٤
ڒْعَارْشْ ذڭْ ؤُجنَّا
١ أَوَارْنِي مَانْ أَيَا، خْزَارْ، إِشْثْ ن ثوَّارْثْ ثنُّورْزمْ ذڭْ ؤُجنَّا. ؤُشَا ثْمِيجَّا إِ سْڒِيغْ أَكِيذِي د-إِسَّاوَاڒنْ أَمْ يِيجّْ ن ؤُسُوضِي ذڭْ ؤُيِيشّْ ن إِشَارِّي، ثنَّا: ”ڭعّذْ ذَا، خنِّي نشّْ أَذْ أَشْ سّشْنغْ مِينْ ڭُّورْ أَذْ إِمْسَارْ أَوَارْنِي مَانْ أَيَا.“
٢ ڒخْذنِّي إِرحّفْ أَيِي-د أَرُّوحْ، ؤُ خْزَارْ، إِجّْ ن ڒْْعَارْشْ إِبدّْ ذڭْ ؤُجنَّا، ثُوغَا نتَّا إِقِّيمْ خَاسْ.
٣ ؤُ ثِيفْرَاسْ ن ونِّي خَاسْ إِقِّيمنْ أَمْ وژْرُو ن يَاسْبِيسْ ذ سَارْذِييُوسْ، ؤُشَا ثَاسْڒِيثْ ن ونْژَارْ ن إِسيْنُوثنْ إِ-د-إِتّنّْضنْ إِ ڒْعَارْشْ إِضْهَارْ أَمْ وژْرُو ن سْمَارَاخْثْ.
٤ قُووَّارنْ أَسْ إِ ڒْْعَارْشْ أَربْعَا ؤُ عِيشْرِينْ ن ڒكْرَاسِي إِڭلّْذنْ ؤُشَا أَربْعَا ؤُ-عِيشْرِينْ ن إِمْغَارنْ ثُوغَا قِّيمنْ خْ ڒكْرَاسِي إِڭلّْذنْ، أَرْضنْ أَرُّوضْ ذ أَشمْڒَاڒْ، غَارْسنْ خْ ؤُزدْجِيفْ تِّيجَانْ ن وُورغْ.
٥ ؤُشَا زِي ڒْْعَارْشْ نِّي تّفّْغنْ-د زَّايسْ وَاجَّاجنْ ذ أَسَّامنْ ذ ثْمِيجَّاوِينْ. زَّاثْ إِ ڒْْعَارْشْ أَرقّنْ سبْعَا ن إِصفْضَاونْ، ثِينَا ذ سبْعَا ن أَرُّوحَاثْ ن أَربِّي.
٦ غَارْ زَّاثْ ن ڒْْعَارْشْ ثُوغَا ذِينْ إِجّْ ن ڒبْحَارْ ن زَّاجْ، إِڭَّا أَمْ أَكْرِيسْثَالْ. ذِي ڒْْوسْطْ ن ڒْْعَارْشْ ذ مِينْ ذ أَسْ د-إِنّْضنْ ثُوغَا ذِينْ أَربْعَا ن إِمُودَّارنْ،عمَّارنْ س ثِيطَّاوِينْ مَارَّا غَارْ زَّاثْ ذ ضفَّارْ.
٧ أَمُودَّارْ أَمزْوَارُو يَارْوسْ ذڭْ وَايْرَاذْ، أَمدَّارْ وِيسّْ ثْنَاينْ يَارْوسْ ذڭْ ؤُعجْمِي، أَمدَّارْ وِيسّْ ثْڒَاثَا ثُوغَا أَغمْبُوبْ نّسْ أَخْمِي ن بْنَاذمْ ؤُشَا أَمُودَّارْ وِيسّْ أَربْعَا يَارْوسْ ذڭْ ؤُڭِيذرْ إِطَّاونْ.
٨ كُوڒْ إِجّنْ زِي أَربْعَا ن إِمُودَّارنْ ثُوغَا إِبدّْ، تّفّْغنْ-د زڭْ وَاشَّارنْ نّسْ ذ سنّجْ ستَّا ن وَافْرِيونْ إِ د أَسْ د-إِنّْضنْ،عمَّارنْ س ثِيطَّاوِينْ غَارْ ذَاخڒْ. نِيثْنِي وَارْ ژْرِينْ أَرَّاحثْ أَسّْ ذ دْجِيڒثْ، نَّانْ:
”أَمْقدَّاسْ، أَمْقدَّاسْ،
أَمْقدَّاسْ ذ سِيذِي أَربِّي،
أَمْزمَّارْ خْ كُوڒْشِي
ذ ونِّي ثُوغَا، ذ ونِّي إِدْجَانْ،
ذ ونِّي د غَا يَاسنْ.“
٩ ؤُشَا خْمِي غَا وْشنْ أَربْعَا ن إِمُودَّارنْ أَعُودْجِي ذ شَّانْ ذ ؤُقَاذِي إِ ونِّي إِقِّيمنْ خْ ڒْْعَارْشْ، ذ ونِّي إِدَّارنْ إِ ڒبْذَا قَاعْ - ”أَمِينْ!“ -
١٠ خنِّي أَربْعَا ؤُ عِيشْرِينْ ن إِمْغَارنْ وْضَانْ غَارْ ثمُّورْثْ غَارْ زَّاثْ ن ونِّي إِقِّيمنْ خْ ڒْْعَارْشْ، سجْذنْ إِ ونِّي إِدَّارنْ إِ ڒبْذَا قَاعْ - ”أَمِينْ!“ - ؤُشَا سَّارْسنْ تِّيجَانْ نْسنْ غَارْ زَّاثْ إِ ڒْْعَارْشْ، نَّانْ:
١١ ”شكْ، أَ سِيذِيثْنغْ ذ أَربِّي نّغْ،
ثسْذَاهدْجذْ أَذْ ثكْسِيذْ
أَعُودْجِي ذ شَّانْ ذ جّهْذْ،
مَاغَارْ شكْ ذ ونِّي إِڭِّينْ مَارَّا ثِيمسْڒَايِينْ-أَ،
ؤُ أَقَا أَثنْثْ ذِينْ
ؤُ تّْوَاخڒْقنْثْ س ڒْْخَاضَارْ نّشْ!“