٧
أَعُودْجِي ن سِيذِي إِشُّورْ ثَادَّارْثْ
١ ؤُمِي إِكمّڒْ سُولِيمَانْ ثَاژَادْجِيثْ نّسْ، ثهْوَا-د ثْمسِّي زڭْ ؤُجنَّا ثشَّا ثَاغَارْصْثْ ن وشْمَاضْ ؤُڒَا ذ ثْغَارْصَا إِنّغْنِي، ؤُشَا إِشُّورْ ؤُعُودْجِي ن سِيذِي ثَادَّارْثْ.
٢ إِكهَّاننْ وَارْ زمَّارنْ أَذْ أَذْفنْ غَارْ ثَادَّارْثْ ن سِيذِي، مِينْزِي أَعُودْجِي ن سِيذِي ثُوغَا إِشُّورْ ثَادَّارْثْ ن سِيذِي.
٣ ؤُمِي ژْرِينْ مَارَّا أَيْثْ ن إِسْرَائِيل بلِّي ثهْوَا-د ثْمسِّي نِّي، ؤُڒَا ذ أَعُودْجِي ن سِيذِي إِبَانْ-د ثِيوَا ن ثَادَّارْثْ، ؤُضَارنْ نِيثْنِي س ؤُغمْبُوبْ نْسنْ غَارْ ثمُّورْثْ خْ ثِيسِي ن زّلِّيجْ، بنْذْقنْ، قَاذَانْ سِيذِي: ”مَاغَارْ نتَّا إِصْبحْ ؤُ ثَامخْسِيوْثْ نّسْ إِشوَّارنْ ثتّْغِيمَا إِ ڒبْذَا“.
٤ أَجدْجِيذْ، ؤُ مَارَّا إِسْرَائِيل أَكِيذسْ، وهّْبنْ ثِيغَارْصَا زَّاثْ إِ وُوذمْ ن سِيذِي.
٥ أَجدْجِيذْ سُولِيمَانْ إِوهّبْ ثْنَاينْ ؤُ-عِيشْرِينْ-أَڒفْ ن إِفُونَاسنْ ذ ثْفُونَاسِينْ ذ مْيَا ؤُ-عِيشْرِينْ أَڒفْ ن وُودْجِي ذ ثَاغَارْصْثْ ن ڒهْنَا. أَمُّو إِ إِذشّنْ ؤُجدْجِيذْ ذ مَارَّا أَيْثْ ن إِسْرَائِيل ثَادَّارْثْ ن أَربِّي.
٦ إِكهَّاننْ ثُوغَا بدّنْ غَارْ ثْسخَّارْثْ نْسنْ ؤُشَا إِلَاوِييّنْ بدّنْ أَكْ-ذ دُّوزَانْ ن دْجْغَا ن سِيذِي، إِنِّي إِڭَّا ؤُجدْجِيذْ ذَاوُوذْ حِيمَا أَذْ قَاذَانْ سِيذِي - ’مَاغَارْ ثَامخْسِيوْثْ نّسْ إِشوَّارنْ ثتّْغِيمَا إِ ڒبْذَا!‘ - س إِزْڒَانْ ن ؤُصبّحْ ن ذَاوُوذْ ذڭْ ؤُفُوسْ نْسنْ، ؤُ أَرنْذَاذْ نْسنْ سُوضنْ إِكهَّاننْ ذِي ڒبْوَاقْ، أَمْ ثُوغَا إِبدّْ مَارَّا إِسْرَائِيل.
٧ سُولِيمَانْ إِسّْقدّسْ ڒْْوسْطْ ن ڒمْرَاحْ ن زَّاثْ، ونِّي إِدْجَانْ زَّاثْ إِ ثَادَّارْثْ ن سِيذِي، مِينْزِي يِيوِي ذِينْ ثِيغَارْصَا ن وشْمَاضْ ذ ثَاذُونْثْ ن ثوْهِيبِينْ ن ڒْْغِيدْجثْ، مَاغَارْ أَعَالْطَارْ ن نّْحَاسْ نِّي إِڭَّا سُولِيمَانْ ثُوغَا وَارْ إِزمَّارْ أَذْ إِكْسِي ثَاغَارْصْثْ ن وشْمَاضْ ذ ثوْهِيبْثْ ن ڒْْغِيدْجثْ ذ ثَاذُونْثْ.
٨ ذِي ڒْْوقْثْ نِّي إِعيّذْ سُولِيمَانْ ڒْْعِيذْ إِ يِيجّْ ن ڒْْمِيجَارْ ن سبْعَا ن وُوسَّانْ ذ مَارَّا إِسْرَائِيل أَكِيذسْ، إِجّْ ن وڭْرَاوْ ن ڒْْڭنْسْ ذ أَمقّْرَانْ، زِي مَانِي غَا ثِيوْضذْ غَارْ حَامَاثْ أَڒْ ثَاغْزَارْثْ ن مِيصْرَا.
٩ ذڭْ وَاسّْ وِيسّْ ثْمنْيَا ڭِّينْ إِجّْ ن ؤُمُونِي إِفَارْزنْ، مِينْزِي ذِي سبْعَا ن وُوسَّانْ ڭِّينْ نِيثْنِي أَذشّنْ ن ؤُعَالْطَارْ ؤُشَا ؤُڒَا ذ ڒْْعِيذْ أَوَارْنِي مَانْ أَيَا غَارسْ عَاوذْ إِجّْ ن ڒْْمِيجَارْ ن سبْعَا ن وُوسَّانْ.
١٠ ذڭْ وَاسّْ وِيسّْ ثْڒَاثَا ؤُ-عِيشْرِينْ ن ؤُيُورْ وِيسّْ سبْعَا يَارْخُو نتَّا إِ ڒْْڭنْسْ أَذْ رَاحنْ غَارْ إِقِيضَانْ نْسنْ س وُوڒْ إِفَارْحنْ ؤُ س ڒْْخَاضَارْ س مَارَّا ڒْْخَارْ إِ إِڭَّا سِيذِي إِ ؤُمْسخَّارْ نّسْ ذَاوُوذْ ذ سُولِيمَانْ ؤُ إِ ڒْْڭنْسْ نّسْ إِسْرَائِيل.
أَضْهَارْ وِيسّْ ثْنَاينْ ن سِيذِي إِ سُولِيمَانْ
١١ أَمُّو إِ إِكمّڒْ سُولِيمَانْ ڒبْنِي ن ثَادَّارْثْ ن سِيذِي ذ ثَادَّارْثْ ن ؤُجدْجِيذْ. مَارَّا مِينْ ثُوغَا ذڭْ وُوڒْ ن سُولِيمَانْ حِيمَا أَذْ ث إِڭّْ ذِي ثَادَّارْثْ ن سِيذِي ؤُ ذِي ثَادَّارْثْ نّسْ، أَقَا إِفْڒحْ أَذْ إِڭّْ أَيَا.
١٢ سِيذِي إِبَانْ-د إِ سُولِيمَانْ ذِي دْجِيڒثْ، إِنَّا أَسْ:
”نشّْ سْڒِيغْ إِ ثْژَادْجِيثْ نّشْ ؤُ فَارْزغْ أَمْشَانْ-أَ إِ يِيخفْ إِنُو حِيمَا أَذْ يِيڒِي ذ ثَادَّارْثْ إِ ثوْهِيبْثْ ن ثْغَارْصْثْ.
١٣ خْمِي غَا بلّْعغْ أَجنَّا مَاحنْذْ وَارْ إِشِّيثْ ونْژَارْ عَاذْ، نِيغْ مَاڒَا ؤُمُورغْ ثَامُوغْرِي إِڒحّْفنْ مَاحنْذْ أَذْ ثشّْ ثمُّورْثْ نِيغْ خْمِي د-سّكّغْ طَّاعُونْ جَارْ ڒْْڭنْسْ إِنُو،
١٤ ؤُشَا ڒْْڭنْسْ إِنُو خْ مِينْ خفْ إِتّْوَاڒَاغَا إِسمْ إِنُو أَذْ إِسّهْوَا إِخفْ نّسْ، أَذْ إِژَّادْجْ، ؤُ نِيثْنِي أَذْ أَرْزُونْ ؤُذمْ إِنُو ؤُ أَذْ ثُوبنْ زِي ثبْرِيذِينْ نْسنْ ثِيعفَّانِينْ، خنِّي نشّْ أَذْ غَارْسنْ سْڒغْ زڭْ ؤُجنَّا، أَذْ أَسنْ غْفَارغْ ؤُ أَذْ سّْڭنْفِيغْ ثَامُّورْثْ نْسنْ.
١٥ خنِّي ڒخُّو، ثِيطَّاوِينْ إِنُو أَذْ إِڒِينْثْ أَرْزْمنْثْ ذ إِمزُّوغنْ إِنُو أَذْ حْضَانْ خْ ثْژَادْجِيثْ زڭْ ومْشَانْ-أَ،
١٦ مَاغَارْ ڒخُّو إِخْضَارغْ ثَادَّارْثْ-أَ ؤُ سّْقدّْسغْ ت حِيمَا أَذْ سّْمثْنغْ ذِينْ إِسمْ إِنُو إِ ڒبْذَا ؤُ ثِيطَّاوِينْ إِنُو ذ وُوڒْ إِنُو أَذْ ذِينْ إِڒِينْ مَارَّا ؤُسَّانْ.
١٧ مَاڒَا شكْ ثُويُورذْ زَّاثْ إِ وُوذمْ إِنُو أَمْ مَامّشْ ثُوغَا إِڭُّورْ بَابَاشْ ذَاوُوذْ، ؤُ أَذْ ثڭّذْ أَمْ مَامّشْ مَارَّا إِ ذ أَشْ ؤُمُورغْ ؤُشَا أَذْ ثحْضِيذْ ثِيوصَّا إِنُو ذ لْفَارَايِيضْ إِنُو،
١٨ خنِّي أَذْ سّْمثْنغْ ڒْْعَارْشْ ن ثْڭلْذِيثْ نّشْ أَمْ مَامّشْ ڒْْعَاهْذْ إِ ڭِّيغْ أَكْ-ذ بَابَاشْ ذَاوُوذْ، نِّيغْ: ’وَارْ ذ أَشْ إِتّْخصَّا ؤُڒَا ذ إِجّْ ن ورْيَازْ نِّي إِحكّْمنْ ذِي إِسْرَائِيل!‘
١٩ مَاشَا مَاڒَا كنِّيوْ ثْحيّْذمْ زِي ثْوصَّا إِنُو ذ ڒُْومُورَاثْ إِنُو نِّي وْشِيغْ زَّاثْ إِ وُوذمْ نْومْ، ؤُشَا أَذْ ثُويُورمْ أَذْ ثْعبْذمْ إِ إِربِّيثنْ نّغْنِي، أَذْ أَسنْ ثْبنْذْقمْ،
٢٠ خنِّي أَذْ قْضِيغْ خْ إِسْرَائِيل زِي ثمُّورْثْ نِّي ذ أَسنْ وْشِيغْ، ؤُشَا ثَادَّارْثْ-أَ، إِ سّْقدّْسغْ إِ يِيسمْ إِنُو، أَذْ ت نْضَارغْ زڭْ وُوذمْ إِنُو ؤُ إِسْرَائِيل أَذْ إِذْوڒْ ذ ؤُمذْيَا ؤُڒَا ذ ڒْْقشْعثْ ن ؤُبهْذڒْ إِتّقّْسنْ جَارْ مَارَّا ڒڭْنُوسْ.
٢١ ؤُ خْ ثَادَّارْثْ-أَ ثنِّي يُوعْڒَانْ قَاعْ، مَارَّا وِي خَاسْ إِ غَا إِكّنْ، أَذْ إِثبْهثْ، أَذْ يِينِي: ’مَايمِّي إِڭَّا سِيذِي أَمُّو ذِي ثمُّورْثْ-أَ ؤُ ذِي ثَادَّارْثْ-أَ؟‘
٢٢ أَذْ إِنِينْ: ’مِينْزِي نِيثْنِي سمْحنْ ذِي سِيذِي، أَربِّي ن ڒجْذُوذْ نْسنْ، ونِّي ثنْ د-إِسُّوفّْغنْ زِي ثمُّورْثْ ن مِيصْرَا، ؤُ مِينْزِي نِيثْنِي شبَّارنْ ذِي إِربِّيثنْ نّغْنِي ؤُ إِسْرَائِيل يُويُورْ أَذْ أَسنْ إِسْجذْ ؤُ أَذْ ثنْ إِعْبذْ، خْ ؤُيَا إِسّغْضڒْ نتَّا مَارَّا ڒْْغَارْ-أَ خَاسنْ.‘ “