23
X yinni war izemmaren ad adfen ɣar tmesmunt
1 “War iɛeddeř i wenni umi deqfen, umi ttwaddzen imeǧařen niɣ ttwakksen imenyaren ad yadef ɣar wegraw n řgens n SIDI.
2 War iɛeddeř i mmis n řeḥram ad yadef ɣar wegraw n řgens n SIDI. Ɛad ař jjiř wiss ɛecra nnes uřa d ijj zzayes war d as iɛeddeř ad yadef ɣar tmesmunt n SIDI.
3 War iɛeddeř i yijjen n zeg ayt n Ɛammun niɣ i yijjen zeg ayt n Mu’abi ad yadef ɣar wegraw n řgens n SIDI. Waxxa ař jjiř wiss ɛecra nnes ɛad war iɛeddeř i uřa d ijj zzaysen ad yadef ɣar wegraw n řgens n SIDI i řebda,
4 minzi nitni war ɣarwem dd-ffiɣen ḥima ad kidwem msagaren ɣar webrid s weɣrum d waman umi dd-teffɣem zi Miṣra uca umi netta xak icra Balɛam, mmis n Baɛur, zi Fatur zi temmurt n Aram-Nahrayn, aqa-tt d Misuputamya, maḥend ad cek inɛeř.
5 Maca SIDI, AREBBI nnec, tuɣa war ixs ad iseř i Balɛam uca SIDI, AREBBI nnec, yarra nneɛřet d lbaraka, minzi SIDI, AREBBI nnec, tuɣa ittexs i cek.
6 War tarezzu x řehna nsen d řxar nsen, marra ussan n tudart nnec, ař i řebda.
7 War carreh Adumi, minzi netta d umac, war carreh Amiṣri, minzi tuɣa cek d abarrani di temmurt nnes.
8 Iḥenjiren i d asen ittwarwen iɛeddeř asen ad adfen ɣar wegraw n řgens n SIDI zi jjiř wiss třata.”
Tiweṣṣa nneɣni
9 “Umi dd ɣa teffɣed s řɛeskar ḍidd i řɛedyan nnec, ad teḥḍid ixef nnec zi marra řɣar.
10 Mařa din ijj n weryaz akidek, war iǧi ca d amezdag ak-d min imsaren s ǧiřet, ad iffeɣ barra i řmargeḥ n řɛeskar. War d as iɛeddeř maḥend ad yadef ɣar daxeř n řmargeḥ.
11 Ɣar uweṭṭu n tmeddit, ad issird ixef nnes s waman u awarni i uɣeǧay n tfuct izemmar ad yadef ɛawed ɣar řmargeḥ.
12 Ittxeṣṣa ad ɣarek yiři wemcan barra i řmargeḥ n řɛeskar mani ɣa teffɣed di barra.
13 Ad ɣarek yiři ɛawed jar řeqcuɛ nnec ijj n ujij uca xmi ɣa teqqimed barra, ad zzayes txebced ijj n weḥfur, ad tenqeřbed u ad txemmřed isuffɣan nnec.
14 Minzi SIDI, AREBBI nnec, iggur di řmargeḥ nnec n řɛeskar ḥima ad cek ifekk u ḥima ad ac isellem řɛedyan nnec zzat i wudem nnec. Tasqift nnec at tiři tqeddes, ḥima Netta war dayek ittwiři ca n řefḍiḥet uca ad xak inneqřeb awarni ac.”
15 “Ismeɣ i ɣarek dd-yarewřen zi bab nnes, war tzemmared ad t tsellmed ɛawed i bab nnes.
16 Ad kik izdeɣ di řwesṭ nnec, deg wemcan nni ɣa yixḍar ɣar daxeř i yict zi tewwura nnec, mani ɣa yiři mliḥ. War iɛeddeř ad t tḍeřmed.
17 War tᵉttiři uřa d ict n temɣart n farq-ccɣeř n zzawect jar yessis n Israil uca war ittiři uřa d ijj n umetli n zzawect jar ayt n Israil.
18 Mammec ma yegga wawař nnec, war iɛeddeř ad dd-tawyed i uya řmunet n farq-ccɣeř niɣ ttaman n weqzin ɣar Taddart n SIDI, AREBBI nnec, minzi aqa aten s tnayen d ict n jjɛifect ɣar SIDI, AREBBI nnec.
19 War ttegg arriba x umac, war iǧi arriba x nnuqart, war iǧi arriba x macca, war iǧi arriba x marra tamesřact nni izemmaren ad dd-tawi arriba.
20 Tzemmared ad tegged arriba x ubarrani, maca war tzemmared ad tegged arriba x umac, ḥima ad ac ibarek SIDI, AREBBI nnec, di marra řxedmet n ifassen nnec di temmurt mani ɣa traḥed ḥima ad tt teksid d řwart.
21 Xmi ɣa tegged ijj n lwaɛd i SIDI, AREBBI nnec, war teddikkwiřed ca ɣar ḍeffar maḥend ad t tkemmřed, minzi SIDI, AREBBI nnec, ad zzayek ittar ad t tkemmřed, mařa lla ad xak yiři d ddenb.
22 Mařa war teggid ijj n lwaɛd, war xak ittiři ddenb.
23 Min dd-iffɣen zi jar iyencicen nnec, ad t tkemmřed s tidett, am mammec ittxeṣṣa ad tkemmřed lwaɛd n tewhibt s řxaḍar nni zi twaɛded SIDI, AREBBI nnec, u wenni x tessiwřed s uqemmum nnec.
24 Xmi ɣa tadfed ɣar umarjeɛ n uḍiř n umqarrab nnec, tzemmared ad tecced aḍiř ɛlaḥsab meẓri n řeɛmar nnec, maca ittxeṣṣa war tᵉttegged walu di tsuǧet nnec.
25 Mařa tudfed ɣar imendi ibedden n jjar nnec, tzemmared ad teksid tidrin s ifassen nnec, maca war iɛeddeř ad tewted amjar deg imendi ibedden n jjar nnec.”