7
Tameẓriwt tamezwarut: iburexsen
1 “Man aya isscen ayi tt Sidi inu, SIDI! Xzar, Netta igga iburexsen umi tuɣa arbiɛ aneggar ibedda ad issuffeɣ. Xzar, tuɣa-t d arbiɛ aneggar awarni ma ḥetcen arbiɛ i ujeǧid.
2 Imsar, umi kemmřen nitni zi macca n uɣemmuy aziza n temmurt, necc nniɣ: ‘A Sidi inu, SIDI, sameḥ maca! Mammec i ɣa yegg Yaɛqub ad iqqim ad ibedd, aqa netta d ameẓyan!’
3 Xenni indem SIDI x man aya. ‘War ittiři!’, inna SIDI.”
Tameẓriwt wiss tnayen: timessi ihellken
4 “Man aya isscen ayi tt Sidi inu, SIDI. Xzar, Sidi inu, SIDI, iřaɣa-dd maḥend ad din yiři lɛiqab s tmessi uca timessi tecca aman imeqqranen ihewřen ařami ad tecc uřa d tasɣart n řwart.
5 Necc nniɣ: ‘A Sidi inu, SIDI, sbedd maca! Mammec i ɣa yegg Yaɛqub ad iqqim ad ibedd, aqa netta d ameẓyan!’
6 Xenni indem SIDI x man aya. ‘War ittiři!’, inna Sidi inu, SIDI!”
Tameẓriwt wiss třata: plumu n řḥiḍ
7 “Man aya isscen ayi tt Netta: Xzar, Sidi inu ibedd x yijj n řḥiḍ i ittwagg s plumu u yijj n plumu tuɣa deg ufus nnes.
8 Inna ayi SIDI: ‘Min tᵉttwarid cek, Ɛamus?’ Necc nniɣ: ‘Ijj n plumu!’ Řexdenni inna Sidi: ‘Xzar, Necc ad arreɣ plumu inu di řwesṭ n řgens n Israil. Necc war xas ɛedduɣ ɛad!
9 Řegɛudi n Isḥaq ad ttwareddǧent u tizawiyyin iqeddsen n Israil ad dewřent d řxarbet u Necc ad kkareɣ x taddart n Yarubɛam s ssif.’ ”
Ajeǧid Amaṣya ixs ad yaẓẓeř x Ɛamus zi temmurt
10 Řexdenni issekk Amaṣya, akehhan di Bayt-Il, ijjen ɣar Yarubɛam, ajeǧid n Israil, inna: “Ɛamus igga ijj n řɛahd ḍidd i cek di řwesṭ n taddart n Israil. Tammurt war tzemmar ad teksi awařen nnes.
11 Maɣar ammu i iqqar Ɛamus: ‘Yarubɛam ad ittwaneɣ s ssif u Israil ad ittwandeh ɣar lmenfa, ad t ssiggʷejen x wudem n temmurt nnes.’ ”
12 Xenni inna Amaṣya i Ɛamus: “A cek, amwařaw, ruḥ, arweř ɣar temmurt n Yahuda! Ecc dinni aɣrum u nabb dinni!
13 Di Bayt-Il maca war tzemmared ad tnebbid ɛad, minzi nettat d zzawect iqeddsen n ujeǧid u nettat d taddart n tageldit.”
14 Yarra-dd Ɛamus, inna i Amaṣya: “Necc war ǧiɣ d anabi u necc war ǧiɣ d mmis n unabi, maca necc tuɣa ayi d bu-řebhayem uřa d ijj n weryaz nni iřeqqḍen tazart taburect.
15 SIDI ikkes ayi zi ḍeffar n wuǧi u SIDI inna ayi: ‘Uyur, nabb i řgens inu Israil!’
16 Xenni řexxu, seř i wawař n SIDI, cek d wenni iqqaren: ‘War iɛeddeř ad tnebbid ḍidd i Israil u ad tessudmed awař n SIDI x taddart n Isḥaq!’
17 S uya, ammu i iqqar SIDI: Tamɣart nnec ad tessefsed ixef nnes s uɣiř di tendint u iḥenjiren nnec d yessic nnec ad wḍan s ssif u tammurt nnec ad tt bḍan s ufiřu n řeɛbar u cek ad temmted deg ict n temmurt texmej u s tidett Israil ad tᵉttwaṭṭef di lmenfa barra i temmurt nnes.”