٢٢
إِزْڒِي ن ذَاوُوذْ
١ ذَاوُوذْ إِسِّيوڒْ أَوَاڒنْ ن إِزْڒِي-يَا إِ سِيذِي ذڭْ وَاسّْ ؤُمِي ث إِفكّْ سِيذِي زڭْ ؤُفُوسْ ن مَارَّا ڒْْعذْيَانْ نّسْ ؤُ زڭْ ؤُفُوسْ ن شَاوُولْ.
٢ نتَّا إِنَّا:
”سِيذِي ذ ثَاصْضَارْثْ إِنُو
ذ لْبُورْجْ إِنُو ذ أَمْفكِّي إِنُو.
٣ سِيذِي ن ثصْضَارْثْ إِنُو، غَارسْ أَركّْوَاڒغْ.
شكْ ذ أَسڒْقِي إِنُو
ذ يِيشّْ ن ؤُسنْجمْ إِنُو،
لْبُورْجْ إِنُو يُوعْڒَانْ،
أَمْشَانْ إِنُو ن ثَاروْڒَا ذ أَمْسنْجَامْ إِنُو.
شكْ ثْفكّذْ أَيِي زِي لْعُونْفْ.
٤ ڒَْاغِيغْ: أَسمْغَارْ إِ سِيذِي!،
ؤُشَا تّْوَاسّْنجْمغْ زِي ڒْْعذْيَانْ إِنُو.
٥ مَاغَارْ نّْضنْ أَيِي-د
ڒمْوَاجْ ن ڒْْموْثْ،
سِّيڭّْوذنْثْ أَيِي
ڒْْحمْڒَاثْ ن وَامَانْ إِهَاجنْ.
٦ إِسغْوَانْ ن ڒَْاخَارْثْ شَارْفنْ أَيِي،
ثِيخشْفِينْ ن ڒْْموْثْ حْصَارنْثْ أَيِي.
٧ ذِي ڒحْصَارثْ إِنُو ڒَْاغِيغْ-د خْ سِيذِي
ؤُ خْ أَربِّي إِنُو إِ خْ د-ڒَْاغِيغْ.
زِي زَّاوشْثْ ثَامقّْرَانْثْ نّسْ
إِسْڒَا نتَّا إِ ثْمِيجَّا إِنُو
ؤُشَا إِغُويَّانْ إِنُو ؤُذْفنْ
غَارْ إِمزُّوغنْ نّسْ.
٨ خنِّي ثنْهزّْ ؤُ ثَارْجِيجِي ثمُّورْثْ،
ذْسُوسَا ن ؤُجنَّا
تّْرَاحنْ-د تَّاسنْ-د، نْهزّنْ،
مَاغَارْ أَغْضَابْ نّسْ ثُوغَا إِتّْوَاسَّارْغْ.
٩ دّخَّانْ إِڭعّذْ-د زڭْ ونْزَارنْ نّسْ،
ثِيمسِّي زڭْ ؤُقمُّومْ نّسْ ثْصَارْضْ،
ڒفْحمْ إِتّحْذُوذُوقنْ إِتّْوَاسَّارْغْ زَّايسْ.
١٠ نتَّا إِڭَّا أَجنَّا أَذْ يَاضَارْ،
نتَّا إِهْوَا-د.
أَقَا ذِينْ إِجّْ ن ؤُسيْنُو إِبُّومْبسْ
سَاذُو إِضَارنْ نّسْ.
١١ نتَّا إِنْذهْ خْ إِجّْ ن ؤُكِيرُوبْ، إِضْوَا،
نتَّا إِتّْوَاژَارْ خْ وَافْرِيونْ ن ؤُسمِّيضْ.
١٢ نتَّا إِڭَّا ثَادْجسْثْ أَذْ أَسْ ثنّضْ
أَمْ إِعُوشُّوثنْ،
إِجّْ ن وڭْرَاوْ ن وَامَانْ،
إِسيْنُوثنْ إِقلّْجنْ إِبَّارشْننْ.
١٣ زِي ثِيسِّيقْثْ قِيبَاتْشْ نّسْ
تّْوَاسَّارْغنْ ڒفْحمْ إِتّحْذُوذُوقنْ.
١٤ إِجَّا سِيذِي أَجَّاجْ أَذْ إِدُّوقّزْ زڭْ ؤُجنَّا،
ؤُشَا أَمْعُودْجِي خْ كُوڒْشِي
إِڭَّا ثْمِيجَّا نّسْ تّْنفْرَارَا.
١٥ نتَّا إِسّكّْ فْڒِيثْشَاثْ ن ڒْْقوْسْ نّسْ
ؤُشَا إِبزّعْ إِ-ثنْ،
إِزَّارْيضْ أَسَّامنْ ؤُشَا إِسِّيڭّْوذْ إِ-ثنْ.
١٦ ثِيسِيوِينْ ن ڒبْحَارْ ذوْڒنْثْ تّْبَاننْثْ،
ذْسُوسَا ن دُّونشْثْ ذوْڒنْ عَارَّانْ
زڭْ ؤُودّبْ ن سِيذِي،
زڭْ ؤُسُوضِي ن ڒعْوِينْ زڭْ ونْزَارنْ نّسْ.
١٧ إِسّْوِيژّضْ-د أَفُوسْ نّسْ زِي ڒُْوعْڒَا،
يِيوِي أَيِي، إِجْبذْ أَيِي-د زڭْ وَامَانْ مْغَارنْ.
١٨ نتَّا إِفكّْ أَيِي-د
زِي ڒعْذُو إِنُو إِجهْذنْ،
زڭْ إِنِّي ذ أَيِي إِشَارّْهنْ،
مِينْزِي نِيثْنِي ثُوغَا جهْذنْ خَافِي.
١٩ حْصَارنْ أَيِي ذڭْ وَاسّْ ن أَرْژِييّثْ إِنُو،
مَاشَا سِيذِي ثُوغَا ذ أَمْعمّذْ إِنُو.
٢٠ نتَّا إِنْذهْ أَيِي غَارْ تَّاسِيعْ، إِسّنْجمْ أَيِي،
مَاغَارْ نتَّا ثُوغَا إِتّْعِيزَّا ذَايِي.
٢١ سِيذِي إِخْڒفْ أَيِي عْلَاحْسَابْ ثَاسڭْذَا إِنُو،
عْلَاحْسَابْ ثَازْذُوڭِي ن إِفَاسّنْ إِنُو إِخدْجصْ أَيِي.
٢٢ مَاغَارْ نشّْ حْضِيغْ إِبْرِيذنْ ن سِيذِي،
وَارْ حيّْذغْ شَا خْ أَربِّي إِنُو س ؤُخيّبْ.
٢٣ مَاغَارْ مَارَّا لْفَارَايِيضْ نّسْ
ثُوغَا جَارْ ثِيطَّاوِينْ إِنُو،
وَارْ حيِّيذغْ شَا خْ ثْوصَّا نّسْ.
٢٤ ذوْڒغْ كمْڒغْ إِ نتَّا،
حْضِيغْ إِخفْ إِنُو زِي ڒْْمُوعْصِييّثْ إِنُو.
٢٥ سِيذِي إِخْڒفْ أَيِي أَنشْثْ ن ثَاسڭْذَا إِنُو،
أَنشْثْ ن ثَازْذُوڭِي إِنُو زَّاثْ إِ ثِيطَّاوِينْ نّسْ.
٢٦ إِ ؤُمدُّوكّڒْ أَمْثِيقِّي
إِ ثدْجِيذْ ذ أَمدُّوكّڒْ ذ أَمْثِيقِّي،
إِ بُو-ثغْرُوضْثْ إِكمّْڒنْ
إِ ثدْجِيذْ شكْ ثْكمّْڒذْ.
٢٧ إِ ونِّي إِتّْوَاسِّيزذْڭنْ
أَقَا شكْ ذ أَمزْذَاڭْ،
أَكْ-ذ ونِّي إِفَارْغنْ، أَقَا ثْفَارْغذْ.
٢٨ شكْ ثسّْنجْمذْ ڒْْڭنْسْ إِتّْوَاحْصَارْ،
مَاشَا ثِيطَّاوِينْ نّشْ ضِيدّْ إِ إِمْعفَّارنْ،
شكْ أَذْ ثنْ ثسّهْوِيذْ.
٢٩ مِينْزِي شكْ ذ ڒفْنَارْ إِنُو، أَ سِيذِي!
سِيذِي إِتّڭّْ ثَافَاوْثْ ذِي ثَادْجسْثْ إِنُو.
٣٠ مِينْزِي أَكِيذكْ أَذْ أَزّْڒغْ
خْ إِشْثْ ن بَانْذِييَّا،
أَكْ-ذ أَربِّي إِنُو أَذْ نڭّْزغْ
خْ إِجّْ ن ڒْْحِيضْ.
٣١ أَبْرِيذْ ن أَربِّي إِكْمڒْ، مِينْ إِقَّارْ سِيذِي
أَقَا إِتّْوَاصفَّا ذِي ثْمسِّي.
نتَّا ذ أَسڒْقِي إِ مَارَّا
إِنِّي غَارسْ يَاركّْوَاڒنْ.
٣٢ مَاغَارْ مَانْ ونْ إِ إِدْجَانْ ذ أَربِّي،
مْغِيرْ سِيذِي،
ؤُ مَانْ ونْ إِ إِدْجَانْ ذ ثَاصْضَارْثْ،
مْغِيرْ أَربِّي نّغْ؟
٣٣ أَربِّي نِّي ذ لْقلْعَا إِنُو إِجْهذْ،
نتَّا إِسَّارْخُو أَبْرِيذْ إِنُو نِيشَانْ.
٣٤ نتَّا إِڭَّا إِضَارنْ إِنُو
أَمْ يِينِّي ن ثُوذَاذِينْ،
نتَّا يَارَّا أَيِي
أَذْ بدّغْ خْ ڒڭْعُوذِي إِنُو.
٣٥ نتَّا إِسّڒْمذْ إِفَاسّنْ إِنُو إِ ؤُمنْغِي،
إِغَادْجنْ إِنُو مَاحنْذْ أَذْ محْضنْ
إِجّْ ن ڒْْقوْسْ ن نّْحَاسْ.
٣٦ ثوْشِيذْ أَيِي أَسڒْقِي ن ؤُسنْجمْ نّشْ،
س ؤُوَاضعْ نّشْ ثسّمْغَارذْ أَيِي.
٣٧ أَقَا ثڭّذْ تَّاسِيعْ إِ ؤُصُورِيفْ إِنُو سَاذُو إِنُو،
ؤُشَا ثِيشعْبِينْ إِنُو وَارْ ميّْڒنْثْ.
٣٨ نشّْ ضْفَارغْ ڒْْعذْيَانْ إِنُو
ؤُشَا ثحِّيغْ ثنْ،
وَارْ د-تّْعِيقِّيبغْ أَڒْ ثنْ قْضِيغْ.
٣٩ نشّْ قْضِيغْ ثنْ ؤُ ڒبْزغْ ثنْ،
أَڒَامِي وَارْ كَّارنْ عَاوذْ.
نِيثْنِي وْضَانْ-د سَاذُو إِضَارنْ إِنُو.
٤٠ شكْ ثْبيْسذْ أَيِي س جّهْذْ إِ ؤُمنْغِي،
ثَارِّيذْ إِنِّي غَارِي د-إِكَّارنْ
أَذْ أَضَارنْ سَاذُو إِنُو.
٤١ شكْ ثوْشِيذْ أَيِي ثِيمجَّارْثْ ن ڒْْعذْيَانْ إِنُو،
ن يِينِّي ذ أَيِي إِشَارّْهنْ،
ؤُ نشّْ أَردّْدْجغْ ثنْ.
٤٢ نِيثْنِي ڒَْاغَانْ، مَاشَا وَارْ ذِينْ ثُوغِي أَمْسنْجمْ،
ڒَْاغَانْ، خْ سِيذِي،
مَاشَا نتَّا وَارْ خَاسنْ د-يَارِّي.
٤٣ نشّْ سّْودَّارغْ ثنْ
أَمْ ثْعجَّاجْثْ ن ثمُّورْثْ،
أَمْ ؤُبدْجَاعْ خْ إِبْرِيذنْ
عجْنغْ خَاسنْ ؤُ ڒبْزغْ ثنْ.
٤٤ شكْ ثْفكّذْ أَيِي
زڭْ إِمْشُوبّشنْ ن ڒْْڭنْسْ إِنُو،
ثحْضِيذْ أَيِي ذ أَزدْجِيفْ ن ڒڭْنُوسْ،
إِجّْ ن ڒْْڭنْسْ وَارْ ث سِّينغْ، أَذْ أَيِي إِسخَّارْ.
٤٥ ثَارْوَا ن إِجّْ ن ؤُبَارَّانِي
سّْنِيعْمِيڒنْ سّْوَاضْعنْ أَيِي.
مْغِيرْ ڒَْامِي ذ أَيِي إِسْڒَا ؤُمزُّوغْ نْسنْ وَاهَا،
سْڒِينْ-د غَارِي.
٤٦ أَرَّاونْ ن إِجّْ ن ؤُبَارَّانِي فشْڒنْ،
وَاخَّا نّْضنْ أَسنْ-د لْبَارَاجَاثْ نْسنْ.
٤٧ ثُوذَارْثْ إِ سِيذِي.
أَذْ ثتّْوَابَاركْ ثصْضَارْثْ إِنُو.
أجّْ أَربِّي ن ثصْضَارْثْ ن ؤُسنْجمْ إِنُو
أَذْ إِتّْوَاسّْڭعّذْ غَارْ ؤُجنَّا!.
٤٨ أَربِّي ونِّي خَافِي إِتّنْثَاقَامنْ
ذ ونِّي ذ أَيِي إِتّڭّنْ ڒڭْنُوسْ
سَاذُو ؤُفُوسْ إِنُو،
٤٩ ونِّي ذ أَيِي إِتّْفكَّانْ
زڭْ ؤُفُوسْ ن ڒْْعذْيَانْ إِنُو،
وَاهْ، شكْ ثسّْڭعَّاذذْ أَيِي
ثِيوَا ن يِينِّي ذ أَيِي إِتّْضَادَّانْ،
شكْ ثسّنْجَامذْ أَيِي
زڭْ ورْيَازْ ن ڒخْشُونثْ.
٥٠ خْ ؤُيَا، سِيذِي، خْسغْ أَذْ شكْ قَاذِيغْ،
خْسغْ أَذْ زهّْذغْ إِسمْ نّشْ.
٥١ نتَّا إِڭَّا إِسنْجِيمنْ
ن ؤُجدْجِيذْ نّسْ مْغَارنْ،
ؤُشَا إِسّْشنْ ثَامخْسِيوْثْ نّسْ إِشوَّارنْ
إِ ؤُمذْهُونْ نّسْ،
إِ ذَاوُوذْ ؤُ إِ زَّارِيعثْ نّسْ إِ ڒبْذَا.“