Daniyal
1
Daniyal jar imsexxaren n ujeǧid n Babil
1 Deg useggʷas wiss třata n tgelda n ujeǧid Yahuyaqim, ajeǧid n Yahuda, yusa-dd Nabuxadnaṣṣar, ajeǧid n Babil, ɣar Urcalim uca inneḍ as-dd.
2 Sidi igga Yahuyaqim, ajeǧid n Yahuda, deg ufus nnes, uřa d ict n tesɣart n řeqcuɛ n Taddart n AREBBI. Netta yiwyi ten ɣar temmurt n Cinɛar, di taddart n arebbi nnes uca yiwyi ten ɣar wexxam n txubay n arebbi nnes.
3 Inna ujeǧid i Acfanaz, azeǧif n imsexxaren nnes icennɛen, aqa wanita ad yawi iḥudriyyen zeg ayt n Israil, zi zzariɛet n ujeǧid u zi tarwa n taṣiřet,
4 iḥudriyyen inni war di iǧi uřa d ijj n řɛib, inni d iṣebḥanen, ittwassřemden di marra tiɣit, ssnen tussna, ɣarsen řeɛqeř s řefhamet u ɣarsen tizemmar i tsexxart di řeqṣar n ujeǧid, ḥima ad asen ssřemden idlisen d yiřes n Ikaldaniyyen.
5 Ajeǧid igga asen ijj n lmaɛica di kuř ass zi macca n ujeǧid u zi binu n ṭṭabřa n tsessit nnes, u ḥima ad ten ssřemden třata n iseggʷusa. Ɣar uneggar n iseggʷusa nni ad sexxaren zzat i wudem n ujeǧid.
6 Zeg ayt n Yahuda tuɣa din jar asen Daniyal, Ḥananya, Micayil d Ɛazarya.
7 Ameqqran n imsexxaren icennɛen iwca asen ismawen nneɣni. Daniyal igga as Balṭacaṣṣar, Ḥananya Cadrax, Micayil Micax u Ɛazarya igga as Ɛabd-Naɣu.
8 Daniyal tuɣa igga uř nnes maḥend war issxemmij ixef nnes s macca d binu n ṭṭabřa n ujeǧid u ittar i umeqqran n imsexxaren icennɛen, ḥima war issxemmij ixef nnes zzaysen.
9 AREBBI isscen i Daniyal tamexsiwt nnes icewwaren d arreḥmet nnes zzat i wudem n ameqqran n imsexxaren icennɛen.
10 Ameqqran n imsexxaren icennɛen inna i Daniyal: “Necc tteggʷedeɣ zi bab inu, ajeǧid, wenni i kenniw iweṣṣan x macca d tsessit, maɣar mayemmi ad iẓar iɣembab nwem zerryen x iḥudriyyen nneɣni, iqrinen nwem? Kenniw ad tewcem azeǧif inu i ujeǧid!”
11 Xenni inna Daniyal i uweqqaf nni tuɣa igga umeqqran n imsexxaren icennɛen x Daniyal, Ḥananya, Micayil d Ɛazarya:
12 “Qeǧeb imsexxaren nnec ɛecra n wussan. Ejj ad aneɣ wcen zi min ittwazarɛen i macca uřa d waman ḥima ad nsu.
13 Xenni ejj ad aneɣ qeddmen zzat i wudem nnec mammec iǧa waddud nneɣ uřa d iḥudriyyen nni ittᵉtten zi macca n ujeǧid mammec iǧa waddud nsen u egg am mammec tᵉttwařid cek!”
14 Netta isřa asen uca iqeǧeb i-ten ɛecra n wussan.
15 Ɣar uneggar n ɛecra n wussan dewřen nitni ttbanen cnan u ṣebḥen x marra iḥudriyyen i iccen zi macca n ujeǧid.
16 Xenni imsar aqa aweqqaf ikkes asen macca nsen igellden d binu i ittxeṣṣa asen ad swen uca iwca asen zi min ittwazarɛen.
17 I arebɛa n iḥudriyyen-a iwca asen AREBBI tussna d řeɛqeř zi marra idlisen d tiɣit. Uca i Daniyal iwca as uřa d aḥekkar di marra řewḥiy d tirja.
18 Ɣar uneggar n wussan i x tuɣa inna ujeǧid aqa awarni asen ittxeṣṣa ad ten qeddmen zzates, yiwyi i-ten umeqqran n imsexxaren icennɛen, inni umi ttwaddzen imeǧařen, zzat i wudem n Nabuxadnaṣṣar.
19 Issiweř ujeǧid akidsen u war ittwif uřa d ijjen jar asen am Daniyal, Ḥananya, Micayil d Ɛazarya u nitni dewřen ttsexxaren i ujeǧid.
20 Di kuř tamesřact i di tuɣa ittxeṣṣa tiɣit d řefhamet i x tuɣa ten ittseqsa ujeǧid, yufa aqa ɛdun marra tarwa n tseḥḥart d imesnawen n itran di tgeldit nnes s ɛecra n tseqqar.
21 Daniyal iqqim dinni ař aseggʷas amezwaru n ujeǧid Kurac.