٨٣
١ إِزْڒِي. أَزهّذْ ن أَسَافْ.
٢ أَ أَربِّي، وَارْ سّغْذْ،
وَارْ تّڭّْ إِخفْ نّشْ ذ أَذهْشُورْ،
وَارْ سقَّارْ شَا، أَ أَربِّي.
٣ مَاغَارْ خْزَارْ،
ڒْْعذْيَانْ نّشْ تَّارُّودْجُوذنْ،
إِنِّي شكْ إِشَارّْهنْ سّْڭعّْذنْ أَزدْجِيفْ.
٤ تّْخَارّْصنْ ذڭْ إِشْثْ ن ثْمعْمُوتْشْ
ذِي ثْنُوفَّارْ
ضِيدّْ إِ ڒْْڭنْسْ نّشْ،
تّمْشَاوَارنْ
خْ يِينِّي إِتّْوَاحْضَانْ زَّايكْ.
٥ قَّارنْ: ”أَسمْ-د، أجّْ أَنغْ
أَذْ ثنْ نْثحَّا أَمْ ڒْْڭنْسْ،
أَڒَامِي وَارْ إِتِّيذَارْ عَاذْ
ذڭْ يِيسمْ ن إِسْرَائِيل.“
٦ مَاغَارْ تّمْشَاوَارنْ س وُوڒْ ذ إِجّْ،
أَقَا تّڭّنْ إِجّْ ن ڒْْعَاهْذْ ضِيدّْ إِ شكْ:
٧ إِقِيضَانْ ن إِذُومْ ذ أَيْثْ ن إِسْمَاعِيلْ،
مُوآبَ ذ أَيْثْ ن هَاجَارْ،
٨ جَابَالْ ذ عَامُّونْ ذ عَامَالِيقْ،
فِيلِيشِيثْ ذ إِمزْذَاغْ ن صُورْ.
٩ ؤُڒَا ذ أَشُّورْ إِمَّارْنِي غَارْسنْ.
نِيثْنِي ثُوغَا أَثنْ ذ أَفُوسْ إِجْهذْ
إِ أَيْثْ ن لُوطْ. سِيلَاهْ.
١٠ أڭّْ أَسنْ أَمْ مِيذْيَانْ ذ سِيسَارَا،
أَمْ يَابِينْ غَارْ يغْزَارْ ن قِيشُونْ.
١١ نِيثْنِي تّْوَاثحَّانْ غَارْ عَايْنْ-ذُورْ،
ذوْڒنْ ذ ڒغْبَارْ خْ ثمُّورْثْ.
١٢ أڭّْ إِ-ثنْ أَكْ-ذ ثَارْوَا ن ثَاصِيڒثْ نْسنْ
أَمْ غُورَابْ ذ ذِي‘بْ،
مَارَّا أَيْثْ ن جّهْذْ نْسنْ
أَمْ زَابَاحْ ذ صَالْمُونَّاعْ،
١٣ إِنِّي إِقَّارنْ:
”أجّْ أَنغْ أَذْ نطّفْ
ثِيزذِّيغِينْ ن أَربِّي
إِ يِيخفْ نّغْ ذ ڒْْوَارْثْ.“
١٤ أَ أَربِّي إِنُو، أڭّْ إِ-ثنْ
أَمْ يِيجّْ ن ؤُقلِّيجْ
إِتّنّْضنْ ذِي ڒعْوِينْ،
أَمْ ؤُڒُومْ زَّاثْ إِ وُوذمْ ن ؤُسمِّيضْ.
١٥ أَمْ ثْمسِّي ثسّْرقَّا أَزْغَارْ،
أَمْ ؤُشعَّاڒْ إِتّتّْ إِذُورَارْ،
١٦ أَژّڒْ أَمُّو خَاسنْ س ؤُسمِّيضْ نّشْ،
سْنخْڒعْ إِ-ثنْ س ثْحَارْيَاضْثْ نّشْ.
١٧ ڒحّفْ ؤُذمْ نْسنْ س ڒحْيَا،
مَاحنْذْ نِيثْنِي، أَ سِيذِي،
أَذْ أَرْزُونْ خْ يِيسمْ نّشْ.
١٨ أجّْ إِ-ثنْ أَذْ بَارّْقنْ
ؤُ أَذْ أَرجْفنْ إِ ڒبْذَا،
أجّْ إِ-ثنْ أَذْ سضْحَانْ
ؤُشَا أَذْ تّْوَاهلّْكنْ،
١٩ حِيمَا أَذْ سّْننْ، أَقَا شكْ وَاهَا
إِ غَارْ إِدْجَا يِيسمْ ’سِيذِي‘،
أَمْعُودْجِي خْ مَارَّا ثَامُّورْثْ.