٣
١ أَرِي إِ لْمَالَاكْ ذِي ثْمسْمُونْثْ ن سَارْذِيسْ!
”أَمُّو إِ إِقَّارْ ونِّي غَارْ إِدْجَا سبْعَا ن أَرُّوحَاثْ ن أَربِّي ذ سبْعَا ن يثْرَانْ:
’نشّْ سّْنغْ ڒخْذَايمْ نّشْ، أَقَا غَاركْ إِسمْ، بلِّي أَقَا ثدَّارذْ، مَاشَا شكْ أَقَا ثتّْمتِّيذْ.
٢ حْضَا، سجْهذْ مِينْ إِقِّيمنْ، إِنِّي ثنْوِيذْ شكْ أَذْ ثنْ ثتّجِّيذْ أَذْ ثمّْثمْ، مَاغَارْ ؤُفِيغْ أَقَا ڒخْذَايمْ نّشْ وَارْ كمّْڒنْثْ شَا غَارْ أَربِّي.
٣ عْقڒْ مْلِيحْ، مَامّشْ خَاسْ ثسْڒِيذْ ؤُ مَامّشْ ثطّْفذْ، حْضَا ؤُشَا ثُوبْ! مَاشَا مَاڒَا وَارْ ثتّْفِيقذْ، أَذْ غَاركْ د-أَسغْ أَمْ ؤُشفَّارْ، وَارْ ثسِّينذْ شَا ذِي مَانْ ثَاسَاعّثْ إِ خَاكْ د غَا بدّغْ.
٤ مَاشَا غَارِي شَا ن إِسْمَاونْ ذِي سَارْذِيسْ، إِنِّي وَارْ إِسّْخمْجنْ شَا أَرُّوضْ نْسنْ ؤُشَا نِيثْنِي ڭُّورنْ زَّاثِي س وَارُّوضْ ذ أَشمْڒَاڒْ، مِينْزِي نِيثْنِي سْذَاهدْجنْ ث.
٥ ونِّي إِ غَا إِغلّْبنْ أَمُّو، أَذْ أَسْ يَارْضنْ أَرُّوضْ ذ أَشمْڒَاڒْ.عمَّارْصْ أَذْ كّْسغْ إِسمْ نّسْ زڭْ وذْلِيسْ إِتّْوَانْضنْ ن ثُوذَارْثْ، مَاشَا أَذْ شهْذغْ خْ يِيسمْ نّسْ زَّاثْ إِ بَابَا ذ لْمَالَاكَاثْ نّسْ.
٦ ونِّي غَارْ دْجَانْ إِمزُّوغنْ، أجّْ إِ-ث أَذْ إِسڒْ مِينْ إِقَّارْ أَرُّوحْ إِ ثْمسْمُونِينْ.‘ “
٧ أَرِي إِ لْمَالَاكْ ن ثْمسْمُونْثْ ن فِيلَاذِيلْفِييَا!
”أَمُّو إِ إِقَّارْ ؤُمْقدَّاسْ ونِّي ذ ثِيذتّْ ذ ونِّي غَارْ إِدْجَا ثْسَارُوثْ ن ذَاوُوذْ ذ ونِّي إِ غَا يَارزْمنْ، خنِّي ؤُڒَا ذ إِجّنْ أَذْ إِبلّعْ، ذ ونِّي إِ غَا إِبلّْعنْ، خنِّي ؤُڒَا ذ إِجّنْ أَذْ يَارْزمْ:
٨ ’نشّْ سّْنغْ ڒخْذَايمْ نّشْ. خْزَارْ، نشّْ ڭِّيغْ زَّاثشْ إِشْثْ ن ثوَّارْثْ ثَارْزمْ، ثنِّي ؤُڒَا ذ إِجّْ وَارْ إِزمَّارْ أَذْ ت إِبلّعْ، مِينْزِي وَاخَّا جّهْذْ نّشْ ذ أَمژْيَانْ، قَاعْ أَمنِّي ثحْضِيذْ أَوَاڒْ إِنُو ؤُشَا وَارْ ثنْكَارذْ شَا إِسمْ إِنُو.
٩ خْزَارْ، أَذْ وْشغْ شَا زِي ثمْزِيذَا ن شِّيطَانْ، إِنِّي إِقَّارنْ أَقَا نِيثْنِي ذ ؤُذَاينْ، مَاشَا نِيثْنِي وَارْ دْجِينْ شَا أَمنِّي، مَاشَا نِيثْنِي سّْخَارِّيقنْ. خْزَارْ، أَذْ ثنْ أَرّغْ أَذْ أَشْ وْضَانْ غَارْ إِضَارنْ نّشْ. نِيثْنِي أَذْ نعْمنْ بلِّي نشّْ سّْعِيزّغْ شكْ.
١٠ مِينْزِي أَقَا شكْ ثحْضِيذْ أَوَاڒْ إِنُو ن صّْبَارْ، أَذْ خَاكْ حْضِيغْ عَاوذْ زِي ثْسَاعّثْ ن ؤُجَارّبْ ثنِّي إِ ذ غَا يَاسنْ خْ ثمُّورْثْ مَارَّا إِ ؤُجَارّبْ ن يِينِّي إِزدّْغنْ خْ ثمُّورْثْ.
١١ نشّْ أَذْ د-أَسغْ ذغْيَا. طّفْ ذِي مِينْ غَاركْ، حِيمَا ؤُڒَا ذ إِجّْ وَارْ ذ أَشْ إِتّكّسْ شَا تَّاجْ نّشْ.
١٢ ونِّي إِ غَا إِغلّْبنْ أَذْ ث ڭّغْ ذ أَپِيلَارْ ذِي زَّاوشْثْ ثَامقّْرَانْثْ ن أَربِّي ؤُشَا وَارْ زَّايسْ إِتّْوَامّكْسِيعمَّارْصْ. نشّْ أَذْ خَاسْ أَرِيغْ إِسمْ ن أَربِّي إِنُو ذ يِيسمْ ن ثنْذِينْثْ ن جْذِيذْ، ؤُرْشَالِيمْ إِ د غَا إِهْوَانْ زڭْ ؤُجنَّا زِي أَربِّي إِنُو، ؤُڒَا ذ إِسمْ إِنُو ن جْذِيذْ.
١٣ ونِّي غَارْ دْجَانْ إِمزُّوغنْ، أجّْ إِ-ث أَذْ إِسڒْ مِينْ إِقَّارْ أَرُّوحْ إِ ثْمسْمُونِينْ.‘ “
١٤ أَرِي إِ لْمَالَاكْ ن ثْمسْمُونْثْ ن لَايُوذِيكِييَا
”أَمُّو إِ إِقَّارْ ونِّي ذ أَمِينْ، أَشهَّاذْ أَمْثِيقِّي ذ ثِيذتّْ، ونِّي ذ بدُّو ن مَارَّا مِينْ د-إِخْڒقْ أَربِّي:
١٥ ’نشّْ سّْنغْ ڒخْذَايمْ نّشْ، أَقَا شكْ وَارْ ثسْمِيضذْ وَارْ ثحْمِيذْ. معْلِيكْ بعْذَا ثْسمْضذْ نِيغْ ثحْمِيذْ!
١٦ س ؤُينِّي، ؤُمِي شكْ ثمْڒُوذذْ، وَارْ ثحْمِيذْ، وَارْ ثسْمِيضذْ، أَذْ شكْ عُوقّغْ زڭْ ؤُقمُّومْ إِنُو.
١٧ مِينْزِي شكْ ثقَّارذْ: نشّْ غَارِي أَڭْڒَا ؤُشَا إِمَّارْنِي-د غَارِي وَاڭْڒَا، وَارْ ذ أَيِي إِتّْخصِّي وَالُو، أَمْ وَارْ ثسِّينذْ شَا بلِّي أَقَا شكْ ثْحڒْشذْ ؤُ ذَايكْ ڒغْبنْ ذ زّڒْضْ ؤُ أَقَا شكْ ذ أَذَارْغَاڒْ ذ أَعَارْيَانْ،
١٨ أَذْ شكْ نصْحغْ مَاحنْذْ أَذْ خَافِي ثسْغذْ وُورغْ إِقُّورنْ، إِكِّينْ ثِيمسِّي، حِيمَا أَذْ ثْذوْڒذْ ذ بُو-وَاڭْڒَا، ؤُڒَا ذ أَرُّوضْ ذ أَشمْڒَاڒْ، حِيمَا أَذْ ث ثْيَارْضذْ ؤُ وَارْ ثقِّيمْ ثْضهَّارْ عَاذْ ڒفْضِيحثْ ن ثُوعَّارْينْثْ نّشْ. ؤُ ذْهنْ عَاوذْ دّْهنْ خْ ثِيطَّاوِينْ نّشْ مَاحنْذْ أَذْ ثَافْ ثتّْوَاڒِيذْ.
١٩ مَارَّا ونِّي سّْعِيزّغْ، تّْوبّْخغْ ث ؤُ أَربِّيغْ ث. خنِّي شْضَارْ، ثُوبْ!
٢٠ أَقَا ذَا، نشّْ بدّغْ غَارْ ثوَّارْثْ، سّْقَارْقُوبغْ-د. مَاڒَا إِسْڒَا حذْ إِ ثْمِيجَّا إِنُو، أَذْ يَارْزمْ ثَاوَّارْثْ، نشّْ أَذْ غَارسْ أَذْفغْ ؤُشَا أَذْ كِيسْ مُّونسْوغْ ذ نتَّا أَكِيذِي.
٢١ ونِّي إِ غَا إِغلّْبنْ أَذْ أَسْ وْشغْ، حِيمَا أَذْ إِقِّيمْ أَكِيذِي خْ ڒْْعَارْشْ إِنُو، أَمْ نشّْغلّْبغْ ؤُشَا قِّيمغْ أَكْ-ذ بَابَا خْ ڒْْعَارْشْ نّسْ.
٢٢ ونِّي غَارْ دْجَانْ إِمزُّوغنْ، أجّْ إِ-ث أَذْ إِسڒْ مِينْ إِقَّارْ أَرُّوحْ إِ ثْمسْمُونِينْ.‘ “ *