1 “Ammu i inna SIDI: X třata n ixeṭṭan i igga Mu’ab, ɛad mahu x arebɛa, war t ssbeṭṭařeɣ, minzi nitni sscemḍen iysan n ujeǧid n Idum ařami dewřen d jjir. 2 Necc ad ssekkeɣ timessi di Mu’ab, ad tecc řeqṣur n Qaryut. Mu’ab ad immet ɣar ddriz ameqqran, ɣar iɣuyyan n umenɣi u ɣar řḥess n usuḍi deg uyicc n icarri. 3 Necc ad teḥḥiɣ řqaḍi zi řwest nnes u ad nɣeɣ marra řḥukkam nnes akides, iqqar SIDI.”

4 “Ammu i inna SIDI: X třata n ixeṭṭan i igga Yahuda, ɛad mahu x arebɛa, war t ssbeṭṭařeɣ, minzi nitni war qbiřen Ccariɛa n SIDI u war ṭṭifen di tweṣṣa inu u minzi irebbiten nsen n ixarriqen, inni ḍfaren řejdud nsen, arrin ten weddaren, 5 Necc ad ssekkeɣ timessi di Yahuda, ad tecc řeqṣur n Urcalim.”

6 “Ammu i inna SIDI: X třata n ixeṭṭan i igga Isra’il, ɛad mahu x arebɛa, war t ssbeṭṭařeɣ, minzi nitni zzenzen amsegged s tmenyat n nnuqart u amezřuḍ i tyuya n sandaliyat. 7 Nitni tecḍiḍiḥen ɣar tɛejjajt x uzeǧif n imuqřiřen u nitni ttbellaɛen abrid n imwaḍɛen břa ssibbet. Aryaz d babas ruḥen ɣar teḥramt d ict, ḥima ad feḍḥen Isem inu iqeddsen. 8 Nitni sswaẓẓaḍen ixef nsen zzat mkuř aɛalṭar x warruḍ i dd-ittwarehnen u di taddart n arebbi nsen sessen binu ssaɣen t s tmenyat n yinni x ittwagg multa. 9 D Necc i tuɣa din teḥḥiɣ Imuriyyen zzat i uɣembub nsen, inni tuɣa yuɛřan am tneglin yuɛřan u jehhden am tcejjura n řbeǧuḍ. Necc teḥḥiɣ řɣiǧet nnes sennej u iẓewran nnes swadday. ◘ 10 D Necc i tuɣa kenniw i dd-issgeɛɛden zi Miṣra u arriɣ kenniw tuyurem arebɛin n iseggʷusa di řexřa, maḥend ad tᵉṭṭfem tammurt n Imuriyyen d řwart. ◘ 11 Zeg iḥenjiren nwem arriɣ zzaysen inabiyyen u zeg iḥudriyyen nwem arriɣ zzaysen inni tuɣa yarebbun ttaj n ucuwwaf n lwaɛd. Ma war iǧi amenni, a ayt n Israil?!, ammu i iqqar SIDI. 12 Kenniw maca tarrim inni tuɣa yarebbun ttaj n weɛzař ad swen binu u kenniw tweṣṣam inabiyyen, tennam: ‘Kenniw war ɣarwem bu ttesriḥ, ḥima ad tnebbam!’ ◘ 13 Xzar, Necc ad awem ɛebbzeɣ swadday am yict n tkarrut teccur s tqebbiḍin n imendi tɛebbez tijarrarin nnes di temmurt swadday. 14 Aqa ṣafi tarewřa i wenni ifsusen, u wenni ijehden war izemmar ad iḥḍa jjehd nnes u bu-teɣřuḍt war izemmar ad issenjem tudart nnes. 15 Wenni iṭṭfen di řqews, war ittɣimi ibedd, u wenni izemmaren x tazřa, war inejjem, u wenni ineddhen ayis, war izemmar ad issenjem řeɛmar nnes. 16 Wenni izeɛɛmen qaɛ jar ayt n bu-teɣruḍt ad yarweř d aɛaryan deg wass nni, ammu i iqqar SIDI.”