3
Řḥukm n SIDI x Israil d Samarya
1 “Sřem awař-a i kidwem issawař SIDI, a ayt n Israil, ak-d kuř řaǧ nni ssgeɛɛdeɣ Necc zi temmurt n Miṣra, am qqareɣ:
2 ‘Zi marra řaǧat n ddunect ssneɣ mɣir kenniw. X uya ad kenniw ɛaqbeɣ x marra řmuɛṣiyyat nwem!
3 Ma ad uyuren tnayen ak-d wayawya, břa ma ttafqen?
4 Ma ad izehhar wayrad deg wezɣar řami war ɣares bu zzardet? Ma ayrad d ameẓyan ad yejj tmijja nnes ad tᵉttwaseř zeg yefri, am war imniɛ walu?
5 Ma ad inḍar wejḍiḍ di řfex x wudem n temmurt, mařa war din dayes macca i netta? Ma ad innurfeɛ řfex zi temmurt mařa texwa?
6 Mařa ḥed isuḍ deg uyicc n icarri di tendint, ma war ittarjiji řgens? Mařa imsar ijj n uceřwaw di tendint, ma war tt iggi SIDI?
7 Maɣar Sidi inu, SIDI, war ittegg uřa d ict n řḥajet břa ma ad issargeb ccwar nnes innuffaren i imsexxaren nnes, inabiyyen.
8 Ayrad izehhar, man wen war itteggʷden? Sidi inu, SIDI, aqa issiweř, man wen war ittnebba?’ ”
9 “Jjem ad ittwaseř aya di řeqṣur di Acdud u di řeqṣur n temmurt n Miṣra, ini: ‘Munem x idurar n Samarya u xzarem anehweř ameqqran di řwesṭ nnes u inni dayes ittwaḥṣaren!’
10 Nitni war ssinen mammec ɣa ggen min iseggden, iqqar SIDI, nitni inni iyarrwen lɛunf d tkeccaḍt di řeqṣur nsen.’
11 S uya, ammu i iqqar Sidi inu, SIDI: ‘Ijj n řeɛdu! Netta ittenneḍ i temmurt marra! Ad issehwa jjehd nnem zzayem u řeqṣur nnem ad ttwakeccḍen.’
12 Ammu i iqqar SIDI: ‘Am ifekk ijj n umeksaw tnayen n iḍaren niɣ ijj n yixef n umezzuɣ zeg uqemmum n wayrad, ammu i ɣa ttwassnejmen ayt n Israil, inni i din ittɣiman di Samarya x tma n qama u x yict n tzerbiyyet zi Dimacq ggin tt x yict n řemṭarbet.’ ”
13 “Sřem u cehdem di taddart n Yaɛqub, ammu i iqqar Sidi inu SIDI, AREBBI n řɛeskarat.
14 Minzi deg wass nni di ɣa xeřfeɣ ixeṭṭan n Israil, ad ssiwḍeɣ ɛawed axeǧeṣ x iɛalṭaren n Bayt-Il, maɣar ad ttwaqeḍɛen waccawen n uɛalṭar, ad wḍan ɣar temmurt.
15 Necc ad hedmeɣ tazeddiɣt n tgarst d tzeddiɣt n unebdu u tudrin n řɛaj ad ttwaqḍant, u aṭṭas n tudrin ad ttwaredǧent!’, ammu i iqqar SIDI.”