8
Tameẓriwt wiss arebɛa: tasuǧet s řɣiǧet
1 “Man aya isscen ayi tt Sidi inu, SIDI: Xzar, ict n tsuǧet dayes tini n unebdu!
2 Netta inna: ‘Min tᵉttwařid cek a Ɛamus?’ Necc nniɣ: ‘Ict n tsuǧet dayes tini n unebdu!’ Xenni inna ayi SIDI: ‘Aqa yusa-dd qeṭṭu x řgens inu Israil. Necc war xas ɛedduɣ ɛad!
3 Deg wass nni ad dewřen izřan n řeqṣar d imeṭṭawen, iqqar Sidi inu, SIDI. Ad iřint aṭṭas n řxecbat di kuř amcan, tinni inḍar Netta. Seɣd!’ ”
Iɛřamen imeqqranen n SIDI
4 “Sřem aya, kenniw inni iṣarrḍen amezřuḍ u teqḍam x řmusakin n temmurt,
5 am teqqarem: ‘Meřmi ɣa iɛdu uyur n jdid ařami nzemmar ad nezzenz řḥebb n yirden. U meřmi ɣa iɛdu wass n ssebt ařami nzemmar ad narzem tisrafin n yirden, ḥima ad nessemẓi řeɛbar n ifa u ad nessemɣar ciqlu u ad necmet s řmizanat n řɣecc,
6 ařami nzemmar ad nseɣ imuqřiřen s tenɛacin n nnuqart uřa d amezřuḍ i tyuya n sandaliyat!’, u am teqqarem: ‘Ad nezzenz icarfa deg wemcan n imendi!’ ”
7 “SIDI ijjuǧ ɣar nnfaxet n Yaɛqub: ‘Ɛemmarṣ ad ttuɣ timegga nsen!
8 Ma war ttenhezzi temmurt s man aya u ma war ttiřin marra imezdaɣ nnes ceḍnen? Ma war tᵉttgeɛɛid temmurt tmun am yeɣzar, ad taři u ad dd-tehwa am yeɣzar n Miṣra?”
9 “Deg wass nni ad imsar, iqqar Sidi inu, SIDI, ad arreɣ tfuct ad teɣři deg wezyen n wass u ad ssbarecneɣ tammurt ɣar ṭḥa n wass.
10 Necc ad arreɣ fictat nwem d acḍan d marra izřan nwem d izřan n wecḍan u Necc ad ggeɣ ict n txancet n wecḍan x marra tbeysa u x kuř azeǧif ad ggeɣ tuqeccart. Ad awyeɣ acḍan x temmurt am wecḍan x uyenni n mmis, u aqeṭṭu nnes ad t ggeɣ am yijj n wass d amarzag.”
11 “Xzar, ad dd-asen wussan, iqqar Sidi inu, SIDI, aqa Necc ad ssekkeɣ řaẓ x temmurt, war iǧi řaẓ n weɣrum, war iǧi fad n waman, maca ijj n ufadi maḥend ad sřen i wawařen n SIDI.
12 Xenni ad ttelɛen zi řebḥar ɣar řebḥar u zi ccamal ɣar ccarq, ad uyuren zi ssa ɣar da maḥend ad arzun x wawař n SIDI, maca war t ttifen.
13 Deg wass nni ad ɣacant teɛzariyyin nni icnan qaɛ uřa d iḥudriyyen s ufadi,
14 inni ittjjaǧan ɣar umarwas n Samarya, qqaren: ‘S tidett am iddar arebbi nnec, a Dan, u am iddar webrid ɣar Bi’r-Sebɛa!’, ad wḍan, war ttekkaren ɛad!”