirizim
1 Musa, ak-d imɣaren n Israil, yumur řgens, inna:
“Ḥḍam marra tiweṣṣa-ya, tinni d awem umureɣ necc ass-a.
2 Ad imsar deg wass umi ɣa teẓwam iɣzar n L’Urdun ɣar temmurt nni d ac ɣa iwc SIDI, AREBBI nnec, aqa ad tessbedded iẓra imeqqranen uca ad ten tḥennced s jjar.
3 Ad dayes tarid marra awařen n Ccariɛa-ya, xmi ɣa teẓwid ḥima ad tadfed ɣar temmurt nni d ac ɣa iwc SIDI, AREBBI nnec, ict n temmurt ifeyyḍen s uɣi d tamment, am mammec i d ac inna SIDI, AREBBI n řejdud nnec.
4 Xmi ɣa teẓwam iɣzar n L’Urdun, ad tessbeddem iẓra, inni x d awem umureɣ ass-a x wedrar n Ɛibal uca ad ten tḥennced s jjar.
5 Ad din tebnid ijj n uɛalṭar i SIDI, AREBBI nnec, ijj n uɛalṭar n yeẓra. War xas tessiřiyed dduzan n wuzzař zi ssa ɣar da.
6 Ittxeṣṣa ad tebnid aɛalṭar n SIDI, AREBBI nnec, s yeẓra kemřen waha uca ad xas tessbexxared tiɣarṣa n wecmaḍ i SIDI, AREBBI nnec.
7 Ɛawed ad as tqeddmed tiɣarṣi nnec n řehna. Ad din tecced uca ad tfarḥed zzat i wudem n SIDI, AREBBI nnec.
8 Ad tarid marra awařen n Ccariɛa-ya deg yeẓra s ijj n wenqac icewwaren icnan.”
9 Tuɣa Musa issawař ak-d ikehhanen, Ilawiyyen, ɣar marra Israil, inna: “Sqar, sḥess, a Israil! Ass-a tiwḍed ad tiřid d ijj n řgens i SIDI, AREBBI nnec.
10 Ad tesřed i tmijja n SIDI, AREBBI nnec, uca ad tegged zi řumurat nnes d tweṣṣa nnes, tinni x cek umureɣ ass-a.”
11 Iweṣṣa Musa řgens deg wass nni, inna:
12 “Xmi ɣa teẓwam L’Urdun ad bedden tqebbař aya x wedrar n Jirizim ḥima ad barken řgens: Cimɛun d Lawi d Yahuda d Issakar d Yusuf d Binyamin.”
13 “Uca tiqebbař-a ad bedden x wedrar n Ɛibal ḥima ad neɛřen: Rubin, Jad d Ɛacir d Zabulun, Dan d Naftali.”
14 “Ad barrḥen Ilawiyyen uca ad inin s tmijja ijehden i marra arraw n Israil:
15 ‘D amenɛuř aryaz nni iggin ijj n řexyař ineqcen niɣ ifesyen, aqa-t d jjɛifect i SIDI, ict n řxedmet n ifassen n uḥrayfi, uca ad tt igg deg wemcan nnes s tnuffra.’ Uca marra řgens ad dd-yarr ad yini: ‘Amin!’
16 ‘D amenɛuř wi ɣa isseḥqaren babas niɣ yemmas!’ Uca marra řgens ad yini: ‘Amin!’
17 ‘D amenɛuř wi ɣa issmuṭṭyen aymir n jjar nnes!’ Uca marra řgens ad yini: ‘Amin!’
18 ‘D amenɛuř wi ɣa issweddaren adarɣař deg webrid!” Uca marra řgens ad yini: ‘Amin!’
19 ‘D amenɛuř wi ɣa issfarrɣen tasɣart n ubarrani, n uyujiř u n tajjač!’ Uca marra řgens ad yini: ‘Amin!’
20 ‘D amenɛuř wi ɣa iṭṭṣen ak-d temɣart n babas, minzi ittɛarra babas’ Uca marra řgens ad yini: ‘Amin!”
21 ‘D amenɛuř wi ɣa iṭṭṣen ak-d ca n umuddar!’ Uca marra řgens ad yini: ‘Amin!’
22 ‘D amenɛuř wi ɣa iṭṭṣen ak-d učmas, yeǧis n babas niɣ yeǧis n yemmas!’ Uca marra řgens ad yini: ‘Amin!’
23 ‘D amenɛuř wi ɣa iṭṭṣen ak-d tadeggʷač nnes!’ Uca marra řgens ad yini: ‘Amin!’
24 ‘D amenɛuř wi ɣa inɣen jjar nnes s tnuffra!’ Uca marra řgens ad yini: ‘Amin!’
25 ‘D amenɛuř wi ɣa iṭṭfen arrecwet maḥend ad inɣa ijj n bnadem, mahend ad issizzeř idammen imezdagen!’ Uca marra řgens ad yini: ‘Amin!’
26 ‘D amenɛuř wi war ittqarran awařen n Ccariɛa-ya maḥend ad ten yegg!’ Uca marra řgens ad yini: ‘Amin!’ ”