٦٢
١ إِ ؤُمقّْرَانْ ن إِمغْنَاجنْ. سَاذُو ؤُفُوسْ ن يَاذُوثُونْ. ن ذَاوُوذْ.
٢ وَاهْ، ڒعْمَارْ إِنُو يَارسَّا،
إِتّْرَاجَا أَربِّي وَاهَا،
أَقَا زَّايسْ د-إِتَّاسْ ؤُسنْجمْ إِنُو.
٣ وَاهْ، نتَّا ذ ثَاصْضَارْثْ إِنُو ذ ؤُسنْجمْ إِنُو،
لْبُورْجْ إِنُو يُوعْڒَانْ، وَارْ تّفْرِيغغْ أَطَّاسْ.
٤ مشْحَاڒْ عَاذْ إِ غَا ثكّمْ
ثْهجّْممْ خْ ورْيَازْ؟
مشْحَاڒْ عَاذْ أَقَا ثْڒهَّامْ
مَاحنْذْ أَذْ ث ثغْضْڒمْ،
أَمْ إِجّْ ن ڒْْحِيضْ إِوطَّا،
أَمْ يِيجّْ ن وغْبَارْ إِتّْوَاغْضڒْ؟
٥ وَاهْ، نِيثْنِي تّمْشَاوَارنْ وَاهَا
حِيمَا أَذْ ث-إِ-د -غضْڒنْ
زڭْ ومْشَانْ نّسْ يُوعْڒَانْ.
نِيثْنِي أَرطَّانْ س إِخَارِّيقنْ.
تّْبَارْكنْ س ؤُقمُّومْ نْسنْ،
مَاشَا ذڭْ وُوڒْ نْسنْ نعّْڒنْ. سِيلَاهْ.
٦ وَاهْ، رَاجَا إِ أَربِّي، أَ ڒعْمَارْ إِنُو،
مِينْزِي زَّايسْ ڒَْايَاسْ إِنُو.
٧ وَاهْ، نتَّا ذ ثَاصْضَارْثْ إِنُو ذ ؤُسنْجمْ إِنُو،
لْبُورْجْ إِنُو يُوعْڒَانْ، وَارْ تّفْرِيغغْ شَا.
٨ أَسنْجمْ إِنُو ذ ؤُعُودْجِي إِنُو
أَقَا أَثنْ ذِي أَربِّي،
نتَّا ذ ثَاصْضَارْثْ إِنُو إِجهْذنْ،
أَمْشَانْ إِنُو ن ثَاروْڒَا
أَقَا-ث ذِي أَربِّي.
٩ ثِيقّمْ ڒبْذَا ذَايسْ، أَ ڒْْڭنْسْ!
زدْجْعمْ ؤُڒْ نْومْ زَّاثْ إِ وُوذمْ نّسْ.
أَربِّي ذ أَمْشَانْ نّغْ ن ثَاروْڒَا. سِيلَاهْ.
١٠ وَاهْ، ثَارْوَا ن أَذَامْ
أَقَا أَثنْ ذ ڒعْوِينْ،
ثَارْوَا ن ورْيَازْ أَقَا ذَايْسنْ أَخَارِّيقْ.
أَذْ ڭعّْذنْ ذِي ڒْْمِيزَانْ
س ثْنَاينْ ن طَّاوْيَاثْ،
أَقَا أَثنْ جْمِيعْ فْسُوسنْ خْ ڒعْوِينْ.
١١ وَارْ تّشْڒمْ خْ دّدْجْ،
وَارْ تّجِّيمْ أَذْ كنِّيوْ جبّْذنْ
زڭْ وبْرِيذْ س ؤُكَّارْضَا.
مَاڒَا أَڭْڒَا إِمقَّارْ،
وَارْ خَاسْ سّْرُوسَامْ ؤُڒْ نْومْ.
١٢ أَربِّي إِسِّيوڒْ إِشْثْ ن ثْوَاڒَا،
سْڒِيغْ ثْنَاينْ ن ثْوَاڒَاوِينْ،
أَقَا: ”جّهْذْ زِي أَربِّي“.
١٣ ثَامخْسِيوْثْ إِشوَّارنْ إِ شكْ، أَ سِيذِي إِنُو!
مِينْزِي شكْ أَذْ ثْخدْجْصذْ
كُوڒْ إِجّْ عْلَاحْسَابْ مِينْ إِڭَّا.