٢٣
أَوَاڒنْ إِنڭُّورَا ن ذَاوُوذْ
١ إِنَا ذ أَوَاڒنْ إِنڭُّورَا ن ذَاوُوذْ.
ذَاوُوذْ، مِّيسْ ن يَاسَّا إِسَّاوَاڒْ، بُو-ثغْرُوضْثْ إِ إِتّْوَاسّْعُودْجَانْ إِسَّاوَاڒْ، أَمذْهُونْ ن أَربِّي ن يَاعْقُوبْ، أَمذْيَازْ إِعِيزّنْ ن إِسْرَائِيل.
٢ أَرُّوحْ ن سِيذِي إِسِّيوڒْ زَّايِي ؤُ أَوَاڒْ نّسْ خْ إِڒسْ إِنُو.
٣ أَربِّي ن إِسْرَائِيل إِنَّا، أَقَا ثَاصْضَارْثْ ن إِسْرَائِيل ثسِّيوڒْ أَكِيذِي:
”إِجّْ ن ڒْْحَاكمْ جَارْ إِوْذَانْ،
إِجّْ ن ؤُمْسڭّذْ،
إِجّْ ن ڒْْحَاكمْ نِّي إِتّڭّْوذنْ أَربِّي،
٤ ونِّي إِڭِّينْ أَمْ ثْفَاوْثْ غَارْ ثُوفُّوثْ
خْمِي د-ثْنقَّارْ ثْفُوشْثْ،
غَارْ إِشْثْ ن ثُوفُّوثْ
بْڒَا إِسيْنُوثنْ إِعْبُوبّْزنْ،
خْمِي، س ثِيسِّيقْثْ ن ثْفَاوْثْ
أَوَارْنِي إِ ونْژَارْ،
أَقَا إِسّْفُوفُّويْ أَغمُّويْ أَزِيزَا
زِي ثمُّورْثْ.“
٥ ”مَا وَارْ ثدْجِي ثَادَّارْثْ إِنُو
غَارْ أَربِّي أَمنِّي؟
أَقَا إِڭَّا أَيِي إِجّْ ن ڒْْعَاهْذْ إِ ڒبْذَا،
مْستّفْ ذِي مَارَّا ؤُ إِتّْوَاحْضَا.
قَاعْ أَسنْجمْ إِنُو
ذ مَارَّا مِينْ إِسّْنكَّارَانْ ڒفْرَاحثْ،
مَا نتَّا وَارْ إِسّْغمِّي أَيَا؟
٦ مَاشَا إِنِّي وَارْ إِسكّْوِينْ
أَذْ تّْوَامّنْضَارنْ
أَمْ إِشْثْ ن ثْسطَّا أَكْ-ذ إِسنَّاننْ،
مَارَّا نِيثْنِي،
مَاغَارْ وَارْ إِزمَّارْ
أَذْ تّْوَاطّْفنْ س ؤُفُوسْ.
٧ أَرْيَازْ إِ إِخْسنْ أَذْ ثنْثْ إِحَاذَا،
أَذْ إِحزّمْ إِخفْ نّسْ س وُوزَّاڒْ
ذ ؤُكشُّوضْ نْ لَانْسَا
ؤُ نِيثْنِي أَذْ تّْوَاسّْشمْضنْ س ثْمسِّي
ذڭْ ومْشَانْ نْسنْ.“
أَيْثْ ن بُو-ثغْرُوضْثْ ن ذَاوُوذْ
٨ إِنَا ذ إِسْمَاونْ ن أَيْثْ ن بُو-ثغْرُوضْثْ إِ إِدْجَانْ غَارْ ذَاوُوذْ: يُوشَايْبْ بَاشَابَّاثْ، مِّيسْ ن أَثَاهْكَامُونِي، أَزدْجِيفْ ن إِنغْرَافنْ. لَانْسَا نّسْ ثُوغَا ذ ڒهْزُوطْ نّسْ، إِسّْنُوقّبْ ثمْنْ-مْيَا ن يرْيَازنْ ذڭْ إِجّْ ن ؤُمنْغِي.
٩ أَوَارْنِي أَسْ يُوسَا-د أَلِيعَازَارْ، مِّيسْ ن ذُوذُو، مِّيسْ ن أَخُوخِي. نتَّا ثُوغَا ذ إِجّنْ زِي ثْڒَاثَا ن أَيْثْ ن بُو-ثغْرُوضْثْ نِّي إِدْجَانْ أَكْ-ذ ذَاوُوذْ، ڒَْامِي نِيثْنِي سْثهْزَانْ زڭْ إِفِيلِيسْطِينِييّنْ نِّي ثُوغَا ذِينْ مُوننْ إِ ؤُمنْغِي، أَمْ ڭعّْذنْ إِرْيَازنْ ن إِسْرَائِيل غَارْسنْ إِ ؤُمنْغِي.
١٠ نتَّا إِكَّارْ، إِوْثَا ذڭْ إِفِيلِيسْطِينِييّنْ أَڒْ يُوحڒْ ؤُفُوسْ نّسْ. إِڒْصقْ ؤُفُوسْ نّسْ ذِي سِّيفْ. سِيذِي يِيوِيضْ إِجّْ ن ؤُسنْجمْ ذ أَمقّْرَانْ ذڭْ وَاسّْ نِّي ؤُشَا إِرْيَازنْ ن ڒْْڭنْسْعقْبنْ أَوَارْنِي أَسْ، مَاشَا مْغِيرْ حِيمَا أَذْ كشّْضنْ.
١١ أَوَارْنِي أَسْ يُوسَا-د شَامَّا، مِّيسْ ن أَجِي، أَهَارَارِي. ڒَْامِي نّْجَارْونْ إِفِيلِيسْطِينِييّنْ غَارْ لَاخِي، ثُوغَا ذِينِّي إِجّْ ن إِيَّارْ إِشُّورنْ س ڒعْذسْ. ڒْْڭنْسْ ثُوغَا يَارْوڒْ زَّاثْ إِ وُوذمْ ن إِفِيلِيسْطِينِييّنْ.
١٢ نتَّا إِبدّْ ذِي ڒْوسْثْ ن ؤُرقِّيعْ ن إِيَّارْ نِّي، إِفكّْ إِ-ث-إِ-د ؤُشَا إِغْڒبْ خْ إِفِيلِيسْطِينِييّنْ. أَمُّو يَارَّا أَسْ سِيذِي إِجّْ ن وغْڒَابْ ذ أَمقّْرَانْ.
١٣ ثْڒَاثَا زِي ثْڒَاثِينْ ن إِزدْجِيفنْ هْوَانْ، ؤُسِينْ-د غَارْ ذَاوُوذْ ذِي ڒْْوقْثْ ن ثْميْرَا، ذڭْ إِفْرِي ن أَبْذُولَّامْ. ثُوغَا ذِينْ إِشْثْ ن ثرْبِيعْثْ ن إِفِيلِيسْطِينِييّنْ ثوْثَا إِقِيضَانْ نْسنْ ذِي ثغْزُورْثْ ن إِرَافَاوِييّنْ.
١٤ ذَاوُوذْ ثُوغَا-ث ذِي لْقلْعَا ؤُ ثُوغَا ذِينْ إِشْثْ ن ثڒْبِيحْثْ ن ڒْْعسْكَارْ ن إِفِيلِيسْطِينِييّنْ ذِي بَايْثْ-لَاحْمْ.
١٥ ؤُشَا ذَاوُوذْ إِڒْقفْ إِ-ث ؤُفَاذِي، إِنَّا: ”وِي ذ أَيِي إِ د غَا يَاوْينْ أَمَانْ زِي ثَاڒَا ن بَايْثْ-لَاحْمْ إِ إِدْجَانْ غَارْ ثوَّارْثْ ن ثنْذِينْثْ؟“
١٦ خنِّي شُوقنْ ثْڒَاثَا ن أَيْثْ ن بُو-ثغْرُوضْثْ نِّي ڒْْمَارْڭحْ ن ڒْْعسْكَارْ ن إِفِيلِيسْطِينِييّنْ، ؤُيْمنْ-د أَمَانْ زِي ثَاڒَا ن بَايْثْ-لَاحْمْ، إِ إِدْجَانْ غَارْ ثوَّارْثْ ن ثنْذِينْثْ. كْسِينْ ثنْ أَكِيذْسنْ ؤُ إِوْضنْ غَارْ ذَاوُوذْ، مَاشَا نتَّا يُوڭِي أَذْ ثنْ إِسُو ؤُشَا إِزدْجعْ إِ-ثنْ زَّاثْ إِ سِيذِي.
١٧ نتَّا إِنَّا: ”أَيَا إِڭّْوجْ خَافِي، أَ سِيذِي، أَقَا نشّْ أَذْ ڭّغْ مَانْ أَيَا. مَا أَذْ سْوغْ إِذَامّنْ ن يرْيَازنْ، إِنِّي ذِينْ إِرُوحنْ أَمْ سبّْڒنْ ثُوذَارْثْ نْسنْ؟“ ؤُ نتَّا وَارْ إِخْسْ أَذْ ثنْ إِسُو. ذ مَانْ أَيَا إِ ث إِڭِّينْ ثْڒَاثَا ن أَيْثْ ن بُو-ثغْرُوضْثْ نِّي.
١٨ أَبِيشَايْ، مِّيسْ ن يُووَابْ، مِّيسْ ن صَارُويَا، ثُوغَا ذ أَزدْجِيفْ ن ثْڒَاثَا نِّي. نتَّا إِحنّضْ لَانْسَا نّسْ خْ ثڒْثْ-مْيَا، إِسّْنُوقّبْ إِ-ثنْ. نتَّا غَارسْ إِجّْ ن إِسمْ إِتّْوَاشنّعْ جَارْ ثْڒَاثَا نِّي.
١٩ مَا وَارْ إِدْجِي نتَّا ذ ونِّي إِتّْوَاشنّْعنْ أَطَّاسْ زِي ثْڒَاثَا-يَا؟ س ؤُيَا ثُوغَا نتَّا ذ ڒْْقبْطَانْ نْسنْ. مَاشَا نتَّا وَارْ يِيوِيضْ ؤُڒَا غَارْ ثْڒَاثَا ن إِمزْوُورَا.
٢٠ خنِّي بَانَايَا، مِّيسْ ن يَاهُويَاذَاعْ، مِّيسْ ن إِجّْ ورْيَازْ إِمحْضنْ، ثِيمڭَّا نّسْ مْغَارنْثْ، نتَّا زِي قَابْضِييِيلْ. نتَّا إِغْڒبْ خْ ثْنَاينْ ن إِيْرَاذنْ إِجهْذنْ. عَاوذْ ثُوغَا نتَّا إِهْوَا إِشْثْ ن ثْوَاڒَا، إِغْڒبْ خْ إِجّْ ن ويْرَاذْ ذِي ڒْْوسْطْ ن إِجّْ ن وَانُو ذڭْ إِجّْ ن وَاسّْ ؤُمِي إِوْثَا وذْفڒْ.
٢١ نتَّا إِغْڒبْ ؤُڒَا خْ يِيجّْ ن ورْيَازْ ذ أَمِيصْرِي، إِجّْ ن ورْيَازْ إِسّڭّْوَاذنْ. أَمِيصْرِي ثُوغَا غَارسْ إِشْثْ ن لَانْسَا ذڭْ ؤُفُوسْ نّسْ. إِهْوَا غَارسْ س يِيجّْ ن وعْمُوذْ، إِكّسْ لَانْسَا زڭْ ؤُفُوسْ ن ؤُمِيصْرِي ؤُ إِنْغَا إِ-ث س لَانْسَا نّسْ.
٢٢ ذ مَانْ أَيَا إِ إِڭَّا بَانَايَا، مِّيسْ ن يَاهُويَاذَاعْ. س ؤُيَا غَارسْ إِسمْ إِشْنعْ جَارْ ثْڒَاثَا ن أَيْثْ ن بُو-ثغْرُوضْثْ.
٢٣ نتَّا ثُوغَا ذ ونِّي إِتّْوَاشنّْعنْ أَطَّاسْ زِي ثْڒَاثِينْ، مَاشَا وَارْ يِيوضْ أَڒْ ثْڒَاثَا إِمزْوُورَا. ذَاوُوذْ إِڭَّا إِ-ث جَارْ إِمْثِيقَّانْ نّسْ.
٢٤ ثُوغَا عَسَائِيلْ، ؤُمَاسْ ن يُووَابْ، جَارْ ثْڒَاثِينْ؛
إِلْحَانَانْ، مِّيسْ ن ذُوذُو، زِي بَايْثْ-لَاحْمْ؛
٢٥ شَامْعَا، أَحَارُوذِي؛
إِلِيقَا، أَحَارُوذِي؛
٢٦ هَالَاصْ، أَفَالْطِي؛
عِيرَا، مِّيسْ ن عِيقِّيشْ، أَثِيقُّوعِي؛
٢٧ أَبِيعَازَارْ، أَعَانَاثُوثِي؛
مابُونَّايْ، أَحُوشَايِي؛
٢٨ صَالْمُونْ، أَخُوخِي؛
مَاهْرَايْ، أَنَاطُوفَاثِي؛
٢٩ خَالَابْ، مِّيسْ ن بَاعْنَا، أَنَاطُوفَاثِي؛
إِتَّايْ، مِّيسْ ن رِيبَايْ،
زِي جِيبْعَا زڭْ أَيْثْ ن بِينْيَامِينْ؛
٣٠ بَانَايَا، زِي فِيرْعَاثُونْ؛
هِيدَّايْ، زِي ثغْزُورِينْ ن جَاعَاشْ؛
٣١ أَبُو-عَالْبُونْ، أَعَارَابَاثِي؛
عَازْمَاوثْ، أَبَارْحُومِي؛
٣٢ إِلْيَاحْبَا، أَشَاعْلُوبُونِي؛
زڭْ إِحنْجِيرنْ ن يَاشَانْ، مْغِيرْ يُونَاثَانْ؛
٣٣ شَامَّا، أَهَارَارِي؛
أَخِييَامْ، مِّيسْ شَارَارْ، أَرَارِي؛
٣٤ إِلِيفَالَاطْ، مِّيسْ ن أَحَاسْبَايْ، مِّيسْ ن ؤُمَاعْكِي؛
إِعَامْ، مِّيسْ ن أَخِيطُوفِيلْ، أَجِيلُونِي؛
٣٥ حَاصْرَايْ، أَكَارْمَالِي؛
فَاعْرَايْ، أَلَارْبِي؛
٣٦ يِيجْعَالْ، مِّيسْ ن نَاثَانْ، زِي صُوبَا؛
بَانِي، أَجَاذِي؛
٣٧ صَالَاقْ، أَعَامُّونِي؛
نَاحْرَايْ، أَبِيعْرُوثِي،
أَحمَّاڒْ ن ڒسْنَاحْ ن يُووَابْ، مِّيسْ ن صَارُويَا؛
٣٨ عِيرَا، أَيِيثْرِي؛
جَارِيبْ، أَيِيثْرِي؛
٣٩ ؤُرِييَا، أَحِيتِّي.
مَارَّا جْمِيعْ سبْعَا ؤُ-ثْڒَاثِينْ ن يرْيَازنْ.