86
1 ثَاژَادْجِيثْ ن ذَاوُوذْ.
أَ سِيذِي، أَرّْ أَمزُّوغْ نّشْ غَارِي،
سڒْ أَيِي،
مَاغَارْ نشّْ ذِي ڒغْبنْ ؤُ زڒْضغْ.
2 حْضَا خْ ڒعْمَارْ إِنُو،
مَاغَارْ نشّْ ذ أَمْثِيقِّي،
أَ أَربِّي إِنُو،
سنْجمْ أَمْسخَّارْ نّشْ،
ونِّي خَاكْ إِتّْشَاڒَانْ.
3 حِينّْ خَافِي، أَ سِيذِي إِنُو،
مَاغَارْ تّْڒَاغِيغْ خَاكْ أَسّْ أَمْ إِمُونْ.
4 سْفَارْحْ ڒعْمَارْ ن ؤُمْسخَّارْ نّشْ،
مَاغَارْ إِ شكْ، أَ سِيذِي إِنُو،
سّْڭعَّاذغْ ڒعْمَارْ إِنُو.
5 مَاغَارْ شكْ، أَ سِيذِي إِنُو،
ذ أَصبْحَانْ ؤُ ذ أَمْسَامحْ،
غَاركْ ثَامخْسِيوْثْ إِشوَّارنْ
إِ مَارَّا إِنِّي غَاركْ إِتّْڒَاغَانْ.
6 أَ سِيذِي، سڒْ إِ ثْژَادْجِيثْ إِنُو،
حكَّارْ إِ ثْمِيجَّا ن ثُوثْرَا إِنُو.
7 ذڭْ وَاسّْ ن ڒحْصَارثْ إِنُو
تّْڒَاغِيغْ-د غَاركْ،
مَاغَارْ شكْ أَذْ خَافِي د-ثَارّذْ.
8 جَارْ إِربِّيثنْ وَارْ إِدْجِي ؤُڒَا ذ إِجّنْ
أَمْ شكْ، أَ سِيذِي إِنُو،
وَارْ ذِينْ مِينْ يَارْوسنْ
ذِي ثْمڭَّا نِّي ثڭِّيذْ.
9 مَارَّا ڒڭْنُوسْ إِ ثڭِّيذْ، أَذْ د-أَسنْ،
أَذْ سجْذنْ زَّاثْ إِ وُوذمْ نّشْ،
أَ سِيذِي إِنُو،
أَذْ سّْعُودْجنْ إِسمْ نّشْ.
10 مَاغَارْ شكْ ذ أَمقّْرَانْ
ؤُ شكْ ذ ونِّي إِتّڭّنْ لْمُوعْجِيزَاثْ،
شكْ وحّْذكْ ذ أَربِّي إِ ثدْجِيذْ.
11 سْشنْ أَيِي أَبْرِيذْ نّشْ، أَ سِيذِي،
حِيمَا أَذْ ؤُيُورغْ ذِي ثِيذتّْ نّشْ،
سْمُونْ ؤُڒْ إِنُو
مَاحنْذْ أَذْ ڭّْوذغْ إِسمْ نّشْ.
12 أَ سِيذِي إِنُو، أَربِّي إِنُو،
خْسغْ أَذْ شكْ قَاذِيغْ س مَارَّا وُوڒْ إِنُو،
أَذْ شنّْعغْ إِسمْ نّشْ إِ ڒبْذَا قَاعْ.
13 مَاغَارْ ثَامخْسِيوْثْ نّشْ إِشوَّارنْ
ثمْغَارْ خَافِي،
شكْ ثْفكّذْ ڒعْمَارْ إِنُو
زِي ڒَادْجَاغْ ن ڒَاخَارْثْ.
14 أَ أَربِّي،
إِمْعفَّارنْ كَّارنْ-د أَكِيذِي،
إِشْثْ ن بَانْذِييَّا ن أَيْثْ ن بُو-ڒخْشُونثْ
أَرزُّونْ أَذْ نْغنْ ڒعْمَارْ إِنُو.
شكْ وَارْ غَارْسنْ ثدْجِيذْ
قِيبَاتْشْ إِ ثِيطَّاوِينْ نْسنْ.
15 مَاشَا شكْ، أَ سِيذِي إِنُو،
ذ أَربِّي ذ أَرْحِيمْ ذ ؤُحْنِينْ،
غَاركْ تَّاسِيعْ ن ڒْخَاضَارْ
ؤُڒَا ذ ثَامخْسِيوْثْ إِشوَّارنْ
ذ ڒَامَانْ مْغَارنْ.
16 خْزَارْ-د غَارِي ؤُ حِينّْ خَافِي،
أڭّْ جّهْذْ نّشْ ذڭْ ؤُمْسخَّارْ نّشْ،
ؤُشَا سنْجمْ مِّيسْ ن ثَايَّا نّشْ.
17 أڭّْ إِشْثْ ن ڒعْڒَامثْ ذِي طّْوعْ إِنُو،
حِيمَا إِنِّي ذ أَيِي إِشَارّْهنْ
أَذْ ث ژَترنْ أَذْ سضْحَانْ،
مَاغَارْ شكْ، أَ سِيذِي، ثوْشِيذْ أَيِي أَفُوسْ
ؤُ ثسّْفوّْجذْ خَافِي.