2
Tarjit n ujeǧid Nabuxadnaṣṣar
1 Deg useggʷas wiss tnayen n tgelda n Nabuxadnaṣṣar yurja Nabuxadnaṣṣar tirja. Buḥbeř nnes inneḥweř uca iruḥ as yiḍeṣ.
2 Xenni inna ujeǧid ad řaɣan i tarwa n tseḥḥart d imesnawen n itran d iseḥḥaren d Ikaldaniyyen ḥima nitni ad as fessaren tirja nnes. Nitni usin-dd uca bedden zzat i wudem n ujeǧid.
3 Inna asen ujeǧid: “Necc ɣari ict n tarjit u buḥbeř inu inneḥweř, maḥend ad ssneɣ min texs ad tini tarjit.”
4 Xenni nnan Ikaldaniyyen i ujeǧid:
Min yuran swadday aqa-t s yiřes n Tramit.
A ajeǧid, ddar i řebda! Ini asen i imsexxaren nnec tarjit, xenni ad ak tt nfessar!”
5 Yarra-dd ujeǧid, inna i Ikaldaniyyen: “Aqa iffeɣ-dd řumur. Mařa kenniw war d ayi tessargbem x tarjit, ad tᵉttwaqessem d iwetwiten u tudrin nwem ad tent arren d tizubayyin.
6 Maca mařa tfessarem ayi kenniw tarjit d min texs ad tini, ad tᵉṭṭfem zzayi tarzefin d arriɣaluten d ccan ameqqran. S uyenni, seccnem ayi tarjit inu d řmeɛna nnes.”
7 Arrin-dd nitni xas twařa wiss tnayen, nnan: “Ejj ajeǧid ad iḥaja tarjit i imsexxaren nnes, xenni ad as newc afessar.”
8 Yarra-dd ujeǧid, inna: “Řexxu ssneɣ nican, aqa kenniw texsem ad tarebḥem řweqt, umi tᵉttwařam aqa iffeɣ-dd řumur zzayi.
9 Mařa war d ayi tessargbem x tarjit, ad kenniw iřqef řḥukm d ijj. Kenniw tekksem awař maḥend ad xafi tessxarrqem u ad ayi tɣeccem ař ɣa tbeddeř řweqt. S uyenni, ini ayi tarjit, xenni ad ssneɣ aqa tzemmarem ad ayi tewcem uřa d řmeɛna nnes.”
10 Arrin-dd Ikaldaniyyen qibač i ujeǧid, nnan: “War din uřa d ijj n bnadem di temmurt wenni izemmaren ad ifessar tamesřact-a i ujeǧid. S uyenni war din uřa d ijj n ujeǧid, mammec iǧa d ameqqran niɣ mecḥař ma ɣares d tizemmar, wenni ittaren tamesřact am tanita zi ca n useḥḥar niɣ amesnaw n itran niɣ Akaldaniy.
11 Minzi tamesřact i ittar ujeǧid tewɛar aṭṭas u war din uřa d ijj izemmar ad t issargeb, mɣir irebbiten nni war izeddɣen jar iwdan.”
12 S uyenni idweř ujeǧid ittḥaja u ittxeyyaq ktar, yumur ad nɣen marra imiɣisen di Babil.
13 Iffeɣ-dd řumur maḥend ad nɣen imiɣisen. Arzun uřa x Daniyal d imeddukkař nnes ḥima ad ten nɣen.
14 Xenni yarra-dd Daniyal s tiɣit d řeɛqeř ɣar Ariyux, řqebṭan n iɛessasen n arrimet n ujeǧid, wenni tuɣa iffɣen ḥima ad ineɣ imiɣisen n Babil.
15 Daniel iṭṭef deg wawař, inna i Ariyux, akumandar n ujeǧid: “Mayemmi igga ujeǧid řumuř ammu s tazřa?” Řexdenni issargeb Ariyux x tamesřact i Daniyal.
16 Xas uca yudef Daniyal uca ittar zeg ujeǧid, maḥend netta ad as iwc ijj n řmijař n řweqt, maḥend ad as iwc afessar.
17 Xenni yuyur Daniyal ɣar taddart nnes, iḥaja tamesřact i iɛciren nnes Ḥananya, Micayil d Ɛazarya,
18 ḥima ad ttaren arreḥmet zi Arebbi n ijenwan x ssirr-a ḥima Daniyal d iɛciren nnes war tᵉttwahelliken ca ak-d imiɣisen nneɣni n Babil.
19 Xas uca ittwassargeb-dd i Daniyal min tuɣa innuffaren deg ijj n řewḥiy s ǧiřet. Xenni ibarek Daniyal Arebbi n ijenwan.
20 Yarra-dd Daniyal, inna:
“Ad ittwabarek Isem n Arebbi
zi řebda ař řebda qaɛ,
maɣar tiɣit d jjehd aqa aten nnes.
21 Maɣar Netta ittbeddař zzamanat d tsaɛɛetin.
Netta ikkes ijeǧiden u yařeqqem ijeǧiden,
Netta iwca tiɣit i imiɣisen
u tussna i yinni ɣar iǧa řeɛqeř.
22 Netta issargeb timesřayin yuǧɣen innufaren,
Netta issen min iǧan di taǧest,
maɣar tafawt tzeddeɣ ɣares.
23 Cek, a Arebbi n řejdud inu,
aqa ttqadiɣ u ttṣebbḥeɣ,
minzi tewcid ayi tiɣit d jjehd,
u umi tessargbed ayi řexxu
min zzayek nettar,
maɣar Cek tessargbed aneɣ
x tamesřact n ujeǧid.”
24 S uyenni yuyur Daniyal ɣar Ariyux, wenni igga ujeǧid maḥend ad isshellek imiɣisen n Babil. Yuyur ɣares, issiweř akides ammu: “War neqq imiɣisen n Babil, maca ndeh ayi ɣar wudem n ujeǧid. Necc ad as ssecneɣ afessar i ujeǧid.”
25 Řexdenni indeh Ariyux Daniyal s tazřa ɣar ujeǧid uca issiweř akides ammu: “Necc ufiɣ ijj n weryaz jar imenfiyyen n Yahuda wenni d i ɣa issecnen afessar i cek, a ajeǧid!”
26 Xenni iṭṭef ujeǧid deg wawař, inna i Daniyal, wenni umi qqaren Balṭacaṣṣar: “Ma tzemmared ad ayi tessargbed x tarjit nni ẓriɣ d řmeɛna nnes?”
27 Yarra-dd Daniyal zzat i ujeǧid, inna: “Min innuffaren i ittar ujeǧid war zemmarem imiɣisen d imesnawen n itran d tarwa n tseḥḥart d igezzanen ad t ssaregben i ujeǧid.
28 Maca aqa din ijj n Arebbi deg ujenna wenni issargaben min innufaren. Netta issargeb i ujeǧid Nabuxadnaṣṣar min ɣa imsaren deg uneggar n wussan. Aqa ta d tarjit nnec d iweḥḥan nni dd-yusin deg uzeǧif nnec di tassut.
29 Cek, a ajeǧid, umi cek tuɣa di tassut usin ac-dd ixarriṣen x min i ɣa imsaren awarni aya u Wenni issargben min inuffaren, aqa isscen ac min ɣa imsaren.
30 Aqa ittwasscen ayi-dd min tuɣa innuffaren, war iǧi zi tiɣit nni dayi sennej i marra min iddaren, maca ḥima ad ittwassargeb ufessar i ujeǧid u ḥima ad tessned ixarriṣen n wuř nnec.”
31 “Cek, a ajeǧid, tuɣa txezzared u teẓrid ijj n řexyař d ameqqran. Řexyař-a tuɣa issiggʷed u tissiqt nnes teǧa ař ṭṭarf. Aqa ibedd zzatek u issiggʷed am t teẓrid.
32 Azeǧif n řexyař-a tuɣa d ureɣ iṣfan, idmaren nnes d iɣaǧen nnes d nnuqart, aɛeddis nnes d tijɛinna nnes d nnḥas,
33 timessaḍin nnes d uzzař, iḍaren nnes cwayt d uzzař u cwayt zzaysen d tarrist.
34 Aya i teẓrid, ařami ittwaceǧeq ijj n weẓru břa ifassen. Wanita iřqef řexyař nni ɣar iḍaren nnes n wuzzař ak-d tarrist, uca iřbez i-ten.
35 Xenni ittwařbez wuzzař d tarrist d nnḥas d nnuqart d wureɣ deg ict n tecti uca dewřen am uřum n inedraren deg unebdu, uca isuḍ daysen usemmiḍ, war zzaysen teqqim uřa d ict n jjuret. Maca aẓru nni iřeqfen řexyař, idweř d ijj n wedrar ameqqran, iɛemmar marra tammurt.
36 D ta d tarjit. Ad nɛawed min texs ad tini řexxu zzat i ujeǧid. *
37 Cek, a ajeǧid, teǧid d ajeǧid n ijeǧiden, maɣar Arebbi n ijenwan iwca ac tagelda d tzemmar d jjehd d ccan.
38 Mani ma zeddɣen tarwa n bnadem, igga imuddaren n řexřa d ijḍaḍ n ujenna deg ufus nnec u Netta igga cek d řḥakem x marra man aya. Aqa cek d azeǧif nni n wureɣ. *
39 Awarni ac ad dd-tas ict n tgeldit nneɣnit, tudrus x tenni nnec. Awarni as ad tiři ict n nneɣnit, tageldit wiss třata n nnḥas, tenni ad teḥkem x marra tammurt. *
40 Uca tageldit wiss arebɛa ad tiři tejhed am wuzzař, maɣar uzzař iřebbez u ibarri marra, u am mammec ittareẓẓa wuzzař marra, ammu i ɣa teřbez u tbarri marra. *
41 Umi teẓrid belli iḍaren d tfednin aqa cwayt zzaysen s tarrist n bu-třaxt u cwayt zzaysen s wuzzař, ixs ad yini aqa ad tiři d ict n tgeldit temsebḍa. Cwayt zzayes waha ad dayes tiři řeqsaḥet am wuzzař, maɣar teẓrid uzzař iṣṣur s tarrist n třaxt.
42 U umi teẓrid tifednin n iḍaren, aqa cwayt zzaysent s wuzzař u cwayt zzaysent s tarrist, ixs ad yini aqa tageldit nni cwayt zzayes ad dayes tiři řeqsaḥet u cwayt ad tiři tarxef.
43 U umi teẓriḍ aqa uzzař iṣṣur s tarrist n třaxt, ixs ad yini nitni ad ṣṣuren s zzariɛet n weryaz, maca war řessqen ca ijj ɣar wenneɣni, wa war iřesseq ak-d wa, am wuzzař war iřessqen ak-d třaxt.
44 Maca deg wussan n ijeǧiden nni ad issbedd Arebbi n ijenwan ict n tgeldit nni war tᵉttwaḍeyyiɛ i řebda u tagelda nnes war tᵉttriḥ ɛemmarṣ ɣar ijj n řgens nneɣni. Ad teřbez u ad tebḍeř marra tigeldiwin nni, maca nettat s yixef nnes at tiři i řebda qaɛ.
45 S uyenni teẓrid, ittwaceǧeq-dd ijj n weẓru zeg wedrar břa ifassen, wenni iřebzen uzzař d tarrist d nnuqart d nnḥas. Arebbi ameqqran aqa isscen i ujeǧid min ɣa imsaren awarni aya. Tarjit aqa tbedd u řmeɛna nnes d tidett.”
46 Xenni iwḍa ujeǧid Nabuxadnaṣṣar x uɣembub nnes ɣar temmurt uca isjed i Daniyal, iweṣṣa ad awyen ict n tewhibt d řebxur ittfuḥen am yict n tewhibt n useyyeb.
47 Yarra-dd ujeǧid x Daniyal, inna: “D tidett, aqa Arebbi nwem d Arebbi x marra irebbiten u Netta d Sidi x marra ijeǧiden uřa d wenni issargaben min innufaren, maɣar tiwḍed ad tkecfed aya i tuɣa innuffaren.”
48 Xas uca iwca ujeǧid i Daniyal asemɣar ameqqran u iwca as tirzifin timeqqranin. Igga i-t x marra lɛamala n Babil u igga i-t d arrays x imeḥḍayen nni tuɣa x marra imiɣisen n Babil.
49 U Daniyal iqeddem ict n tutra i ujeǧid u wanita igga Sadrax, Micax d Ɛabd-Naɣu d imḍebbaren x lɛamala n Babil, maca Daniyal iqqim ɣar řeqṣar n ujeǧid.