٦
ثَاژَادْجِيثْ ن سُولِيمَانْ غَارْ ؤُذشّنْ ن زَّاوشْثْ ثَامقّْرَانْثْ
١ خنِّي إِنَّا سُولِيمَانْ:
”سِيذِي إِنَّا أَقَا نتَّا أَذْ إِزْذغْ ذڭْ يِيجّْ ن ؤُسيْنُو إِبُّومْبسْ.
٢ س ثِيذتّْ نشّْ بْنِيغْ إِشْثْ ن ثَادَّارْثْ، إِشْثْ ن ثْزذِّيغْثْ إِ شكْ، إِجّْ ن ومْشَانْ إِمْثنْ حِيمَا أَذْ ذِينْ ثْزذْغذْ إِ ڒبْذَا.“
٣ إِسّْنقْڒبْ ؤُجدْجِيذْ أَغمْبُوبْ نّسْ ؤُشَا إِبَاركْ مَارَّا أَڭْرَاوْ ن ڒْْڭنْسْ ن إِسْرَائِيل ؤُمِي مَارَّا أَڭْرَاوْ ن ڒْْڭنْسْ ن إِسْرَائِيل ثُوغَا إِبدّْ.
٤ نتَّا إِنَّا: ”أَذْ إِتّْوَابَاركْ سِيذِي، أَربِّي ن إِسْرَائِيل، ونِّي إِسِّيوْڒنْ س ؤُقمُّومْ نّسْ غَارْ بَابَا ذَاوُوذْ ذ ونِّي ث إِكمّْڒنْ س ؤُفُوسْ نّسْ ؤُمِي إِنَّا:
٥ ’زڭْ وَاسّْ إِ ذِي نذْهغْ ڒْْڭنْسْ إِنُو إِسْرَائِيل زِي مِيصْرَا، وَارْ إِخْضَارغْ ؤُڒَا ذ إِشْثْ ن ثنْذِينْثْ زِي مَارَّا ثِيقبَّاڒْ ن إِسْرَائِيل حِيمَا أَذْ ذِينِّي بْنِيغْ ثَادَّارْثْ حِيمَا أَذْ ذِينْ يِيڒِي إِسمْ إِنُو، ؤُ وَارْ إِخْضَارغْ أَرْيَازْ حِيمَا أَذْ يِيڒِي ذ ڒْْحَاكمْ خْ ڒْْڭنْسْ إِنُو إِسْرَائِيل،
٦ مَاشَا ڒخُّو إِخْذَارغْ ؤُرْشَالِيمْ، حِيمَا أَذْ ذِينْ يِيڒِي إِسمْ إِنُو، ؤُ نشّْ إِخْضَارغْ ذَاوُوذْ، حِيمَا أَذْ يِيڒِي ذ ڒْْحَاكمْ خْ ڒْْڭنْسْ إِنُو إِسْرَائِيل.‘
٧ ثُوغَا ذڭْ وُوڒْ ن بَابَا ذَاوُوذْ مَاحنْذْ أَذْ إِبْنَا ثَادَّارْثْ إِ يِيسمْ ن سِيذِي، أَربِّي ن إِسْرَائِيل.
٨ مَاشَا سِيذِي إِنَّا إِ بَابَا ذَاوُوذْ: ’ؤُمِي ثڭِّيذْ ذڭْ وُوڒْ نّشْ حِيمَا أَذْ ثبْنِيذْ ثَادَّارْثْ إِ يِيسمْ إِنُو، أَقَا مْلِيحْ ؤُمِي ثڭِّيذْ مَانْ أَيَا ذڭْ وُوڒْ نّشْ.
٩ مَاشَا وَارْ إِدْجِي ذ شكْ إِ غَا إِبْنَانْ ثَادَّارْثْ نِّي، مَاشَا مِّيشْ إِ د-إِفّْغنْ زِي ثجْعِينَّا نّشْ ذ نتَّا إِ غَا إِبْنَانْ ثَادَّارْثْ إِ يِيسمْ إِنُو.‘
١٠ سِيذِي إِسّمْثنْ أَوَاڒْ نّسْ نِّي إِسِّيوڒْ، مَاغَارْ نشّْ ذوْڒغْ بدّغْ ذڭْ ومْشَانْ ن بَابَا ذَاوُوذْ ؤُ قِّيمغْ خْ ڒْْعَارْشْ ن إِسْرَائِيل، أَمْ مَامّشْ ثُوغَا إِسِّيوڒْ سِيذِي، ؤُ نشّْ بْنِيغْ ثَادَّارْثْ إِ يِيسمْ ن سِيذِي، أَربِّي ن إِسْرَائِيل.
١١ نشّْ سَّارْسغْ ذِينِّي تَّابُوثْ ونِّي ذِي إِدْجَا ڒْْعَاهْذْ ن سِيذِي إِ إِڭَّا نتَّا أَكْ-ذ أَيْثْ ن إِسْرَائِيل.“
١٢ نتَّا إِبدّْ زَّاثْ إِ ؤُعَالْطَارْ ن سِيذِي، أَرنْذَاذْ ن مَارَّا أَڭْرَاوْ ن ڒْْڭنْسْ ن إِسْرَائِيل، ؤُشَا نتَّا إِكْسِي إِفَاسّنْ نّسْ غَارْ ؤُجنَّا.
١٣ مِينْزِي سُولِيمَانْ ثُوغَا إِڭَّا إِشْثْ ن ثنْهِيرْثْ ن نّْحَاسْ ؤُ إِڭَّا إِ-ت ذِي ڒْْوسْطْ ن ڒمْرَاحْ. ثُوغَا ذَايسْ خمْسَا ن إِغَادْجنْ ن ثُوزّڭَّارْثْ، خمْسَا ن إِغَادْجنْ ن ثِيرُو ذ ثْڒَاثَا ن إِغَادْجنْ ن ثِيذِّي. نتَّا إِبدّْ خَاسْ، إِبنْذقْ خْ إِفَادّنْ نّسْ قِيبَاتْشْ إِ ثِيطَّاوِينْ ن مَارَّا أَڭْرَاوْ ن ڒْْڭنْسْ ن إِسْرَائِيل ؤُشَا إِكْسِي إِفَاسّنْ نّسْ غَارْ ؤُجنَّا، إِنَّا:
١٤ ”أَ سِيذِي، أَربِّي ن إِسْرَائِيل، ذڭْ ؤُجنَّا سنّجْ ؤُ خْ ثمُّورْثْ سْوَادَّايْ وَارْ إِدْجِي ؤُڒَا ذ إِجّْ ن أَربِّي أَمْ شكْ، ونِّي إِحْضَانْ ڒْْعَاهْذْ ذ ثْمخْسِيوْثْ إِشوَّارنْ إِ إِمْسخَّارنْ نّشْ نِّي إِڭُّورنْ زَّاثْ إِ وُوذمْ نّشْ س مَارَّا ؤُڒْ نْسنْ،
١٥ ونِّي إِحْضَانْ إِ ؤُمْسخَّارْ نّشْ، بَابَا ذَاوُوذْ، خْ مِينْ خفْ أَكِيذسْ ثسِّيوْڒذْ، مِينْزِي س ؤُقمُّومْ نّشْ إِ ثسِّيوْڒذْ ؤُ س ؤُفُوسْ نّشْ إِ ث ثْكمّْڒذْ، أَمْ ثدْجَا أَسّْ-أَ.
١٦ خنِّي ڒخُّو، سِيذِي، أَربِّي ن إِسْرَائِيل، حْضَا ذِي طّْوعْ ن ؤُمْسخَّارْ نّشْ، بَابَا ذَاوُوذْ، خْ مِينْ خفْ كِيذسْ ثسِّيوْڒذْ ؤُمِي ثنِّيذْ: ’وَارْ إِتّْوَاقسّْ زَّايكْ ؤُڒَا ذ إِجّْ ن ورْيَازْ زِي زَّاثْ إِ وُوذمْ إِنُو ونِّي إِقِّيمنْ خْ ڒْْعَارْشْ ن إِسْرَائِيل، مِينْ غَا كّنْ أَرَّاونْ نّشْ حطَّانْ أَذْ ؤُيُورنْ أَبْرِيذْ نْسنْ عْلَاحْسَابْ شَّارِيعَا أَمْ مَامّشْ ثُويُورذْ شكْ زَّاثْ إِ وُوذمْ إِنُو.‘
١٧ خنِّي ڒخُّو، أَ أَربِّي ن إِسْرَائِيل، أڭّْ أَذْ ذوْڒنْ ذ ثِيذتّْ أَوَاڒنْ نِّي ثسِّيوْڒذْ أَكْ-ذ ؤُمْسخَّارْ نّشْ، أَكْ-ذ ذَاوُوذْ.“
١٨ ”مَاغَارْ مَا س ثِيذتّْ أَذْ إِزْذغْ أَربِّي خْ ثمُّورْثْ؟ خْزَارْ أَجنَّا، وَاهْ، أَجنَّا ن إِجنْوَانْ وَارْ إِزمَّارْ أَذْ شكْ إِكْسِي، مشْحَاڒْ س ذْرُوسْ خنِّي ثَادَّارْثْ-أَ إِ سّْبدّغْ نشّْ!
١٩ ميّڒْ غَارْ ثْژَادْجِيثْ ن ؤُمْسخَّارْ نّشْ ؤُ غَارْ ؤُحشّمْ نّسْ، أَ سِيذِي، أَربِّي إِنُو، حِيمَا أَذْ ثسْڒذْ غَارْ ؤُڒَاغِي ؤُ غَارْ ثْژَادْجِيثْ نِّي إِژُّودْجْ ؤُمْسخَّارْ نّشْ زَّاثْ إِ وُوذمْ نّشْ.
٢٠ أجّْ ثِيطَّاوِينْ نّشْ أَذْ تّْوَارْزْمنْثْ أَسّْ ذ دْجِيڒثْ ثِيوَا إِ ثَادَّارْثْ-أَ، ثِيوَا إِ ومْشَانْ-أَ مِينْ خفْ ثسِّيوْڒذْ أَقَا إِسمْ نّشْ أَذْ إِتّْوَاسّمْثنْ ذِينْ، حِيمَا أَذْ ثسْڒذْ غَارْ ثْژَادْجِيثْ إِ إِژُّودْجْ ؤُمْسخَّارْ نّشْ ذڭْ ومْشَانْ-أَ.
٢١ سڒْ إِ ؤُحشّمْ ن ؤُمْسخَّارْ نّشْ ؤُ ن ڒْْڭنْسْ نّشْ إِسْرَائِيل، إِ ثُوثْرَا إِ تّْژَادْجَانْ نِيثْنِي ذڭْ ومْشَانْ-أَ ؤُ سڒْ شكْ خنِّي زِي ثْزذِّيغْثْ نّشْ، زڭْ ؤُجنَّا، وَاهْ، سڒْ ؤُ غْفَارْ.“
٢٢ ”مَاڒَا إِخْضَا إِجّْ أَكْ-ذ جَّارْ نّسْ ؤُ ثتّْوَاڭّْ خَاسْ إِشْثْ ن ثْجَادْجِيثْ، حِيمَا أَذْ ت إِجِّيدْجْ ؤُ وَانِيثَا يُوسَا-د ؤُشَا إِجِّيدْجْ زَّاثْ إِ ؤُعَالْطَارْ نّشْ ذِي ثَادَّارْثْ-أَ،
٢٣ سڒْ شكْ خنِّي ذڭْ ؤُجنَّا ؤُ كَّارْ ؤُ حْكمْ خْ إِمْسخَّارنْ نّشْ، حِيمَا أَذْ إِتّْوَاعَاقبْ ؤُعفَّانْ، أجّْ أَبْرِيذْ نّسْ أَذْ إِهْوَا خْ ؤُزدْجِيفْ نّسْ ؤُ أڭّْ س ثْسڭْذَا إِ ؤُمْسڭّذْ ؤُ أوْشْ إِ-ث عْلَاحْسَابْ ثَاسڭْذَا نّسْ.“
٢٤ ”مَاڒَا ڒْْڭنْسْ نّشْ إِسْرَائِيل إِتّْوَاغْڒبْ زَّاثْ إِ وُوذمْ ن ڒعْذُو، مِينْزِي نِيثْنِي خْضَانْ أَكِيذكْ ؤُ نِيثْنِي أَذْ غَاركْ د-ذوْڒنْ ؤُشَا أَذْ نعْمنْ س يِيسمْ نّشْ ؤُ أَذْ ژَّادْجنْ أَذْ حشّْمنْ زَّاثْ إِ وُوذمْ نّشْ ذِي ثَادَّارْثْ-أَ،
٢٥ سڒْ شكْ خنِّي زڭْ ؤُجنَّا ؤُ غْفَارْ دّنْبْ ن ڒْْڭنْسْ نّشْ إِسْرَائِيل ؤُشَا نْذهْ إِ-ثنْ أَذْ د-ذوْڒنْ غَارْ ثمُّورْثْ نِّي إِ ذ أَسنْ ثوْشِيذْ ؤُ إِ ڒجْذُوذْ نْسنْ.“
٢٦ ”مَاڒَا أَجنَّا إِتّْوَابلّعْ أَڒَامِي وَارْ ذِينْ إِتِّيڒِي ونْژَارْ، مِينْزِي نِيثْنِي خْضَانْ أَكِيذكْ، ؤُ نِيثْنِي أَذْ ژَّادْجنْ أَمْ أَرِّينْ أَزدْجِيفْ غَارْ ومْشَانْ-أَ، أَذْ نعْمنْ س يِيسمْ نّشْ ؤُ أَذْ د-ذوْڒنْ زِي دّْنُوبْ نْسنْ ؤُمِي ثنْ ثحْصَارذْ شكْ،
٢٧ سڒْ-د شكْ خنِّي ذڭْ ؤُجنَّا ؤُ غْفَارْ أَسنْ دّنْبْ ن إِمْسخَّارنْ نّشْ ؤُ ن ڒْْڭنْسْ نّشْ إِسْرَائِيل، مِينْزِي شكْ ثسّْڒمْذذْ أَسنْ أَبْرِيذْ أَصبْحَانْ نِّي إِتّْخصَّا أَذْ كّنْ، ؤُ أوْشْ شكْ خنِّي أَنْژَارْ إِ ثمُّورْثْ نِّي ثوْشِيذْ ذ ڒْْوَارْثْ إِ ڒْْڭنْسْ نّشْ.“
٢٨ ”مَاڒَا ذِينْ ڒَْاژْ ذِي ثمُّورْثْ، نِيغْ طَّاعُونْ، نِيغْ إِتّْوَاسّشْمضْ إِمنْذِي زڭْ ؤُسمِّيضْ، نِيغْ مَاڒَا ذِينْ جّْرِيحشْثْ ن وفْسُو نِيغْ ثَامُوغْرِي ثنِّي إِصَارّْضنْ، نِيغْ مَاڒَا إِحْصَارْ إِ-ث ڒعْذُو غَارْ ثوُّورَا نّسْ، نِيغْ ثڒْقفْ إِ-ث مَامّشْ مَا ثڭَّا شَا ن جّْرِيحشْثْ نِيغْ شَا ن ڒحْڒَاشْ،
٢٩ سڒْ شكْ خنِّي مِينْ مَا إِ غَا إِژُّودْجْ إِجّْ ن بْنَاذمْ زِي مَارَّا ڒْْڭنْسْ نّشْ إِسْرَائِيل ؤُ مِينْ مَا إِ غَا إِتَّارْ، أَمْ سّْننْ نِيثْنِي كُوڒْ إِجّْ جّْرِيحشْثْ نْسنْ ذ ڒحْرِيقْ نْسنْ، ؤُ نتَّا إِكْسِي خنِّي إِفَاسّنْ نّسْ غَارْ ثَادَّارْثْ-أَ.
٣٠ وَاهْ سڒْ شكْ خنِّي زڭْ ؤُجنَّا، زڭْ ومْشَانْ إِمْثنْ مَانِي ثْزدّْغذْ، ؤُ غْفَارْ ؤُ أوْشْ كُوڒْ إِجّْ عْلَاحْسَابْ ثِيبْرِيذِينْ نّسْ، أَمْ مَامّشْ شكْ ثسّْنذْ ؤُڒْ نّسْ، مَاغَارْ شكْ وَاهَا إِ إِسّْننْ ؤُڒْ ن بْنَاذمْ،
٣١ حِيمَا أَذْ شكْ ڭّْوذنْ ؤُ أَذْ ؤُيُورنْ ذِي ثبْرِيذِينْ نّشْ مَارَّا ؤُسَّانْ إِ غَا كّنْ دَّارنْ خْ وُوذمْ ن ثمُّورْثْ نِّي ثوْشِيذْ إِ ڒجْذُوذْ نّغْ.“
٣٢ ”ؤُڒَا مَاڒَا نتَّا ذ أَبَارَّانِي، ونِّي وَارْ إِدْجِينْ زِي ڒْْڭنْسْ نّشْ، مَاشَا أَذْ د-يَاسْ ذِي طّْوعْ ن يِيسمْ نّشْ زڭْ إِشْثْ ن ثمُّورْثْ ثِيڭّْوجْ ذِي طّْوعْ ن يِيسمْ نّشْ أَمقّْرَانْ ذ ؤُفُوسْ نّشْ إِجهْذنْ ذ ؤُغِيڒْ نّشْ إِسّْوِيژّْضنْ، خنِّي مَاڒَا د-يُوسِينْ نِيثْنِي، ؤُشَا أَذْ ژَّادْجنْ أَمْ أَرِّينْ أَزدْجِيفْ غَارْ ثَادَّارْثْ-أَ،
٣٣ سڒْ شكْ خنِّي زڭْ ؤُجنَّا، زڭْ ومْشَانْ إِمْثنْ مَانِي ثْزدّْغذْ، ؤُ أڭّْ عْلَاحْسَابْ مَارَّا مِينْ خفْ غَاركْ إِ غَا إِڒَاغَا ؤُبَارَّانِي، حِيمَا مَارَّا ڒڭْنُوسْ ن دُّونشْثْ أَذْ سّْننْ إِسمْ نّشْ، حِيمَا نِيثْنِي أَذْ شكْ ڭّْوذنْ، أَمْ ڒْْڭنْسْ نّشْ إِسْرَائِيل، ؤُ أَذْ سّْننْ أَقَا إِسمْ نّشْ إِتّْوَابَارّحْ ثِيوَا إِ ثَادَّارْثْ-أَ إِ بْنِيغْ.“
٣٤ ”مَاڒَا ڒْْڭنْسْ إِفّغْ غَارْ ؤُمنْغِي أَكْ-ذ ڒْْعذْيَانْ نّسْ ذڭْ وبْرِيذْ إِ خْ إِ ثنْ ثسّكّذْ، ؤُ نِيثْنِي أَذْ ژَّادْجنْ إِ شكْ أَمْ أَرِّينْ أَزدْجِيفْ غَارْ ثنْذِينْثْ-أَ إِ ثِيخْضَارذْ شكْ، ؤُ غَارْ ثَادَّارْثْ إِ بْنِيغْ إِ يِيسمْ نّشْ،
٣٥ سڒْ شكْ خنِّي زڭْ ؤُجنَّا إِ ثْژَادْجِيثْ نْسنْ ؤُ إِ ؤُحشّمْ نْسنْ ؤُشَا أَغْ أَسنْ ثَاسْغَارْثْ.“
٣٦ ”مَاڒَا نِيثْنِي خْضَانْ أَكِيذكْ - مَاغَارْ وَارْ إِدْجِي ؤُڒَا ذ إِجّْ ن بْنَاذمْ إِ وَارْ إِخطِّينْ - ؤُ شكْ ثسْعَارذْ خَاسنْ، أَذْ ثنْ ثْسلّْمذْ زَّاثْ إِ وُوذمْ ن ڒعْذُو ؤُشَا نِيثْنِي أَذْ ثنْ نذْهنْ ذ إِمحْبَاسْ غَارْ ثمُّورْثْ ن ڒعْذُو، ثِيڭّْوجْ نِيغْ ثُوذسْ إِ ثدْجَا،
٣٧ ؤُ مَاڒَا خنِّي أَذْ ثُوبنْ ذڭْ وُوڒْ نْسنْ ذِي ثمُّورْثْ مَانِي تّْوَاحبّْسنْ، وَاهْ، أَذْ ثُوبنْ ؤُ أَذْ خَاكْ د-ڒَْاغَانْ ذِي ثمُّورْثْ ن ثْحبَّاسْثْ نْسنْ، أَذْ إِنِينْ: نشِّينْ نخْضَا ؤُ نڭَّا مِينْ وَارْ إِسڭّْذنْ، أَقَا نڭَّا ثُوعفّْنَا!،
٣٨ وَاهْ، أَذْ غَاركْ د-ذوْڒنْ س مَارَّا ؤُڒْ نْسنْ ؤُ س مَارَّا ڒعْمَارْ نْسنْ ذِي ثمُّورْثْ ن ڒْْعذْيَانْ نْسنْ مَانِي تّْوَاحبّْسنْ ؤُشَا أَذْ غَاركْ ژَّادْجنْ أَمْ أَرِّينْ أَزدْجِيفْ غَارْ ثمُّورْثْ نِّي ثوْشِيذْ إِ ڒجْذُوذْ نْسنْ، غَارْ ثنْذِينْثْ-أَ إِ ثِيخْضَارذْ شكْ ؤُ غَارْ ثَادَّارْثْ-أَ إِ بْنِيغْ إِ يِيسمْ نّشْ،
٣٩ سڒْ شكْ خنِّي زڭْ ؤُجنَّا، أَمْشَانْ إِمْثنْ مَانِي ثْزدّْغذْ، إِ ثْژَادْجِيثْ نْسنْ ؤُ إِ ؤُحشّمْ نْسنْ ؤُشَا أَغْ أَسنْ ثَاسْغَارْثْ. غْفَارْ خنِّي ڒْْڭنْسْ نّشْ مِينْ زِي خَاكْ خْضَانْ.“
٤٠ ”خنِّي ڒخُّو، أَربِّي إِنُو، أجّْ ثِيطَّاوِينْ نّشْ أَذْ إِڒِينْثْ أَرْزْمنْثْ ذ إِمزُّوغنْ نّشْ أَذْ إِڒِينْ حْضَانْ إِ ثْژَادْجِيثْ ذڭْ ومْشَانْ-أَ.
٤١ خنِّي ڒخُّو، أَ سِيذِي أَربِّي، أَذفْ غَارْ أَرَّاحثْ نّشْ، شكْ ذ تَّابُوثْ ن جّهْذْ نّشْ. أجّْ أَذْ إِڒِينْ إِكهَّاننْ نّشْ، أَ سِيذِي أَربِّي، أَرْضنْ س ؤُسنْجمْ، ؤُشَا إِڒِي أَذْ فَارْحنْ إِمْثِيقَّانْ نّشْ س ڒْْخَارْ.
٤٢ أَ سِيذِي أَربِّي، وَارْ ثَارِّي أَغمْبُوبْ ن ؤُمذْهُونْ نّشْ، إِذَارْ ذِي ثْمڭَّا ن ثْمخْسِيوْثْ إِشوَّارنْ ن ؤُمْسخَّارْ نّشْ ذَاوُوذْ.“