22
Tiweṣṣa nneɣni
1 “War iɛeddeř ad txezzared waha deg uweddar n ufunas niɣ n ijjen zeg wuǧi n umac, niɣ ad xasen tqeřbed tiṭṭawin, maca ittxeṣṣa ad ac ten-i-dd-tarred nican i umac.
2 Mařa umac war iǧi ca yudes niɣ war t tessined, ad t tessidfed ɣar daxeř i taddart nnec uca ad ɣarek iqqim ař dd ɣa yas umac ad xas yarzu uca xenni ad as t-i-dd tarred.
3 Amenni i ɣa tegged s weɣyuř nnes, amenni i ɣa tegged ɛawed s warruḍ nnes, wah, ammu i ɣa tegged ak-d marra tamesřact n umac, tenni d as iweddaren uca tufid tt cek. War iɛeddeř ad as tennufared.
4 War teqqimed ad texzared deg weɣyuř n umac niɣ deg ufunas nnes am wḍan deg webrid, war xasen qeǧeb ca tiṭṭawin. S tidett ad ten tessekkared akides.”
5 “Tamɣart war tyarreḍ min ittřiqen i weryaz, niɣ aryaz ad yarḍ arruḍ n temɣart, minzi marra wi itteggen aya aqa-tt d jjɛifect i SIDI, AREBBI nnec.
6 Mařa iban-dd zzat i wudem nnec x webrid ca n řɛucc n wejḍiḍ, di ca n tcejjart niɣ x temmurt, s iwarruden niɣ s tmeǧařin, uca yemmatsen tessdeř x iwarruden niɣ x tmeǧařin, xenni war ttᵉṭṭef yemmatsen ak-d iwarruden.
7 Ad tejjed ad tuyur yemmatsen, maca ad teksid iwarruden i yixef nnec, ḥima ad tiřid mliḥ, uca ad ac zuggarten wussan n tudart nnec.
8 Xmi ɣa tebnid taddart n jdid, ad tegged taɛmadt x tzeqqa nnec, ḥima war ttikkʷiḍen idammen ɣar taddart nnec, mařa iwḍa-dd zzayes ḥed.
9 War zarreɛ ca amarjeɛ n uḍiř nnec s tnayen n markat n zzariɛet, ḥima war tᵉttwassɛiǧit marra ṣṣabet n zzariɛet nni tzarɛed uřa d řɣiǧet n umarjeɛ n uḍiř.
10 War carrez ca s ufunas d weɣyuř jmiɛ.
11 War yarreḍ ca arruḍ ittwaggen zi txeǧeḍt n taḍuft d řeqṭen jmiɛ.
12 Ad tegged tcarcifa x arebɛa n iɣemmura n useřham nnec i zi třeḥḥfed.”
Izerfan zi jjihet n řemřac
13 “Mařa ijj n weryaz yiwi ict n temɣart uca yudef-dd xas, xenni ad tt icarh,
14 uca issekkar xas awařen uca yarra isem nnes d aɛeffan, inna: ‘Aqa tamɣart-a iwyeɣ tt, uca umi ɣares-dd qarrbeɣ, iwḍeɣ ad ssneɣ aqa war teǧi ca d taɛzarect!’,
15 xenni ad isscen babas n tebřiɣt nni d yemmas lburhanat n tɣuni n tebřiɣt i yemɣaren ɣar tewwart n tendint.
16 Ad yini babas n tebřiɣt nni i yemɣaren: ‘Necc wciɣ yeǧi i weryaz-a d tamɣart uca netta idweř icarh i-tt,
17 uca aqa netta issekkar xas awařen, inna: War ufiɣ ɣar yeǧic lburhanat n tɣuni n tebřiɣt. Aqa aya d lburhanat n tɣuni n yeǧi!’ Uca nitni ad bezzɛen ařeḥḥaf zzat i wudem n imɣaren n tendint.
18 Xenni ad ṭṭfen imɣaren n tendint aryaz nni uca ad t farcen
19 uca ad as ggen multa n mya n uqiyyat n nnuqart uca ad tent wcin i babas n tebřiɣt nni, minzi netta yarra isem d aɛeffan x ict n teɛzarect zi Israil. Ad tiři d tamɣart nnes, war iḥeǧeř ad as iǧef marra ussan min ɣa yekk iddar.
20 Maca mařa iffeɣ man aya d tidett uca war ufin lburhanat n tɣuni ɣar tebřiɣt,
21 xenni ad ssuffɣen tabřiɣt nni ɣar tewwart n taddart n babas uca ad tt arejmen yeryazen n tendint, ař ɣa temmet, minzi tegga řefḍiḥet di Israil umi tessefḍeḥ ixef nnes di taddart n babas. Ittxeṣṣa ad tekksed řɣar zi řwesṭ nnec.”
22 “Mařa ittwaṭṭef ijj n weryaz umi iṭṭeṣ ak-d ca n temɣart i iǧan ak-d weryaz, xenni ad mmten s tnayen, aryaz nni iṭṭṣen ak-d temɣart d temɣart ɛawed. Ittxeṣṣa ad tekksed řɣar zi Israil.
23 Mařa ict n tebřiɣt d taɛzarect tᵉttwaxḍeb zeg ijj n weryaz, uca yufa i-tt ijj n weryaz di tendint uca iṭṭeṣ akides,
24 xenni ad ten tessuffɣem barra s tnayen ɣar tewwart n tendint, ad ttwarejmen ař ɣa mmten nitni: tabřiɣt minzi war tessekkar ca tɣuyyit di tendint, aryaz minzi isseḥqar tamɣart n jjar nnes. Ittxeṣṣa ad tekksed řɣar zi řwesṭ nnec.
25 Mařa ijj n weryaz yufa ict n tebřiɣt ittwaxeḍben deg iyyar uca issexsar i-tt weryaz, iṭṭeṣ akides, xenni ittxeṣṣa ad immet weryaz waha, wenni kis iṭṭṣen.
26 War ttegg walu i tebřiɣt. Tabřiɣt war teggi ca ddenb ař řmewt, minzi tamesřact-a am tmesřact n weryaz nni ikkaren ak-d jjar nnes uca inɣa i-t,
27 minzi netta yufi tt deg iyyar, tesɣuy tebřiɣt nni ittwaxeḍben, maca war tuɣi din wi tt ɣa issnejmen.
28 Xmi ca n weryaz yufa ict n tebřiɣt d taɛzarect, war tt ixḍib ḥed, uca netta iṭṭef i-tt, iṭṭeṣ akides uca ttwafen nitni,
29 xenni aryaz nni iṭṭṣen akides ad iwc i babas n tebřiɣt xemsin n uqiyyat n nnuqart u nettat ad tedweř d tamɣart nnes, umi tt isseḥqar. War izemmar ad as iǧef marra ussan n tudart nnes.
30 War iɛeddeř i weryaz ad iksi tamɣart n babas u war iɛeddeř ad issɛarra x wafriw ittsarran n warruḍ n babas.”